ކުރިޔަށް އޮތް ރިޔާސީ އިންތިޚާބަށް ރައީސް ސާލިހަށް ތާޢީދުކުރަން ނިންމާފައިވާކަން، ޓުއަރިޒަމް މިނިސްޓަރ ޑރ. މައުސޫމް އެންމެ ފަހުން އިއުލާން ކޮށްފިއެވެ.
ޖުމުހޫރީ ޕާޓީގެ ސްލޮޓެއްގައި ޓުއަރިޒަމް މިނިސްޓަރު ކަމުގެ މަގާމުގައި ހުންނެވި ޑރ. މައުސޫމް މިރޭ ކުރެއްވި ޓުވީޓެއްގައި ވިދާޅުވެފައިވަނީ، ރައީސް ސާލިހަށް ދެވަނަ ދައުރެއް ލިބުމަކީ ރާއްޖޭގެ ރައްޔިތުންނަށް އަދި މުޅި ދިވެހި ދައުލަތަށްވެސް އެންމެ ފައިދާބޮޑު ގޮތް ކަމުގައެވެ.
އަދި އެގޮތް ވިސްނި، ރައީސް ސާލިހަށް އެއްވެސް ޝަރުތަކާ ނުލާ ތާއީދުކުރަން ނިންމާފައިވާކަމުގައި ޑރ. މައުސޫމްގެ ޓުވީޓުގައި ވިދާޅުވެފައި ވެއެވެ. މިގޮތުން ރައީސް ސާލިހާއެކީ ސަލާމް ކުރައްވަނިކޮށް ނަގާފައިވާ ފޮޓޯއެއް ޓުވީޓުގައި ހިމަނާފައިވަނީ، ރައީސްއަށް ބައިޢަތު ހިފާފައިވާކަން އެންމެ ކަތުންނަށް އަންގާ އެވާހަކަ ހިއްސާކުރުމުގެ ގޮތުން ކަމުގައިވެސް މައުސޫމުގެ ޓުވީޓުގައި ވިދާޅުވެފައި ވެއެވެ.
Yes, I endorse HEP Ibrahim Mohamed Solih @Ibusolih for the Second Term of Office, as the President of #Maldives. pic.twitter.com/99wR03nEMz
— Abdulla Mausoom (@Mausoom_Maus) April 1, 2023
ކުރިޔަށް އޮތް ރިޔާސީ އިންތިޚާބުގައި މައުސޫމް ރައީސް ސާލިހަށް ތާއީދު ކުރުމަށް ނިންމިކަން އިއުލާން ކުރި ނަމަވެސް ޖޭޕީން ވަކިވާން ނިންމިކަމެއް އޭނާ ހާމަ ކުރައްވާފައެއް ނުވެއެވެ.
ފާއިތުވި ދުވަސްތަކުގައި ޑރ. މައުސޫމް ވަނީ ފޭސްބުލް ޕްރޮފައިލް ފޮޓޯ ރައީސް ސާލިހުގެ ފޮޓޯއަށް ބަދަލު ކުރައްވާ، ރައީސަށް ތާއީދުކުރާކަން ހާމަ ކުރައްވާފައެވެ.
ޑރ. މައުސޫމު ރައީސް ސާލިހަށް ތާއީދުކުރާކަން ހާމަ ކުރައްވާފައިވާއިރު، ޖޭޕީގެ ލީޑަރ ގާސިމް އިބުރާހިމް ވަނީ ކުރިޔަށް އޮތް ރިޔާސީ އިންތިޚާބުގައި ވާދަކުރުމަށް ނިންމާފައެވެ. ގާސިމް ރިޔާސީ އިންތިޚާބުގައި ވާދަކުރުމަށް ނިންމުމާއި ގުޅިގެން ޖޭޕީގެ ސްލޮޓުގައި ސަރުކާރުގެ އިސްވަޒީފާތަކުގެ ތިއްބެވި ބޭފުޅުން ގެންދަވަނީ ޖޭޕީން ވަކިވަމުންނެވެ.
