އަލް ސަފާ ޕްރައިވެޓް ލިމިޓެޑްގެ އުމްރާވެރިން ފުރުމުގެ ހުރިހާ އިންތިޒާމެއް ހަމަޖެހި، އަންގާރަ ދުވަހު އެގްރޫޕުގެ އުމްރާވެރިން ފުރުމަށް ހަމަޖެހިފައިވާކަމަށް އެ ގްރޫޕުން ހާމަކޮށްފިއެވެ.
ސަފާ ގްރޫޕުގެ ހަވާލުގައި އުމްރާއަށް ދިއުމަށް ފައިސާ ދައްކާފައިވާ 181 މީހަކަށް ވިސާ ހަމަނުޖެހިފައިވާކަމަށް ބުނެ އެގްރޫޕުން މިމަހުގެ ހަވަނަ ދުވަހު އުމްރާއަށް ފުރަން ހަމަޖެހިފައިވާ ފަރާތްތަކުގެ ފުރުން ވަނީ ލަސްވެފައެވެ.
ސަފާ ގްރޫޕުން މަޢުލޫމާތުދޭ ގޮތުގައި އުމްރާވެރިން ސައުދީއަށް ދަތުރުކުރުމަށް އޮމާންގެ "ސަލާމް އެއާ"ގެ ފްލައިޓެއް މިހާރު ވަނީ ޗާޓަރުކޮށްފަ އެވެ. އުމްރާވެރިން ފުރުމަށް ހަމަޖެހިފައިވަނީ އަންގާރަ ދުވަހުގެ މެންދުރު 12:00ގައި ކަމަށް އެ ގްރޫޕުން ވަނީ ބުނެފަ އެވެ.
އުމްރާވެރިންގެ ވިސާ އާއި ޓިކެޓުގެ އިތުރުން ސައުދީގައި ތިބުމުގެ އިންތިޒާމުތައް ހަމަޖައްސާފައިވާ ކަމަށް ސަފާ ގްރޫޕުން ވަނީ ބުނެފަ އެވެ.
ސަފާގެ އުމްރާވެރިންގެ އިންތިޒާމުތައް ހަމަޖެހި އަންގާރަ ދުވަހު ފުރަން ތައްޔާރުވެފައިވާ ކަމަށް އެ ގްރޫޕުން ބުނެފައިވާއިރު، ރޯދަ މަހުގެ އުމްރާ ކެންސަލްކުރި ކަމަށް އެ ގްރޫޕުން މިދިޔަ ހުކުރު ދުވަހު ނެރުނު ބަޔާނެއްގައި ވަނީ ބުނެފަ އެވެ.
ނަމަވެސް އިސްލާމިކް މިނިސްޓްރީން ވަނީ އުމްރާ ދަތުރު ކެންސަލްނުކޮށް އުމްރާވެރިން ފުރުވާލުމަށް އެ ގްރޫޕަށް އަންގާފަ އެވެ.
