އިދިކޮޅު ކޯލިޝަނުން ކުރިއަށްގެންދިޔަ މުޒާހަރާއެއްގެ ތެރެއިން ރައީސް އިބްރާހިމް މުހައްމަދު ސޯލިހުގެ މޮޓޯކޭޑަށް ހުރަސް އެޅުމުގެ ތުހުމަތުގައި ހައްޔަރުކުރި މުހައްމަދު އައްބާސްގެ ބަންދަށް ފަސް ދުވަސް ޖަހައިފިއެވެ.
މިދިޔަ ހޯމަ ދުވަހުގެ ރޭ މާލޭގައި އިދިކޮޅު ޕީޕީއެމުން ބޭއްވި މުޒާހަރާގެ ތެރެއިން ރައީސްގެ މޮޓޯކޭޑަށް ހުރަސް އެޅި މައްސަލާގައި ބައެއް މީހުން ކުރިން ވަނީ ހައްޔަރުކޮށްފައެވެ. އެ މައްސަލާގައި އިއްޔެ ހައްޔަރުކުރީ ޕީޕީއެމްގެ އެކްޓިވިސްޓެއް ކަމަށްވާ މުހައްމަދު އައްބާސެވެ.
އޭނާގެ ބަންދަށް ހުޅުމާލޭ މެޖިސްޓްރޭޓް ކޯޓުން މިއަދު ފަސް ދުވަސް އިތުރުކޮށްދީފައިވާ ކަމަށް ޕީޕީއެމުން ބުންޏެވެ. އޭނާއާ އެކު ޖުމްލަ ފަސް މީހަކު މިހާތަނަށް ވަނީ ހައްޔަރުކޮށްފައެވެ. އެ އެންމެން ވެސް ތިބީ ބަންދުގައެވެ.
ރައީސްގެ މޮޓޯކޭޑަށް އިދިކޮޅު މުޒާހަރާގެ ބައިވެރިން ހުރަސްއެޅީ މާޗު 20، ވަނަ ދުވަހުގެ ރޭ 11:00 ހާއިރު ރައީސް ސޯލިހުގެ ދެކަނބަލުން، ބައިނަލްއަގުވާމީ އަންހެނުން ދުވަސް ފާހަގަކުރުމަށާއި ރެހެންދި އެވޯޑު ދިނުމަށް ހުޅުމާލޭގައި އޮތް ހަފުލާއަށްފަހު މާލެ ވަޑައިގެންނެވި ވަގުތުގައެވެ.
އެކަމާ ގުޅިގެން ޕްރެޒިޑެންޝަލް ގާޑްސްގެ ކޮމާންޑިން އޮފިސަރު ވަނީ ވަޒީފާއަށް ނުކުތުން މަނާކޮށް، ކަންތައް ހިނގައިދިޔަ ގޮތް ބެލުމަށް ސީރިއަސް ތަހުގީގެއް އެމްއެންޑީއެފުން ވަނީ ފަށާފައެވެ. އެމްއެންޑީއެފްގެ އެތެރޭގެ ތަހުގީގެއްގެ އިތުރުން، އެ ހާދިސާގައި އިހުމާލުވި ފަރާތެއް ބެލުމަށް ރައްޔިތުންގެ މަޖިލީހުގެ ސަލާމަތީ ހިދުމަތްތަކާބެހޭ (241) ކޮމިޓީން ވެސް ވަނީ ނިންމައިފައެވެ.
