ރަމަޟާން މަހުގެ ރޭގަނޑު އަދާކުރާ ރެއަޅުކަން، އެހެން ދުވަސްތަކުގައި އަދާކުރާ ރޭ އަޅުކަމަށްވުރެ މަތިވެރިވެގެން ވެއެވެ. ރަސޫލުﷲ ޞައްލަﷲ ޢަލައިހި ވަސައްލަމަ ޙަދީޘް ކުރައްވައެވެ. (مَنْ قَامَ رَمَضَانَ إِيمَانًا وَاحْتِسَابًا غُفِرَ لَهُ مَا تَقَدَّمَ مِنْ ذَنْبِهِ)[1] މާނައަކީ: "އީމާންކަމާއި، ދަރުމަ އާއި ޘަވާބަށް އެދި ރަމަޟާންމަހު ރޭއަޅުކަން ކޮށްފި މީހާގެ އިސްވެދިޔަ ހުރިހާ ފާފަ އެއް ފޮހެވިގެންވެއެވެ."
"އީމާން" މުރާދަކީ "ﷲ އަށް އީމާންވެ، ރޭއަޅުކަން ކުރާ މީހުންނަށް މާތް ﷲ ތައްޔާރު ކުރައްވާފައިވާ ދަރުމަ އާއި ޘަވާބަށް އެދިގެން ކުރުމެވެ."
"އިޙްތިސާބް" ނުވަތަ "ދަރުމަ އަށް އެދިގެން" އޮތް ބަހުގެ މުރާދަކީ ޖާހާއި މުދަލަށް އެދުމެއް ނެތި، މީސްތަކުންނަށް ދެއްކުންތެރި ކަމެއް ނެތި، ހަމައެކަނި ﷲ ގެ ޙަޟްރަތުން ލިބޭނެ ދަރުމަ އާއި ޘަވާބަށް އެދިގެން އެކަމެއް ކުރުމެވެ.
