އިސްރާއީލުން ހިސާރު ކޮށްފައިވާ، ފަލަސްތީނުގެ ގާޒާ ސްޓްރިޕަށް މިސައިލް ހަމަލާ ދޭ ފަށައިފިއެވެ.
ފަލަސްތީނުގެ މިނިވަންކަމަށް ހަނގުރާމަކުރާ ހަމާސް ޖަމާއަތުގެ ބާރުގެ ދަށުގައި އޮންނަ ގާޒާއަށް އިސްރާއީލުން އަސްކަރީ ހަމަލާ ދޭން ފަށާފައި މިވަނީ، ފަލަސްތީނުގެ ޖެރޫސެލަމްގައި ހުންނަ އަގްސާ މިސްކިތަށް އިސްރާއީލު ސިފައިން ދިން ހަމަލާތަކުގެ ބަދަލު ހިފުމުގެ ގޮތުން ގާޒާއިން އިސްރާއީލަށް ރޮކެޓް ހަމަލާތައް އަމާޒު ކުރިތާ 24 ގަޑިއިރުވެސް ނުވަނީހެވެ.
ގާޒާއަށް މިސައިލް ހަމަލާތައް ލޯންޗު ކުރުމަށްފަހު އިސްރާއީލުގެ އަސްކަރިއްޔާއިން ބުނެފައިވަނީ "ގާޒާ ސްޓްރިޕް އަސްކަރިއްޔާއިން ހަމަލާ ދޭން ފަށައިފި" ކަމުގައެވެ.
އޭއެފްޕީން ހާމަ ކޮށްފައިވާ ގޮތުގައި ގާޒާގެ ގަޑިން ރޭގަޑު 11:15 ހާއިރު ގަޒާގެ ތިން ސަރަހައްދަކުން ތިން ގޮވުމެއްގެ އަޑު އިވިފައި ވެއެވެ.
ފަލަސްތީނުގެ ސަލާމަތީ ފަރާތްތަކުން މައުލޫމާތު ދީފައިވާ ގޮތުގައި އިސްރާއީލުގެ އަސްކަރިއްޔާއިން ހަމަލާތައް އަމާޒު ކޮށްފައިވަނީ ހަމާސްތެ ޓްރެއިނިން ކޭމްޕްތަކަށެވެ.
ގާޒާއަށް ފުރަތަމަ ދިން ހަމަލާތަކަށް ފަހު އޭގެ ދޮޅު ގަޑިއެއްހާއިރު ފަހުންވެސް އިސްރާއީލު ފައިޓަރ ޖެޓްތައް ގަޒާގެ މަތިން އުދުހެމުންދާތަން ފެނިފައި ވެއެވެ.
އިއްޔެ ލުބުނާނުން އިސްރާއީލަށް 34 ރޮކެޓް ހަމަލާއެއް އަމާޒުވެގެން ދިއުމަށްފަހު އިސްރާއީލުގެ ބޮޑުވަޒީރު ނަތަންޔާހޫ ވިދާޅުވެފައިވަނީ، "އިސްރާއިލަށް ދިން ހަމަލާތަކަށް އަދުއްވުން ބޮޑު އަގެއް ދައްކަން ޖެހޭނެ" ކަމަށެވެ.
އިސްރާއީލުގެ އަސްކަރިއްޔާއިން ބުނެފައިވަނީ ލުބުނާނުން އިސްރާއިލަށް ދިން ރޮކެޓް ހަމަލާތަކުގެ ޒިންމާވެސް އުފުލާން ޖެހޭނީ ހަމާސްއިން ކަމަށެވެ.
މިހަމަލާތަކުގައި އިސްރާއީލް މީހަކަށް ކުދި އަނިޔާތައް ވެފައި ވެއެވެ.
ހަމާސްގެ ވެރިޔަ އިސްމާއިލް ހަނިޔާ ވިދާޅުވެފައިވަނީ އިސްރާއިލުން އަލް އަގްސާ މިސްކިތަށް ހަމަލާދޭތަން ބަލަން ހަމާސްއިން ދެއަތް އުރާލައިގެން ނޯންނާނެ ކަމުގައެވެ.
