ގާނޫނުއަސާސީގެ 115 ވަނަ މާއްދާއަކީ ރައީސުލްޖުމްހޫރިއްޔާގެ ބާރުތަކާއި މަސްއޫލިއްޔަތުތައް ބަޔާންކުރާ މާއްދާއެވެ. އެ މާއްދާގެ (ޅ) ގައި ބުނެފައިވަނީ ވަޒީރުންގެ މަޖިލީހަށާއި ރައީސުލްޖުމްހޫރިއްޔާގެ މަގާމުގެ ވާޖިބު އަދާކުރުމަށްޓަކައި ބޭނުންވާ މަގާމުތަކަށް، މީހުން އައްޔަންކުރުމާއި އެ މަގާމުތަކުން މީހުން ވަކިކުރުމާއި އެ މީހުންގެ އިސްތިއުފާ ގަބޫލުކުރުމަކީ ރައީސުލްޖުމްހޫރިއްޔާއަށް ލިބިދޭ ބާރަކާއި މަސްއޫލިއްޔަތެއް ކަމަށެވެ.

ރައީސް ނަޝީދު ވިދާޅުވީ އެ ބޭފުޅުންނަކީ ސިޔާސީ މުވައްޒަފުންނަށް ނުވާ ހިނދު، އެ ބޭފުޅުންގެ ވިސްނުމާއި ކުންފުނިތަކުގެ މިސްރާބު ކޮންމެހެން ސަރުކާރުގެ ސިޔާސަތު ތަކާ އެއްގޮތް ވުން ލާޒިމް ނޫން ކަމަށް ވިދާޅުވެ ރައީސް އިބްރާހީމް މުހައްމަދު ޞާލިޙްއަށް ނުސީދާ ރައްދެއް ދެއްވާފައެވެ.

މީގެ އިތުރުން އެމަނިކުފާނު ވިދާޅުވީ ސަރުކާރު ހިއްސާވާ ކުންފުނިތަކުން ދައުލަތުގެ ބަޖެޓަށް ވުރެ އިތުރަށް ޚަރަދު ކުރާ ކަމަށާއި، ސިވިލް ސާވިސްގެ މުވައްޒަފުންނަށް ވުރެ އިތުރަށް އެކުންފުނިތަކުގެ ޕޭ ރޯލް ގައި ފައިސާ ހުންނަން ޖެހޭ ކަމަށެވެ. އަދި އެ ކުންފުނިތަކުގެ ދަރަނި ހަމަޖެއްސުމަށާއި ނަގާފައި ހުންނަ ލޯނުތައް އަނބުރާ ދެއްކުމަށް ސަރުކާރުން ރައްޔިތުންގެ ފައިސާއިން ޚަރަދު ކުރާ މިންވަރު އިންތިހާއަށް އިތުރުކަން ފާހަގަކުރައްވައި ރައީސް ނަޝީދު ވިދާޅުވީ، ތައުލީމީ އަދި ސިއްޚީ ދާއިރާއަށް ހަރަދު ކުރާ މިންވަރަށް ވުރެ ބައެއް ފަހަރު އެ އަދަދު އިތުރު ވެގެން ދާ ކަމަށެވެ.

ރައީސް ނަޝީދު މި މޭރުމުން ވާހަކަދައްކަވާފައިވާއިރު، ދާދިފަހުން ސަރުކާރު ހިއްސާވާ ސްޓޭޓް ޓްރޭޑިން އޮގަނައިޒޭޝަން (އެސްޓީއޯ) ގެ މެނޭޖިން ޑިރެކްޓަރު ހުސެއިން އަމްރު ރަޝާދު ވަނީ އެ މަގާމުން ވަކިކޮށްފައެވެ. އަމްރު މަގާމުން ވަކިކޮށްފައިވާއިރު އޭނާ ވަނީ ރައީސް ޞާލިޙަށް ތާއީދުނުކުރައްވައި، އެ ޕާޓީގެ ރައީސް މުހައްމަދު ނަޝީދާ ގުޅިގެން އެމަނިކުފާނުގެ "ފިކިރެއްގެ ދިރުން"ގެ މަސައްކަތް ކުރައްވަން ނިންމަވައިފައެވެ.

އަމްރު މަގާމުން ވަކިކޮށްފައިވަނީ ސީދާ ރައީސް އަންގަވައިގެން، ޕްރައިވަޓައިޒޭޝަން އެންޑް ކޯޕަރޭޝަން ބޯޑު (ޕީސީބީ)އިންނެވެ.