ޝަރީޢަތް ނިމެންދެން މީހުން ބަންދުކުރުމުގެ ސަގާފަތެއް ރާއްޖޭގެ ކޯޓުތަކުން ކުރިއަށް ގެންދާތީ އެ ސަގާފަތަށް ނިމުމެއް ގެނެސް ދިނުމަށް މޯލްޑިވްސް ނޭޝަނަލް ޕާޓީ (އެމްއެންޕީ)އިން ރައީސުލްޖުމުހޫރިޔާގެ ކިބައިން އެދިވަޑައިގެންފިއެވެ.
މިގޮތުން އެމްއެންޕީން ރައީސް ސާލިހަށް އެޑްރެސްކޮށް ފޮނުވި ސިޓީއެއްގައި ވިދާޅުވެފައިވަނީ، ޝަރީޢަތް ނިމެންދެން ބަންދުކުރެވޭ ފަރާތްތަކުގެ މައްސަލަތައް އަވަހަށް ނިންމަވާ ދެއްވުމަށާއި، ޖިނާއީ އިޖުރާއަތުގެ ޤާނޫނުގެ 60 ވަނަ މާއްދާގެ (ވ) ގައި ކަނޑައަޅާފައިވާ އިޖުރާއަތް ހިންގޭނެ ފަހި އިންތިޒާމްތަކެއް ފަނޑިޔާރުގެއަށް ފަހިކޮށްދެއްވައިގެން، ބަންދުގައިވާ މީހުންނަށް އިޖުރާއީ އިންސާފު ލިބޭނެ ގޮތް ހަމަޖައްސަވާ ދެއްވުމަށެވެ.
މިގޮތުން، މިކަން ހުށަހަޅައި އެ ޕާޓީން ރައީސް ސާލިހަށް ފޮނުވި ސިޓީގައި ވިދާޅުވެފައިވަނީ، ޖިނާއީ އިޖުރާއަތުގެ ޤާނޫނުގެ 60 ވަނަ މާއްދާ ކޯޓުތަކުން މަނާ ކޮށްވާފައިވާ ގޮތަށް ބަލާ، މިމައްސަލައަކީ ޤާނޫނީ އަދި އިދާރީ ހައްލުތަކެއް ބޭނުންވާ މައްސަލައެއް ކަމަށް ފާހަގަ ކުރެވޭ ކަމަށެވެ. މީގެ އިތުރުން، މިއީ ރައްޔިތުންގެ އަސާސީ ޙައްޤާއިވެސް ގުޅިފައިވާ ކަމަކަށްވާތީ، މި މަސައްކަތަކީ ދައުލަތުގެ އެންމެ އިސްވެރިޔާ ހައިސިއްޔަތުން ރައީސުލްޖުމްހޫރިއްޔާ އަދާކުރަންވަން ޖެހިވަޑައިގަންނަވާ މަސްއޫލިއްތެއް ކަމަށް އެޕާޓީން ދެކޭކަމަށްވެސް ސިޓީގައި ބަޔާން ކޮށްފައި ވެއެވެ. މިމައްސަލާގައި އެމްއެންޕީން ރައީސް ސާލިހަށް ފޮނުވި ސިޓީގައި ކަމާ ގުޅުންހުރި ގިނަ ނުކުތާތަކެއް ފާހަގަކޮށްފައި ވެއެވެ. އޭގެ ތެރޭގައި މިވާ ނުކުތާތައް ފާހަގަކޮށްލަމެވެ.
- ޝަރީޢަތް ނިމެންދެން ބަންދުކުރެވިފައި ގާތްގަނޑަކަށް 343 މީހަކު ޖަލުތަކުގެ ހައްޔަރުގައި ތިބިއިރު ޖިނާއީ އިޖުރާއަތުގެ ޤާނޫނުގެ 60 ވަނަ މާއްދާގެ (ވ) ގެ ދަށުން އެ ފަރާތްތަކުގެ ބަންދު ކޮންމެ 30 ދުވަހަކުން މުރާޖައާ ކުރުމުގެ އަޑުއެހުން ފަނޑިޔާރުގޭގައި ނުހިނގާތީ މިދެންނެވި އެންމެހާ ފަރާތްތަކަށް އިޖުރާއީ އިންސާފު ލިބުމުގެ މަގު ބަންދުވެފައި ވާކަން. އަދި، އޭގެ ތެރެއިން ބައެއް މިހުންގެ ޝަރީޢަތް ނުހިނގާ އަހަރުތަކަކަށް ދިގުދެމިގެން ގޮސްފައިވުމުން، މިއީ ބޮޑު މައްސަލައެއްކަމަށް ބެލެވޭތީ، އިޖުރާއީ އިންސާފުން މީހުން އެއްފަރާތް ކުރެއްވޭނެ ޤާނޫނީ ހަމައެއް ނޫންކަން.
- މި މައްސަލައާ ގުޅިގެން 7 މާރޗް 2023 ގައި ރައްޔިތުންގެ މަޖިލީހުގައި ދާޚިލީ ވަޒީރާ ސުވާލު ކުރެއްވުމުން ވެސް މީގެ އަޞްލު މައްސަލަ ޙައްލު ކުރެއްވުމަށް އެއްވެސް މަސައްކަތެއް ކުރެއްވި ވާހަކައެއް ވިދާޅުވެފައި ނުވާކަން.
- މި ފަރާތްތަކުގެ ޙައްޤުތައް ރައްކާތެރިކޮށްދިނުމުގެ މުހިންމުކަން ރައްޔިތުންގެ މަޖިލީހަށާއި ޕްރޮސިކިއުޓަރ ޖެނެރަލްގެ އޮފީސް ފަދަ ދައުލަތުގެ މުއައްސަސާތަކަށް ފެނިގެން، އެފަރާތްތަކުން މިކަން ޙައްލުކުރުމަށް މަސައްކަތްތަކެއް ކުރައްވާފައިވާކަން. އެހެންނަމަވެސް، ރައްޔިތުންގެ އަސާސީ ޙައްޤުތަކަކާއި ގުޅިފައިވާ މި މައްސަލައަށް އަދިވެސް ޙައްލެއް ގެނެވިފައެއް ނުވާކަން.
މީގެ އިތުރުންވެސް، އެމްއެންޕީން ރައީސަށް ފޮނުވި ސިޓީގައި ވިދާޅުވެފައިވަނީ، މިމިކަމާ ގުޅެގޮތުން ޕްރޮސެކިއުޓަރ ޖެނެރަލް ނޫސް ކޮންފެރެންސެއްގައި ނާއުންމީދު ވާހަކަފުޅުތަކެއް ދައްކަވާފައިވުމުން ދޭހަކޮށްދެނީ ބާރުހިނގާ ދައުލަތެއްގެ އިންތިޒާމްތައް ދާން ނުޖެހޭހާ ދެރަވަރު ޙާލަތަކަށް ގޮސްފައިވާ ކަމަށް ކަމަށެވެ.
އެހެންކަމުން ބަންދުގައިވާ ފަރާތްތަކަށް އިޖުރާއީ އިންސާފު ލިބިދެވޭނެ މަގެއް ވީހާވެސް އަވަހަށް ފަހި ކޮށްދެއްވުމަށް އެމްއެންޕީންގެ ރައީސުލްޖުމުހޫރިއްޔާގެ އަރިހުން އެދިފައި ވެއެވެ.
ކޮމެންޓު ފޮނުވާ