ސައުދީ އަރަބިއާއަށް އުމްރާއަށް ދާ ފަރާތްތަކުން އަގުބޮޑު ތަކެއްޗާއި އަދި ބޮޑެތި އަދަދުތަކުން ފައިސާ އަތުން ނުގެންދިއުމަށް ސައުދީގެ ކަމާއި ގުޅުންހުރި މުވައްސަސާތަކުން އިލްތިމާސް ކޮށްފިއެވެ.

ސައުދީގެ މިނިސްޓްރީ އޮފް ހައްޖު އެންޑް އުމްރާއިން، އުމްރާވެރިންނަށް އިލްތިމާސް ކޮށްފައިވަނީ، އެގައުމަށް ދާއިރު، އަގުބޮޑު ރަނާއި، އަގުބޮޑު މައުދަނާއި އަދި އެނޫނަސް އަގުބޮޑު ތަކެތި އަތުން ނުގެންދިއުމަށާއި، އޭގެ އިތުރުން އަތުން އެންމެ ގިނަވެގެންވެސް 16،000 ޑޮލަރަށްވުރެ އިތުރަށް ނުގެންދިއުމަށެވެ.

ސައުދީގެ މުވައްސާތަކުން އިލްތިމާސް ކޮށްފައިވަނީ، ބޭންކުތަކުގެ އެޕްލިކޭޝަންތައް ޑައުންލޯޑު ކުރާއިރު، ފައިސާގެ މުއާމަލާތްތައް ނިސްބަތްވާ ބޭންކެއްގެ ރަސްމީ ވެބްސައިޓުން އެޕްލިކޭޝަން ޑައުމްލޯޑު ކުރުމަށެވެ. އަދި ބޭންކު އެކައުންޓާއި ގުޅުންހުރި މައުލޫމާތު އެއްވެސް އެހެން ފަރާތްކާއި ހިއްސާ ނުކުރުމަށާއި، ކާކުކަން ނޭގޭ ފަރާތްތަކުން އަންނަ މެސެޖްތަކަށްވެސް ޖަވާބު ނުދިނުމަށްވެސް ސަމާލުކަން ދިނުމަށް އެދިފައި ވެއެވެ.

އޭގެ އިތުރުން، އެއްވެސް ބާވަތެއްގެ ފްރައުޑެއްގެ މައުލޫމާތު ލިބިއްޖެނަމަ ނުވަތަ އެފަދަ އެއްވެސް މުއާމަލާތެއް ކުރެވިއްޖެ ނަމަވެސް ލަސްނުކޮށް ސައުދީގެ ކަމާއި ގުޅުންހުރި މުވައްސަސާތަކާއި އެކަން ހިއްސާ ކުރުމަށްވެސް ސައުދީގެ މިނިސްޓްރީ އޮފް ހައްޖު އެންޑް އުމްރާއިން ކޮށްފައިވާ ޓުވީޓުގައި އެދިފައި ވެއެވެ.

ފާއިތުވި މާރޗުމަހު މިނިސްޓްރީން ހުރިހާ އުމްރާވެރިންނަށްވެސް އަންގާފައިވަނީ މި ރޯދަމަހު އުމްރާއަށް ދާ ފަރާތްތަކުން އެއް އުމްރާ ކުރުމަށެވެ. އެއީ ގިނަ މީހުން އެއްތަނަކަށް އެއްވުން މަދު ކުރުމަށާއި އަދި އެއްވާ ތަންތަނުގައި މީހުންނަށް ފަސޭހައި އުޅެވޭނެ އިންތިޒާމްތައް ހަމަޖެއްސުމަށް ފަސޭހަ ކުރުމަށެވެ.

ރޯދަމަހަކީ ސައުދީ އަރަބިއާއަށް އުމްރާއަށް ގިނަ ބަޔަކު ދަތުރުކުރާ މައްސަރެކެވެ.