މާފުށީ އެމްޑީޕީގައި އެތައް އަހަރެއް ވަންދެން ހަރަކާތްތެރިވި އިސްބޭފުޅުންތަކެއް މިރޭ އިކޮޅު ޕީޕީއެމްއަށް ސޮއިކޮށް، ޕީޕީއެމްގެ ކެނޑިޑޭޓް ހުސެއިން ރިޒާގެ ކެމްޕެއިނާއި ގުޅިއްޖެއެވެ.
މިރޭ މާފުށީގައި ބޭއްވި ޚާއްސަ ރައްމިއްޔާތެއްގައި ޕީޕީއެމްއާއި ގުޅުނު މާފުށީ އެމްޑީޕީގެ އިސް ބޭފުޅުންނަކީ އެޕާޓީ އުފެދުނީއްސުރެ އުޅުނު ބައެއް ބޭފުޅުންނާއި، އެމްޑީޕީގެ އެކި ހަރަކާތްތަކުގައި މާފުށީގައި އެންމެ އިސްކޮށް ހަރަކާތްތެރިވާ ބޭފުޅުންނެވެ. މިބޭފުޅުން ޕީޕީއެމްއާއި ގުޅުމަށްފަހު ފޯމު ހަވާލުކުރީ ޕީއެންސީގެ ރައީސް އަބްދުއްރަހީމާއިއެވެ.
ސޮއިކުރި ބޭފުޅުންގެ ތެރެއިން އެމްޑީޕީގައި ފާއިތުވެދިޔަ 18 އަހަރު ހޭދަކުރި އަލީ ރަމީޒު ވިދާޅުވީ އެނާ އެމްޑީޕީ ދޫކޮށް ޕީޕީއެމްއާއި ގުޅުނީ ރާއްޖޭގެ ތަރައްޤީއާއި ކުރިއެރުމަށް އެންމެ ބޮޑު މަސައްކަތެއް ކުރި ޕާޓީއަކީ ޕީޕީއެމް ކަމަށް ވުމުންކަމުގައެވެ. އަދި ޕީޕީއެމްގެ ރައީސް ޔާމީނަށް ނުހައްގުން ދެމުންދާ އަނިޔާތަކާއި މިސަރުކާރުން ރައްޔިތުންނާއިމެދު އަމަލު ކުރަމުންދަނީ ވަރަށް ނާއިންސާފުން ކަމަށް އޭނާ ވިދާޅުވިއެވެ.
އޭނާ ބުނީ ކުރިއަށް އޮތް ގުރައިދޫ ދާއިރާގެ އިންތިޚާބުގައި ވާދަކުރާ ކެނޑިޑޭޓުންނަށް ބަލާއިރު އެންމެ ޤާބިލް ތައުލީމީ އަދި ހިންގުންތެރި ކެނޑިޑޭޓަކީ ހުސެއިން ރިޒާކަމަށެވެ. އަދި މެމްބަރު މަރުހޫމް އިބްރާހިމް ރިޒާއަށްޓަކައިވެސް މިގޮޑި ހޯދުމަށް ކުރަންޖެހޭ ހުރިހާކަމެއް ކޮށްދޭނެކަމަށެވެ.
މިރަސްމިއްޔާތުގައި ގުރައިދޫ ދާއިރާއަށް ޕީޕީއެމްގެ ޓިކެޓްގައި ވާދަކުރައްވާ ހުސެއިން ރިޒާ ވިދާޅުވީ، ބޭބެ އަވަހާރަ ވުމާއި ގުޅިގެން މިއިންތިޚާބުގައި ވާދަކުރުމަކީވެސް ފަސޭހަ ކަމަކަށް ނުވާކަމަށެވެ. ނަމަވެސް މިރޭ މާފުށިން ގުޅުނު ޓީމާއިއެކު އިންތިޚާބުގައި ކުރިއަށް ދިއުމަށް އިތުރު ހިތްވަރެއް ލިބި ބޭބެއަށްޓަކައިވެސް އަދި ބޭބެ ކުރެއްވި މަސައްކަތް އެގޮތުގައި ދެމެހެއްޓުމަށް މިގޮޑި ކާމިޔާބު ކުރުމަށް އިތުރު ހިތްވަރެއް ލިބިގެން ގޮސްފައިވަކަމަށެވެ.
އޭނާ ވިދާޅުވީ މާފުށި، ގުޅި، ގުރައިދޫ ރައްޔިތުންނަކީ ތަރައްޤީއަށް އެދޭ ތަރައްޤީ ބޭނުންވާ ރައްޔިތެއް ދިރިއުޅޭ ދާއިރާއެއްކަމަށެވެ. އެކަން ހާސިލް ކޮށްދެވޭނީ ޕީޕީއެމްއަށްކަން މާޒީވެސް ހާމަވާނެކަމަށެވެ. އަދި ކުރިއަށް އޮތް ތަނުގައިވެސް ގުރައިދޫ ދާއިރާއަށް ތަރައްްޤީއާއި ކުރިއެރުން ގެނެސްދޭނީ ޕީޕީއެމްއިން ކަމަށް ރިޒާ ވިދާޅުވިއެވެ.
ކޮމެންޓު ފޮނުވާ