ލ.ގަމުގެ 3 އަވަށުގައި ވަކިވަކިން ބޭނުންކުރަމުންއައި އިންޖީނުގެތަށް އެއްކޮށްލައި ސެންޓްރަލް ޕަވަރހައުސް ނުވަތަ ސަރަޙައްދީ އިންޖީނުގެއަކުން ކަރަންޓު ފޯރުކޮށްދެމުން އަންނަ ގޮތް އެންވަޔަރަމަންޓް މިނިސްޓަރ ޑރ.ޙުސައިން ރަޝީދު ޙަސަން ބައްލަވާލައްވައިފިއެވެ.
ލ.ގަމުގެ ކަރަންޓު ވިއުގަ ގުޅާލުމުގެ މަސައްކަތް ފަށާފައިވަނީ މިދިޔަ އަހަރުގެ ޖުލައިމަހުއެވެ. އެރަށަށް ކަރަންޓު ފޯރުކޮށްދޭ ފެނަކަ ކޯޕަރޭޝަނުން ބުނީ އެއް ވިއުގައަކުން ގުޅާލާފައިވަނީ މުކުރިމަގު، މަތިމަރަދޫ، ތުނޑީ އަވަށުގައި ވަކިވަކިން ހިންގަމުންއައި އިންޖީނުގެތަކާއި، އިދާރީ މަސައްކަތްކުރާ އޮފީސްތަށްކަމަށެވެ.ތިން އަވަށުގައި ވަކިން ހިންގަމުންއައި އިދާރީ އޮފީސްތައް، އާ އިމާރާތަކަށް ބަދަލުކޮށް މިހާރު ޚިދުމަތްދެނީ އެއް ފުރާޅެއްގެ ދަށުންނެވެ. ފެނަކައިން ވިދާޅުވެފައިވަނީ ސަރަޙައްދީ އިންޖީނުގޭގެ ޢަމަލީ މަސައްކަތް ނިމިފައިވަނީ މިމަހުކަމަށާ މިހާރު ޚިދުމަތް ފަށާފައިވާކަމަށެވެ.
އެނގިފައިވާގޮތުން ސެންޓްރަލް ޕަވަރހައުސް ނުވަތަ ސަރަހައްދީ އިންޖީނުގެ މިފެށޭމަހު ރަސްމީކޮށް ހުޅުވުމަށް އަންނަނީ ތައްޔާރުވަމުންނެވެ. ޕަވަރހައުސް ހުޅުއްވާދެއްވާނީ ރައީސް އިބްރާހީމް މުޙައްމަދު ޞާލިޙްއެވެ.
މި އިންޖީނުގޭގެ އޮފީސް ޢިމާރާތް ހިންގަމުން އަންނަނީ ލ.ގަން ތުނޑީ އަވަށުގައި މީހުން ދިރިނޫޅޭ ސަރަޙައްދުގައެވެ. އާއްމުންނަ އުންދަގޫވާގޮތަށް ރަށުތެރޭގައި ހުންނަ އިންޖީނުގެތަށް މީހުން ދިރިނޫޅޭ ސަރަހައްދަށް ބަދަލުކުރުމަކީވެސް ފެނަކައިން ފަށާފައިވާ މުހިންމު މަސައްކަތެކެވެ.
ގަމުގެ ތިން އަވަށަށް ކަރަންޓު ފޯރުކޮށްދިނުމަށް ފެނަކައިން މިހާރު ބޭނުންކުރަމުން އަންނަނީ 1.2ކިލޯ ވޮޓްގެ ކަރަންޓެވެ. ނަމަވެސް ގަމުގައި އިތުރުވަމުން އަންނަ އާބާދީއާއި ވިޔަފާރިތަކާއިއެކު، އެރަށުގެ ކަރަންޓު ކެޕޭސިޓީ އިތުރުކުރަން ޖެހިފައިވާކަމަށް އެކުންފުނިންވަނީ ވިދާޅުވެފައެވެ. އެގޮތުން އާ އިންޖީނުގެއާއެކު ގަމުގެ ކަރަންޓް ކެޕޭސިޓީ 4.5ކިލޯ ވޮޓްއަށް އިތުރުކުރާނެކަމަށް ފެނައިން މީގެކުރިން ވިދާޅުވެފައިވެއެވެ.
Minister @DrHussainHassan, Chairman of the FENAKA Mohamed Rasheed and the Magaing Director of FENAKA Ahmed Saeed Mohamed visited the newly built central power station at L. Gan. During the trip they also inspected current status the L. Gan sewerage network. pic.twitter.com/DAWs1siRDC
— Ministry of Environment (@MoEnvmv) November 29, 2020
ލ.ގަމަކީ އާބާދީގައި ފަސްހާހެއްހައި މީހުން ދިރިއުޅެމުން އަންނަ ރަށެކެވެ. ސެންޓަރަލް ޕަވަރހައުސް ހުޅުވުމަށް ވަމުން އަންނަ ތައްޔާރިތައް ބައްލަވާލެއްވުމަށް މިނިސްޓަރ ޑރ.ޙުސައިން ރަޝީދު ޙަސަންގެ އިތުރުން ފެނަކަ ކޯޕަރޭޝަންގެ މެނޭޖިން ޑިރެކްޓަރ އަޙްމަދު ސަޢީދު މުޙައްމަދުވެސް ވަނީ ބައްލަވާލައްވާފައެވެ.
ކޮމެންޓު ފޮނުވާ