ރާއްޖޭގެ ރައްޔިތުން މާޔޫސްވާނެ ފަދަ ނިންމެވުމެއް ޖުމްހޫރީ ޕާޓީގެ ލީޑަރު ޤާސިމް އިބްރާހިމް ނުނިންމަވާނެކަމުގައި އެމަނިކުފާނުގެ ސްޕެޝަލް އެންވޯއީ އިލްހާމް އަހުމަދު ވިދާޅުވެއްޖެއެވެ.
ރިޔާސީ އިންތިޚާބުގައި ޖުމްހޫރީ ޕާޓީގެ ފަރާތުން ވާދަކުރާ ކެނޑިޑޭޓަކު ކަނޑައެޅުމަށް ބާއްވާ ޕްރައިމަރީގައި ވާދަކުރުމުގެ ފުރުސަތު މާދަމާ މެންދުރު 12 ޖެހުމާއި ހަމައަށް ހަމަވާނެއެވެ. ނަމަވެސް މިހާތަނަށް ކުރިމަތިލާފައިވަނީ ކޮން ބޭފުޅުންނެއް ކަމެއް އެޕާޓީން ހާމަކޮށްފައި ނުވެއެވެ.
މިރޭ ޖުމްހޫރީ ޕާޓީން ބޭއްވި ނޫސްވެރިންގެ ބައްދަލުވުމުގައި ނޫސްވެރިންގެ ގިނަ ސުވާލުތައް އަމާޒުވީވެސް ޖުމްހޫރީ ޕާޓީގެ ރިޔާސީ ޕްރައިމަރީއަށެވެ. ޖުމްހޫރީ ޕާޓީން ރިޔާސީ ޕްރައިމަރީގައި ޤާސިމް ވާދަކުރައްވަފާނެތޯ ނޫސްވެރިއަކު ސުވާލު ކުރުމުން އިލްހާމް ވިދާޅުވީ ޤާސިމް އިބްރާހިމް މިރޭ ނިންމެވިޔަސް، އަދި މާދަމާ ނިންމެވިޔަސް ނިންމަވާ ކޮންމެ ނިންމުމެއް ބިނާވެފައިވަނީ ރައްޔިތުންނަށް ޓަކައިކަމަށެވެ.
ޤާސިމް އަކީ ރައްޔިތުންގެ ހައްގުގައި އަބަދުވެސް ވަކާލާތު ކުރައްވާ އަދި ރާއްޖޭގެ އާންމު މަސްލަަހަރު ހިފަހެއްޓެވުމުގައި އަބަދުވަސް އިސްކަން ދެއްވާނެ ބޭފުޅެއްކަމަށް އިލްހާމް ވިދާޅުވިއެވެ. އެމަނިކުފާނު މި އިންތިޚާބުގައި ވާދަކުރުމާއިމެދު ނިންމަވާ ނިންމުންވެސް ބިނާވާނީ ރައްޔިތުންނަށް އުންމީދެއް ގެނުވާނެފަދަ ގޮތަކަށް ކަމަށް ކަމަށް އިލްހާމް ވިދާޅުވިއެވެ.
ރައްޔިތުން މާޔޫސްވާނެ ނިންމުމެއް ޤާސިމް ނުނިންމަވާނެ. އެމަނިކުފާނު ނިންމަވާނީ ރައްޔިތުން މިހާލަތުގައި ބޭނުންވާފަދަ ނިންމުމެއް. އެމަނިކުފާނުގެ ނިންމުން ބިނާވާނީ ޤައުމުގެ ތަރައްޤީއާއި ކުރިމަގަށް. އިސްލާމް ދީނާއި ދިވެހި ދައުލަތުގެ ހިމާޔަތުގައި ނޫނީ އެމަނިކުފާނު ނިންމަވާ ނިންމުމެއް އިސްނުކުރާނެ.
– އިލްހާމް ވިދާޅުވިއެވެ.
މިބައްދަލުވުމުގައި ކުރީގެ މިނިސްޓަރ އަޒުލީން ވިދާޅުވީ ޖުމްހޫރީ ޕާޓީގެ ލީޑަރު ޤާސިމް އިބްރާހިމް ރިޔާސީ އިންތިޚާބުގައި ވާދަކުރައްވާތޯ އިންތިޒާރުކުރާ އެތައް ހާސް ރައްޔިތުން އެބަތިބިކަމަށެވެ. އަދި ޖުމްހޫރީ ޕާޓީގެ ލީޑަރޝިޕް އޮތީ އެމަނިކުފާނުގެ ފަހަތްޕުޅުގައި ރިޔާސީ އިންތިޚާބު ކާމިޔާބް ކުރުމަށް ކުރަންޖެހޭ ކޮންމެ މަސައްކަތެއް ކުރުމަށް ތައްޔާރަށް ކަމަށް އަޒުލީން ވިދާޅުވިއެވެ. އޭނާ ވިދާޅުވީ މުޅި ޕާޓީން ބޭނުންވަނީ ޤާސިމް އިންތިޚާބުގައި ވާދަކުރުމަށް ކަމަށެވެ. ނަމަވެސް ޤާސިމް ނިންމަވާ ކޮންމެ ނިންމުމަކަށް ފުރިހަމައަށް ޖުމްހޫރީ ޕާޓީގެ ހުރިހާ މެމްބަރުން އިހުތިރާމް ކުރާނެކަމަށެވެ.
ޖުމްހޫރީ ޕާޓީން ރިޔާސީ އިންތިޚާބުގައި ވާދަކުރާނެ ކެނޑިޑޭޓަކު ނެރޭ ހިސާބުން ސަރުކާރުގައި ތިބި ޖުމްހޫރީ ޕާޓީގެ މަޤާމުތަކުގައި ތިއްބެވި ބޭފުޅުންގެ ތެރެއިން ބައެއް ބޭފުޅުން ވަކިވާން ގެންގުޅުއްވާ ވިސްނުމާއި ގުޅޭގޮތުން ނޫސްވެރިއަކު ކުރި ސުވާލަކަށް ޖަވާބު ދެއްވަމުން އިލްހާމް ވިދާޅުވީ ކޯލިޝަން ހެދިފައިވަނީ ލީޑަރު ޤާސިމް ވިދާޅުވި ގޮތަށް 5 އަހަރަށް ކަމަށެވެ. އެހެންކަމުން އެއްވެސް ބޭފުޅަކު އިސްތިއުފާ ދެއްވައިގެން ނުވާނެކަމަށެވެ.
ނަމަވެސް މިހާލަތުގައި ޕާޓީން ވަކިވާ މެމްބަރުން ނިންމަވާ ނިންމުމަކީ އެބޭފުޅެއްގެ އަމިއްލަ ވިސްނުމަށް ނިންމާ ނުމެއް ކަމަށާއި، އެފަދަ ހާލަތެއް ނާންނާނެކަމަށް އުންމީދުކުރާކަމަށެވެ. އަދި ޖުމްހޫރީ ޕާޓީއަކީ އެއްވެސް ހާލަތެއްގައި އެއްވެސް މީހަކު ވަކިވެގެން ގޮސްގެން އަދި ބަޔަކު ނުލައި ވެރިކަމަށް އާދެވޭ ވަރުގެ ބައެއްކަމަށް ގަބޫލު ނުކުރާކަމަށާއި، ޖޭޕީން މަސައްކަތް ކުރާނީ އެންމެންނާއިއެކީ ގުޅިގެން ވެރިކަން ކުރުމަށް ކަމަށެވެ.
