އަންނަ ރިޔާސީ އިންތިޚާބުގައި ވާދަކުރައްވާނެކަން ޢިއުލާންކުރައްވާފައިވާ ޖުމްހޫރީ ޕާޓީގެ ލީޑަރ ޤާސިމް އިބްރާހީމްގެ ފަރާތުން ކޯލިޝަން ހެދުމަށް އެދި ޕާޓީތަކާއި ބައެއް ލިޑަރުންނަށް ފޮނުއްވި ދަޢުވަތު އެބޭފުޅުން ބޮލާލާއި ޖެހުމާއެކު ޖޭޕީއަށް އަމާޒުވާ ފާޑުކިޔުންތަކަށް ގާސިމްގެ ސްޕެޝަލް އެޑްވައިޒަރު އަދި ކުރީގެ ޕޮލިސް ކޮމިޝަނަރު އަބްދުﷲ ނަވާޒް ރައްދުދެއްވައިފިއެވެ.
ޤާސިމަށް އެއްވެސް ޕާޓީއެއްގެ ތާޢީދެއް ނެތްކަމަށާ، މިހާތަނަށް ތާޢީދުކުރެއްވި ހަމައެކަނި ލީޑަރަކީ އެމްޑީޕީގެ ރައީސް މުޙައްމަދު ނަޝީދުކަން ފާހަގަކޮށް މިޑިއާގައިވެސް ވަނީ ރިޕޯޓުކޮށްފައެވެ. ދާދިފަހުން ޤާސިމްވަނީ އިދިކޮޅު ޕީޕީއެމް/ ޕީއެންސީ އަށާއި އެމްއެންޕީއަށާއި، އެމްއާރުއެމްއަށް ޤާސިމްގެ ފަހަތްޕުޅަށް އައިސް ކޯލިޝަން ހެދުމުގެ ދަޢުވަތު ފޮނުއްވާފައެވެ. އަދި ރިޔާސީ އިންތިޚާބުގައި ވާދަކުރައްވަން ނިންމަވާފައިވާ ޢުމަރު ނަޞީރާއި ޑރ.މުޙައްމަދު މުނައްވަރަށްވެސް ޤާސިމް ސިޓީ ފޮނުއްވިއެވެ.
މި ފަރާތްތަކުގެތެރެއިން އެމްއާރުއެމް ފިޔަވައި އެހެން ހުރިހާ ފަރާތްތަކުން ވަނީ ސާފުބަހުން ޤާސިމަށް ނޫނުކޭ ބުނެފައެވެ. އަދި އިދިކޮޅު ޕީޕީއެމް/ ޕީއެންސީން ވަނީ ޤާސިމްގެ ސިޓީ ބަލައިގަންނަންވެސް ދެކޮޅު ހަދައި ފާޑުކިޔާފައެވެ. އެމްއާރުއެމްއިންވެސް މިހާތަނަށް އެއްވެސް ޖަވާބެއް ނުދެއެވެ.
މިކަމާ ގުޅިގެން ޖޭޕީއަށް އަމާޒުވާ ފާޑުކިޔުންތަކަށް ރައްދުދެއްވައި ނަވަޒް ވިދާޅުވީ ރައްޔިތުންގެ މަޖިލިހުގެ ރައީސް މުހައްމަދު ނަޝީދުގެ ތާއީދަކީ ކުޑަ އެއްޗެއް ނޫން ކަމަށާ، އެތާޢީދާއެކު ޤާސިމަށް ރިޔާސީ އިންތިޚާބު ކާމިޔާބު ވާނެކަމަށެވެ.
Kobaitho massala akee.RNgethaeedhu eei kuda ehchehnoon.Ehennoonas siyaasee partyEmme furathama beynunvaanee verikamah 1stround gai vakin vaadha kurun.@qasimibrahim Insha Allah inthihaab kaamiyab kiraanee ehburun.Ehennoonas sarukaaru funded noos thakun thiyakahala HLine hadhaane. pic.twitter.com/S4CC1bY7h4
— Abdullanawaz (@abdullanawa) April 5, 2023
ޤާސިމްގެ ދަޢުވަތަށް ތަރުޙީބު ނުލިބި ފަނުފުލުން ގޮސްފައިވަނިކޮށް ޖޭޕީގެ ޕާލަމެންޓްރީ ގްރޫޕުގެ މެމްބަރު ޢަލީ ޙަމީދު ވަނީ އެޕާޓީން ވަކިވެ ރައީސް ޞާލިހަށް ތާޢީދުކުރައްވަމުން އެމްޑީޕީއަށް ސޮއިކުރައްވާފައެވެ. މިއާއެކު މަޖިލީހުގެ ގޮނޑިއެއްވެސް ޖޭޕީއަށް ގެއްލުނީއެވެ.
މިއަހަރުގެ ރިޔާސީ އިންތިޚާބުގައި ވާދަކުރައްވަން ޤާސިމް ނިންމަވާފައި މިވަނީ، 2008ވަނަ އަހަރާއި 2013ވަނަ އަހަރުގެ ރިޔާސީ އިންތިހާބުގައިވެސް ވާދަކުރައްވައި ކުތިމަތިލައްވަން ޖެހިވަޑައިގަތް ނާކާމިޔާބީ ބަދަލުކޮށްލައްވާށެވެ. އެ ދެ އިންތިޚާބުގައިވެސް ފުރަތަމަ ބުރުން ޤާސިމްވީ ބައްޔެވެ.
