ރައީސް އޮފީހުގެ މިނިސްޓަރުކަން އެމްޑީޕީގެ ނައިބު ރައީސް މުހައްމަދު ޝިފާޒު ވަކިކޮށްފިއެވެ.
ރައީސް ނަޝީދުގެ ގާތް ބޭފުޅެއް ކަމުގައިވާ ޝިފާޒު ވަޒީފާއިން ވަކިކޮށްފައިވަނީ މިއަދުއެވެ. ރައީސް އިބްރާހިމް މުހައްމަދު ސޯލިހު ވެރިކަމަށް ވަޑައިގަތުމަށް ފަހު ކެބިނެޓުގެ ބޭރުން ސިޔާސީ މަގާމަކަށް އެންމެ ފުރަތަމަ އައްޔަނުކުރި ބޭފުޅުންގެ ތެރޭގައި ޝިފާޒް ހިމެނެއެވެ. އޭނާއަށް ރައީސް އޮފީހުގެ މިނިސްޓަރުކަން ދިނީ ނޮވެމްބަރު 22، 2018 ގައެވެ.
ޝިފާޒު ވަޒީފާއިން ވަކި ކުރިކަމުގެ ލިޔުން ހަވާލުކުރީ މިއަދުއެވެ. ރައީސް އޮފީހުގެ މިނިސްޓަރު ކަމުން ޝިފާޒު ވަކިކޮށްފައިވާއިރު، ރައީސް ނަޝީދަށް ތާއީދުކުރާ އެކި މަޤާމުތަކުގައި ތިއްބެވި ބޭފުޅުން ދަނީ ސަރުކާރުން ވަކި ކުރަމުންނެވެ. އެގޮތުން އެސްޓީއޯގެ އެމްޑީ ކަމުގެ މަޤާމުގައި ހުންނެވި ހުސެއިން އަމްރުވެސް ވަނީ މިދިޔަ އާދީއްތަ ދުވަހު ވަކިކޮށްފައެވެ.
ޕްރައިމަރީ ރައީސް ސޯލިހު ކާމިޔާބު ކުރެއްވިއިރު ނަޝީދާއި އެމަނިކުފާނުގެ ޓީމު މަސައްކަތް ކުރައްވަމުން ގެންދަވަނީ އެމްޑީޕީގެ ރިޔާސީ ކެންޑިޑޭޓަށް ތާއީދު ނުކުރައްވައި "ފިކުރެއްގެ ދިރުން" ނަމުގައި ވަކި ފެކްޝަނެއް ހަދައިގެނެވެ. ޝިފާޒާއި، އަމްރުއަކީވެސް ރައީސް ނަޝީދުގެ ފެކްޝަންގައި އިސްކޮށް ހަރަކާތްތެރިވާ ދެ ބޭފުޅުންނެވެ.
