ސަރުކާރު ކޯލިޝަންގައި ހިމެނޭ އެމްއާރުއެމްއަށް އެއް އަހަރު ފުރުމުގެ މުނާސަބާ ފާހަގަކުރުމަށް މާދަމާރޭ ޚާއްސަ ޖަލްސާއެއް ބޭއްވުމަށް އެޕާޓީން ނިންމައިފިއެވެ.
އެމްއާރުއެމްއިން ވިދާޅުވި މިޖަލްސާ ބޭއްވުމަށް ހަމަޖެހިފައިވަނީ ކޯވިޑް19 އާއި ގުޅިގެން ޒޫމް މެދުވެރިކޮށް ކަމަށެވެ. މިޖަލްސާގައި އެމްއާރުއެމްގެ ރައީސް، އަދި ކުރީގެ ރައީސް އަލް އުޘްތާޒު މައުމޫން އަބްދުލް ޤައްޔޫމާއި އެޕާޓީގެ އިސްސަފުގެ ބޭފުޅުން ބައިވެރިވެ ވަޑައިގެން ވާހަކަ ދެއްކުމަށް ވަނީ ހަމަޖެހިފައެވެ. ކޯވިޑް19 އާއި ގުޅިގެންވެސް އެޕާޓީގެ ހަރަކާތްތައް ހުއްޓިޔަ ނުދީ ކުރިއަށް ގެންދިއުމަށްޓަކައި ޕާޓީގެ ކައުންސިލް ބައްދަލުވުންތައް ޒޫމް މެދުވެރިކޮށް ދަނީ ބާއްވަމުންނެވެ.
ރައީސް މައުމޫން އިސްކޮށް ހުންވައިގެން އުފެއްދެވި އެމްއާރުއެމް އަށް އެއް އަހަރު ފުރުނީ މިމަހުގެ 20 ވަނަ ދުވަހުގައެވެ. އެދުވަހު މެމްބަރުންނަށް ދެއްވި މެސެޖެއްގައި ރައީސް މައުމޫން ވިދާޅުވީ ޕާޓީގެ މެމްބަރުން ފާއިތުވެދިޔަ އެއް އަހަރުގެ ތެރޭގައި ވެވަޑައިގެންފައިވާ ޤުރުބާނީއާއި ކުރައްވާފައިވާ މަސައްކަތްޕުޅަކީ ޤައުމަށްޓަކައި ވެވަޑައިގެންފައިވާ ޤުރުބާނީއެއްގެ ގޮތުގައި ސިފަކުރައްވާފައެވެ.
ކުރީގެ ރައީސް މައުމޫން އަބްދުލްގައްޔޫމް ފެއްޓެވި އިސްލާހީ ހަރަކާތުގެ ސަޕޯޓަރުން، 2018ގެ ރިޔާސީ އިންތިހާބުގައި، މައުމޫން ރިފޯމް މޫވްމަންޓު (އެމްއާރުއެމް)ގެ ނަމުގައި ހަރަކާތެއް ފަށާފައިވަނީ ރައީސް މައުމޫން ޖަލަށް ލައި، އޭރުގެ ރައީސް ޔާމީން ހިންގެވިއަމަލުތަކާއި ދެކޮޅަށް މަސައްކަތް ކުރެއްވުމަށެވެ. އެމްްްއާރުއެމްއަކީ މިއަދު ސަރުކާރު ކޯލިޝަންގައި ހިމެނޭ އެއްބައިވެރިއެކެވެ.
ކޮމެންޓު ފޮނުވާ