ޔޫތް މިނިސްޓްރީގެ ބިމެއްގައި ހުރި ގުދަނެއްގެ ތަޅު ހަލާކުކޮށް، މާލެ ސިޓީ ކައުންސިލުން އެތަނުގައި ހުރި މުދާތައް ގެންދިޔަ މައްސަލައެއް ފެންމަތިވެއްޖެއެވެ.

މިނިސްޓަރު އަހުމަދު މަހުލޫފް ކުރެއްވި ޓްވީޓެއްގައި ވިދާޅުވީ އެ މިނިސްޓްރީގެ ބިމެއްގެ ތެރެއަށް ސިޓީ ކައުންސްލުން ވަދެ ގުދަނުގެ ތަޅުހަލާކުކޮށްލާފައިވާ ކަމަށެވެ. ގުދަންކޮށްފައި ހުރި އަގުބޮޑު ސާމާނުތައް ގެންގޮސްފައިވާ ކަމަށް ޓްވިޓާގައި ފޮޓޯއެއް ހިއްސާކުރައްވާ މަހުލޫފް ވިދާޅުވިއެވެ. އެކަން ވަގުތުން ހުއްޓާލުމަށް މަހުލޫފް ވަނީ ސިޓީ ކައުންސިލްއަށް ގޮވާލާފައެވެ. އަދި ގެއްލޭ ތަކެއްޗާއި ގެއްލުންލިބޭ ތަކެއްޗަށް ޒިންމާ އުފުލަންވާން ޖެހޭނެ ކަމަށް ވެސް މިނިސްޓަރު ވިދާޅުވިއެވެ.

މީގެ ކުރިންވެސް މުދާތައް ރައްކާކޮށްފައިވާ ގުދަން، ސަރުކާރަށް ވެސް ނޭނގި ސިޓީ ކައުންސިލުން ވަނީ އަމިއްލަ ފަރާތަކަށް ކުއްޔަށް ދީފައިވެއެވެ. އެ ގުދަނަކީ ޕީޕީއެމްގެ ސަރުކާރުގައި “ރުމާލު 2” ޖަގަހަ ހިންގި ތަނެވެ. އެ ގުދަނާ ގުޅިފައިވާ ހުސް ބިން ސަރުކާރުން ވަނީ ވޮލީ ކޯޓު އަޅަން ޔޫތު މިނިސްޓްރީއަށް ދީފައެވެ.

މި ޓުވީޓާއި ގުޅިގެން ދަންނަވަން. މާލެ ސިޓީ ކައުންސިލުން ޤާނޫނާއި ޤަވައިދާ ޚިލާފަށް އެެއްވެސް ކަމެެއް ނުކުރާނެ.އަދި އެކަން ހިނގައި ދިޔަ ގޮތް ބަލާ ތަފްސީލު ހާމަ ކުރާނެ ވާހަކަ ސަމާލުމަކަށްޓަކައި ދަންނަވަން. https://t.co/vxzgnVVy3P

— Male' City Council (@MaleCitymv) March 31, 2023

މިކަމާ ގުޅިގެން ސިޓީ ކައުންސިލުން މިރޭ ބުނީ ޤަވައިދާ ޚިލާފަށް އެެއްވެސް ކަމެެއް ނުކުރާ ކަމަށެވެ. އަދި އެކަން ހިނގައި ދިޔަ ގޮތް ބަލައި ތަފްސީލު ފަހުން ހާމަކުރާނެ ކަމަށެވެ.