ސަރުކާރެއް ފެއިލްވެ ވެއްޓެމުންދާއިރު ފެންނާނެ ހުރިހާ ސިފަތަކެއް މިސަރުކާރުގެ ތެރެއިން ފެންނަމުންދާ ކަމުގައި ކުރީގެ ޑިފެންސް މިނިސްޓަރ އާދަމް ޝަރީފް އުމަރު ވިދާޅުވެއްޖެއެވެ.
އިދިކޮޅު ކޯލިޝަނުން ކަނޑުމަތީގައި ކުރަމުންދާ އިޚުތިޖާޖުގައި ވާހަކަ ދައްކަވަމުން މަޑުއްވަރީދާއިރާގެ މެމްބަރު އާދަމް ޝަރީފް ވިދާޅުވީ ސަރުކާރެއް ފެއިލްވެ ނިކަމެތިވެ، ރައްޔިތުންގެ އިތުބާރު ގެއްލި، ވެއްޓެމުންދާ ހާލަތުގައި ފެންނާނެ ހުރިހާ ސިފަތަކެއް މިސަރުކާރުން ފެންނަމުން ދާކަމަށެވެ. އަންހެނުންނަށް އަނިޔާ ކުރުމާއި، ޖިންސީ ފުރައްސާރައާއި، ކުޑަކުދިންގެ އިއްފަތްތެރިކަމަށް އަރައިގަތުން ފަދަ އިންސާނިއްޔަތާއި ޚިލާފް އެތައް ކަމެއް އާންމުވެ މުޖުތަމައުގެ އާންމު ރައްކާތެރިކަން ގެއްލިފައިވާކަމަށް އާދަމް ޝަރީފް ވިދާޅުވިއެވެ.
މިއަދު ފެނިގެންދަނީ ޤައުމުގައި ވައްކަމާއި ފޭރުމާއި، ދީނާއި ޚިލާފް އެތައްކަމެއް ކުރުމުގެ މަންޒަރުތައް ކަމަށާއި، ރާއްޖޭގައި އޮތް އިސްލާމީ ވަހުދަތާއި، ދިވެހިންގެ އެއްބައިވަންތަކަން މިއަދު ނެތިގެން ގޮސްފައިވާކަމަށް އާދަމް ޝަރީފް ވިދާޅުވިއެވެ.
މިއަދު ފެނިގެންދަނީ ސަރުކަރެއް ބަލިކަށިވެ ވެއްޓިގެންދާއިރު ފެންނާނެ ހުރިހާ ސިފައެއް މިސަރުކާރުގެ ތެރެއިން. ރޭޕް ކުރުން އާންމު ވެއްޖެ، ޖިންސީ ފުރައްސާރައާއި، ލާއިންސާނީ އަމަލުތަކާއި، ވައްކަމާއި ފޭރުން އާންމުވެއްޖެ. މިކަންކަމަށް ހައްލެއް ނުލިބޭ. މިއީ ސަރުކާރެއް ފެއިލްވެ ވެއްޓެމުންދާއިރު ފެންނާނެ ސިފަތައް.
– އާދަމް ޝަރީފް ވިދާޅުވިއެވެ.
އާދަމް ޝަރީފް ވިދާޅުވީ މިސަރުކާރުން މިއަދު ރައްޔިތުންގެ އިތުބާރު ގެއްލުމުން އެކަމުގެ ހަސަދައާއި ރުޅިވެރިކަން ބާލަމުންދަނީ ރައީސް ޔާމީނަށް ކަމަށެވެ. ނަމަވެސް މިސަރުކާރަކީ ހުރިހާ ބާރެއް ލިބި ވެރިކަން ކުރުމަށް ފުރުސަތު ލިބުމުން ރައްޔިތުންނަށް އަނިޔާވެރިވެ ރައްޔިތުންގެ ހައްގުތައް ނިގުޅައިގެންފައިވާ ސަރުކާރެއްކަމަށެވެ.
އިދިކޮޅު މިއަދު ކަނޑުމަތީގައި ކުރާ އިހުތިޖާޖުގައި ގިނަބަޔަކު ބައިވެރިވަމުންދާއިރު، ޕީޕީއެމް ޕީއެންސީގެ ކޯލިޝަންގެ އިސްކޮށް ހަރަކާތްތެރިވާ ބޭފުޅުންވަނީ ދޭތެރެ ދޭތެރެއިން ރައްޔިތުންނާއި މުހާތަބުކޮށް ވާހަކަ ދައްކަމުންނެވެ.
ކޮމެންޓު ފޮނުވާ