ނ. މަނަދޫގެ ގެއެއްގެ ތެރޭގައި އަންހެނަކު މަރުވެފައި އޮއްވާ ފެނުނު މައްސަލަ ތަހުގީގު ކުރަމުން އަންނާތީ އެ ރަށުން ބޭރަށް ބަޔަކު ފުރާ ނަމަ އަދި އެ ރަށަށް ދާ ނަމަ، ހުއްދަ ހޯދުމަށް ކައުންސިލުން އަންގައިފިއެވެ.
ކައުންސިލުން މިގޮތަށް އަންގާފައި މިވަނީ މަނަދޫގައި އެކަނި ދިރިއުޅެމުންދިޔަ 62 އަހަރުގެ އަންހެނެއްގެ މަރުގެ މައްސަލައެއްގަ އެވެ. ހުއްދަ ހޯދައިގެން ރަށަށް އެރުމާއި ފޭބުމަށް އަންގާފައި ވަނީ ފުލުހުންގެ އެދުމުގެ މަތިން ކަމަށް ކައުންސިލްގެ ރައީސް ވިދާޅުވިއެވެ.
މަނަދޫ ކޮމިއުނިޓީ ވައިބާ ގްރޫޕަށް ރަށު ކައުންސިލުގެ ރައީސް ސޮބީހު ފޮނުއްވި މެސެޖެއްގައި ވިދާޅުވީ ފުލުހުން ތަހުގީގުކުރަމުންދާ މައްސަލައަކާ ގުޅިގެން ފުލުހުން އިތުރަށް ބަލަން ޖެހޭ ކަންތައްތަކެއް ހުރުމުން، މި ވަގުތުން ފެށިގެން އެރަށުން ބޭރަށް އެއްވެސް މީހަކު ނުވަތަ އުޅަނދެއް ފުރާ ނަމަ، ފުލުހުންނަށް އަންގާފައި ނޫނީ ނުފުރުމަށެވެ. އަދި ބަޔަކު އެ ރަށަށް ދާނަމަ، ދިއުމުގެ ކުރިން ފުލުހުންނަށް އެންގުމަށް ފަހު، ރަށަށް އެރުމަށް އެ މެސެޖުގައިވެއެވެ.
އެ އަންހެން މީހާގެ ހަބަރެއް ނުވެގެން އާއިލާ އިން ރިޕޯޓްކުރީ މިއަދު އިރުއޮއްސެން އުޅެނިކޮށެވެ. އެހެންވެ، ފުލުހުން އޭނާ ދިރިއުޅެމުންދިޔަ ގޭގެ ކޮޓަރީގެ ދޮރު ވައްޓާލައިގެން ވަތްއިރު އަންހެން މީހާ އޮތީ ބިންމަތީގައި މަރުވެފައި ކަމަށް ފުލުހުން ބުންޏެވެ. އެކަމަކު އެ މައްސަލަ އިތުރަށް ބަލަމުންދާ ކަމަށް ބުންޏަސް އެކަމުގެ ތަފްސީލެއް އަދި ފުލުހުން ނުދެއެވެ.
