ކުރިޔަށް އޮތް ރިޔާސީ އިންތިޚާބުގައި ވާދަކުރައްވާނޭކަން އިތުރު ބޭފުޅަކު ހާމަ ކުރައްވައިފިއެވެ.
މިގޮތުން މި ލިސްޓަށް އެންމެ ފަހުން އިތުރުވި ބޭފުޅަކީ އެލްޖީއޭގެ ކުރީގެ ނައިބު ރައީސްކަން ކުރެއްވި ޝުޖާއު ހުސެއިންއެވެ.
އޭނާ ކުރެއްވި ޓުވީޓެއްގައި ވިދާޅުވެފައިވަނީ އޭނާ ރިޔާސީ އިބްތިޚާބުގައި ވާދަކުރުމާއި ގުޅޭގޮތުން އެކި ފަރާތްތަކުން އެކިގޮތަށް ޚަބަރު ފަތުރަމުން ދާތީ އެކަން ސާފު ކޮށްދޭން ބޭނުންވާކަމުގައެވެ.
މި ނިންމުމަށް އެއްވެސް ވަރެއްގެ ބަދަލެއް ނާންނަ ކަމާއި އަދި ނުވެސް އަންނާނެ ކަމުގެ ޔަގީން ކަން އަޅުގަނޑަށް ހެޔޮ އެދޭ ފަރާތްތަކަށާއި އަޅުގަނޑަށް ތާއީދު ކުރާ ފަރާތްތަކަށާއި ދިވެހި އެންމެހައި ލޮބުވެތި ރައްޔިތުންނަށް އަރުވަމެވެ،
އޭނާ މިއަދު ކުރެއްޗި ޓުވީޓެއްގައި ވިދާޅުވެފައި ވެއެވެ.
Riyaasee Inthikhaabugai vaadhakuran nimmi nimmumah ehvves badhaleh nugennan. Vaadhakuraanan #shujau2023 @Mihaarunews @AdhadhuMV @VaguthuOnline @oneonlinemv @Ch13official @DhiyaresNews @thevoice_mv @minoosmv @thiladhun @dhidaily @sunbrk @avasmv @DhivehiChannel @Sangu_TV… pic.twitter.com/ubYaFykW7u
— Shujau Hussain (@alameershujau) April 9, 2023
ޝުޖާއުއަކީ މީގެ ކުރީގެ ރިޔާސީ އިންތިޚާބު ތަކުގައިވެސް ވާދަކުރާނެކަން އިއުލާން ކުރައްވާފައިވާ ބޭފުޅެކެވެ. އެހެންނަމަވެސް އޭނާ މިހާތަނަށް އަދި އެއްވެސް ރިޔާސީ އިންތިޚާބެއްގައި ވާދަ ކޮށްފައެއް ނުވެއެވެ.
އަންނަ ސެޕްޓެމްބަރު މަހުގެ 9 ވަނަ ދުވަހު އޮންނަ ރިޔާސީ އިންތިހާބުގައި ވާދަކުރައްވާނެ ކަން މިހާތަނަށް އިއުލާން ކުރައްވާފައިވާ ފަރާތްތަކަކީ އެމްޑީޕީގެ ރިޔާސީ ކެންޑިޑޭޓު އިބްރާހިމް މުހައްމަދު ސޯލިހާއި ޖުމްހޫރީ ޕާޓީގެ ލީޑަރު ގާސިމް އިބްރާހިމާއި އަމިއްލަގޮތުން ވާދަކުރައްވާ ކުރީގެ ހޯމް މިނިސްޓަރު އުމަރު ނަސީރާއި ކުރީގެ ބަންޑާރަ ނައިބު ޑރ. މުހައްމަދު މުނައްވަރާއި އެމްއެންޕީގެ ރައީސް އަދި ރައްޔިތުންގެ މަޖިލިހުގެ ދަނގެތި ދާއިރާގެ މެމްބަރު މުހައްމަދު ނާޒިމެގެ އިތުރުން އިދިކޮޅު ޕީޕީއެމްގެ ރައީސް ޔާމިންއެވެ.
