ވެރިކަން ކުރާ މައި ޕާޓީ އެމްޑީޕީގެ ތެރެއިިން އެޕާޓީގެ ރައީސް މުހައްމަދު ނަޝީދަށް މިހާރު 300 ވޯޓުވެސް ނުލިބޭނެކަމަށް އެމްޑީޕީގެ ކުރީގެ ޗެއާޕާސަން މޫސާ މަނިކު ވިދާޅުވެއްޖެއެވެ.

އެމްޑީޕީގެ ތެރޭގައި އޮތް ބައިބައިވުންތަކާއި ގުޅޭގޮތުން ރޭ ދައުލަތުގެ މީޑިއާގައި މޫސަ ވަނީ އެމްޑީޕީގެ ރައީސް މުހައްމަދު ނަޝީދަށް ވަރަށް ބޮޑަށް ފާޑު ވިދާޅުވެފައެވެ. އޭނާ ވިދާޅުވީ ރައީސް ނަޝީދު މީހުނަށް އެގުނީ ނަޝީދުގެ އަތުގައި ހިފައިގެން ރަށްރަށަށް ގޮސް ކުރި މަސައްކަތުން ކަމަށެވެ. ކުރިން ނަޝީދުގ ރަށްރަށަށް ދިއުމުން ގާވެސް އުކާފައިވާކަމަށް ވިދާޅުވިއެވެ. ނަމަވެސް އޭނައާއި އެމްޑީޕީގެ އޭރުގެ އިސްވެރިންނާއިއެކު ނަޝީދު ދަތުރު ކުރުމުން ރައްޔިތުން ކޮންމެވެސް ވަރަކަށް ނަޝީދުގެ ކަރުގައި މާފަތިވެސް އެޅުވިކަމަށެވެ.

އެމްޑީޕީގެ ރިޔާސީ ޕްރައިމަރީއަށްފަހު ރައީސް ނަޝީދު ރައީސް ޞާލިހަށް ތާއީދު ނުކުރައްވައި ދިކުރެއްގެ ދިރުމުގެ ނަމުގައި ހިންގަވާ ހަރަކާތަށް ވަރަށް ބޮޑަށް ފާޑު ވިދާޅުވަމުން މޫސަ ވިދާޅުވީ، އެމްޑީޕީގައި މިހާތަނަށް ލެވުނު އެންމެ އިންސާފުވެރި ވޯޓުން ނަޝީދު ބަލިވުމުން އެކަން ބަލައި ނުގަނެ އެމްޑީޕީ ހައިޖެކްކޮށްގެން އުޅުއްވި ޒަމާނުގައި ކަންކަން ކުރެއްވި ގޮތަށް ވޯޓު އޮޅުވަލައި ހާޖާނު ހަދަން މަސައްކަތް ކުރިކަމަށެވެ.

ނަމަވެސް މިހާރު ނަޝީދަކީ ކޮން ބޭފުޅެއްކަން އެމްޑީޕީގެ މެމްބަރުންނަށްވެސް އެގޭނެކަމަށް އޭނާ ވިދާޅުވިއެވެ. ރައީސް ނަޝީދު މި އިންތިޚާބުގައި ރައީސް ޞާލިހަށް ތާއީދު ނުކުރުމަކުން ގެއްލޭގެ އެއްޗެއް ނެތްކަމަށްވެސް އޭނާ ވިދާޅުވިއެވެ. މިހާރު ރައީސް ނަޝީދަށް އެމްޑީޕީ ތެރެއިން 300 ވޯޓުވެސް ނުލިބޭނެ ކަމަށް މޫސަ ވިދާޅުވިއެވެ.

އެމްޑީޕީ މީހުންނަށްވެސް ނަޝީދަކީ ކާކުކަން މިހާރު އެގިއްޖެ. މިހާރަކު ނަޝީދަށް އެމްޑީޕީ ތެރެއިން 300 ވޯޓުވެސް ނުލިބޭނެ. އަޅުގަނޑު ޔަގީންކަމާއިއެކު މިދަންނަވަނީ ނަޝީދަކަށް ނުކުރެވޭނެ އެމްޑީޕީ ތެރެއިން 300 ވޯޓުވެސް ގެންދާކަމަށް. އޭނަ 300 ވޯޓު ގެންގޮސްފިއްޔާ އަޅުގަނޑު އެކަނިވެސް ރައީސް ޞާލިހަށް 10،000 ވޯޓު ހޯދާނަން.

– މޫސަ ވިދާޅުވިއެވެ.

މޫސަ ވިދާޅުވީ ރިޔާސީ އިންތިޚާބުގައި ރައީސް ނަޝީދާއިއެކު ކުރިއަށް ދިއުމުގެ ވިސްނުމުގައި ދެން ރައީސް ޞާލިހު ނަޝީދާއި މަޝްވަރާވެސް ކުރައްވައި ނުވާނެކަމަށެވެ. އަދި ނަޝީދު ދެން ގެނެސްގެން ވާނެ ފައިދާއަށްވުރެ ބޮޑަށް ވާނީ ގެއްލުންކަމަށް މޫސަ ވިދާޅުވިއެވެ.

މޫސަ ވިދާޅުވީ އެމްޑީޕީން ރިޔާސީ ކެނޑިޑޭޓަކު ކަނޑައަޅައި، ކޯލިޝަން ހެދުމުގެ ބާރު ޕާޓީގެ ގައުމީ މަޖިލީހުން ރައީސް ޞާލިހަށް ދީފައިވާއިރު، މިކަން ކުރަން ނަޝީދުގެ އޯޑަރަށް ދާ މީހުންނަކީ މިހާރު އެމްޑީޕީގެ މެމްބަރުން ނޫންކަމަށެވެ. އެމްޑީޕީގެ އަސާސީ ގަވާއިދާއި ޚިލާފަށް ޕާޓީގެ ގައުމީ މަޖިލީހުން ނިންމާފައިވާ ނިންމުމަކާއި ޚިލާފަށް ކަންކަން ކުރެއްވުމަކީ ވަގުތުން އެމީހަކާއިމެދު ފިޔަވަޅު އެޅި ޕާޓީން ވަކިވާނެ ކަމެއްކަމަށް މޫސަ ވިދާޅުވިއެވެ.

އޭނާ ވިދާޅުވީ އެބައްދަލުވުންތަކަށް ނަޝީދު ނުދަނީ ނަޝީދަށް އެމްޑީޕީގެ އަސާސީ ގަވާއިދު ރަނގަޅަށް އެގޭތީކަމަށެވެ. ނަޝީދު ބޭނުންވަނީ އެހެން ބަޔަކު މަޅީގައި ޖައްސާފައި އޭނާ ސަލާމަތްވުމަށް ކަމަށް މޫސަ ވިދާޅުވިއެވެ.

އެމްޑީޕީ ތެރެއިން 300 ވޯޓު ނަޝީދަށް ނުލިބޭނެކަމަށް މޫސަ ވިދާޅުވިއިރު ނިމިދިޔަ އެމްޑީޕީގެ ޕްރައިމަރީގައިވެސް ރައީސް ނަޝީދު ވަނީ 15،000 އަށްވުރެ ގިނަ ވޯޓު ހޯއްދަވާފައެވެ. އަދި ފިކުރެއްގެ ދިރުމުގެ ނަމުގައި ހިންގާ ހަރަކާތާއި މިހާތަނަށް 50،000 މީހުން ގުޅިފައިވާކަމަށް އެހަރަތުގެ އިސްބޭފުޅުން ދަނީ ވިދާޅުވަމުންނެވެ.