ޖުމުހޫރީ ޕާޓީގެ ލީޑަރު ގާސިމް އިބުރާހިމްއާއި ފިކުރެއްގެ ދިރުން ސިޔާސީ ހަރަކާތުގެ ލީޑަރު މުހައްމަދު ނަޝީދު މިއަދު ސަން އައިލެނަޑުގައި ބައްދަލު ކުރާގޮތަށް ހަމަޖެހިއްޖެ ކަމަށް ޚަބަރު އޮންލައިނަށް މައުލޫމާތު ލިބިއްޖެއެވެ.
މައުލޫމާތު ލިބިފައިވާގޮތުގައި ނަޝީދު ފިކުރެއްގެ ދިރުން ސިޔާސީ ހަރަކާތުގެ އިސް ބޭފުޅުންނާއެކު ގާސިމްއާއި ބައްދަލު ކުރުމަށް ސަން އައިލެންޑަށް ދަތުރު ކުރެއްވުމަށް ހަމަޖެހިފައިވަނީ ކަނޑު މަގުންނެވެ.
ނަޝީދު މިއަދު ގާސިމްއާއި ބައްދަލު ކުރައްވާއިރި ފިކުރެއްގެ ދިރުމުންވަނީ ކުރިޔަށް އޮތް ރިޔާސީ އިންތިޚާބަށް ޖުމުހޫރީ ޕާޓީއާޢެކު ކޯލިޝަން ހެދުމަށް ނިންމާފައެވެ. އަދި، ރިޔާސީ އިންތިޚާބުގެ މެނިފެސްޓޯ ހެދުމަށް ދެފަރާތުން މިހާރުވަނީ 3 ފަހަރެއްގެ މަތިން ބައްދަލުވެސް ކޮށްފައެވެ.
މިގޮތުން އެންމެ ފަހުން ބޭއްވުނު 3ވަނަ ބުރުގެ މަޝްވަރާތައް އޮތީ ރޭގައެވެ. މަޝްވަރާރަކަށްފަހު މީޑިއާއަށް މަޢުލޫމާތު ދެއްވަމުން ނަޝީދު ފެކްޝަނުގެ އިސް މެމްބަރެއްކަމަށްވާ ރައްޔިތުންގެ މަޖިލީހުގެ ހެންވޭރު ހުޅަނގު ދާއިރާގެ މެމްބަރު ޙަސަން ލަތީފް ވިދާޅުވީ އެފެކްޝަނާއި ޖޭޕީއާއެކު ފުޅާދާއިރާއެއްގައި މަޝްވަރާކުރަމުންދާކަމަށެވެ.
މި މަޝްވަރާތައް ކުރިއަށްދަނީ ކަނޑައެޅިފައިވާ ތާވަލަކާ އެއްގޮތަށްކަމަށްވެސް އޭނާ ވިދާޅުވިއެވެ. އެކި މަރުޙަލާތަކަށް ބަލާގައިގެން ކުރިއަށްގެންދަން ނިންމާފައިވާ މަޝްވަރާތަކުގެ އެކި ބައްދަލުވުންތަކުގައި އޮންނާނީ އެކި ކަންކަން ކަމަށް ހަސަން ވިދާޅުވިއެވެ.
އެހެންނަމަވެސް މިވަގުތު އެފެންޝަން އޮތީ ޖުމްހޫރީ ޕާޓީގެ ރިޔާސީ ކެންޑިޑޭޓު ޤާސިމް އިބްރާހީމާއެކުކަމަށްވެސް ޙަސަން ލަތީފް ވިދާޅުވިއެވެ. އެމްޑީޕީއަށް އެންމެ ރަނގަޅު ގޮތަކީ މިއީކަމަށާ، ނަޝީދު ފެކްޝަންގެ ބޭނުމަކީ އެމްޑީޕީ އެކުލެވޭ ސަރުކާރެއް އުފެއްދުންކަމަށްވެސް ހަސަން ވިދާޅުވިއެވެ.
