މިއަހަރު ބާއްވާ ރިޔާސީ އިންތިޚާބާއި ގުޅޭގޮތުން އެމްޑީޕީގެ ފަރާތުން އެހެން ސިޔާސީ ޕާޓީތަކާއި މަޝްވަރާކުރެވޭނީ އެމްޑީޕީގެ ރިޔާސީ ކެނޑިޑޭޓް ކަނޑައަޅާ ބަޔަކަށް ކަމުގައި ރައްޔިތުންގެ މަޖިލީހުގެ ހުޅުމާލެ ދާއިރާގެ މެމްބަރު އަލީ ނިޔާޒު ވިދާޅުވެއްޖެއެވެ.
އަލީ ނިޔާޒު މިހެން ވިދާޅުވީ އެމްޑީޕީގެ ރައީސް މުހައްމަދު ނަޝީދުގެ ފެކްޝަނުގައި އިސްކޮށް ހަރަކާތްތެރިވާ ހެންވޭރު ހުޅަނގު ދާއިރާގެ މެމްބަރު ހަސަން ލަތީފާއި އެސްޓީއޯގެ އެމްޑީ ހުސައިން އަމްރު ރައީސް ނަޝީދުގެ މަންދޫބުންގެ ގޮތުގައި އެމްޑީޕީ ތަމްސީލުކުރާ ގޮތަށް ޖޭޕީއާއެކު މަޝްވަރާ ބައްދަލުވުމެއް ރޭބޭއްވުމާއި ގުޅިގެން ކުރެއްވި ޓުވީޓެއްގައެވެ.
އަލީ ނިޔާޒު ވިދާޅުވީ އެމްޑީޕީގެ ފަރާތުން ކުރިއަށް އޮތް ރިޔާސީ އިންތިޚާބުގައި ޕާޓީތަކާއި މަޝްވަރާކޮށް ކޯލިޝަން ހެދުމުގެ ބާރު ޕާޓީގެ ރިޔާސީ ކެނޑިޑޭޓަށް ދީފައިވާކަމަށެވެ. ކޯލިޝަން ހެދުމާއި ގުޅޭގޮތުން އެމްޑީޕީން ބާއްވާ މަޝްވަރާތަކުގައި ބައިވެރިވާ ހަމައެކަނި ޕާޓީގެ ރިޔާސީ ކެނޑިޑޭޓް ކަނޑައަޅާ މަންދޫބުން ކަމަށް އަލީ ނިޔާޒު ވިދާޅުވިއެވެ.
ރިޔާސީ އިންތިޚާބާ ގުޅޭ އެންމެހާ މަޝްވަރާތައް އެމް.ޑީ.ޕީ ގެ ފަރާތުން ކުރުމުގެ އެންމެހާ ބާރެއް ޕާޓީގެ ރިޔާސީ ކެންޑިޑޭޓްއަށް ޤައުމީ މަޖްލިސްގެ އިން ވަނީ ދީފަ. މިކަމަށް ޕާޓީގެ ފަރާތުން މަންދޫބުން ކަނޑައަޅާނީވެސް ރިޔާސީ ކެނޑިޑޭޓް. އެކަން ހުރިހާ ޕާޓީތަކަށްވެސް އެނގޭނެ.
– އަލީ ނިޔާޒު ވިދާޅުވިއެވެ.
މިހާރު ހިނގަމުންދާ ސަރުކާރުގެ ކޯލިޝަންގެ މެމްބަރަކަށް ޖޭޕީވި ނަމަވެސް ސެޕްޓެމްބަރު 9، ގައި ބާއްވާ ރިޔާސީ އިންތިހާބަށް ރައީސް ސޯލިހާއެކު ކޯލިޝަން ހަދަން އެ ޕާޓީން އެއްބަހެއް ނުވި އެވެ. އޭގެ ބަދަލުގައި ޖޭޕީން ނިންމީ އެ ޕާޓީ އިސްވެ އޮވެ ހަދާ ކޯލިޝަނަކުން ރިޔާސީ އިންތިހާބަށް ނިކުތުމަށެވެ.
ރޭގެ ބައްދަލުވުމަށްފަހު ނޫސްވެރިންނަށް މައުލޫމާތު ދެއްވަމުން ޖޭޕީގެ ނައިބު ލީޑަރު އަމީން އިބްރާހިމް ވިދާޅުވީ ރައީސުލްޖުމްހޫރިއްޔާ އިބްރާހިމް މުހައްމަދު ސޯލިހާއެކު ކޯލިޝަން ހެދުމަށް އެމަނިކުފާނު ދައުވަތު ދެއްވާފައި އޮތް ނަމަވެސް އެކަމަށް ޖަވާބެއް ދެވޭނީ މި ދައުރުގައި ކަންތައް ހިނގައިދިޔަ ގޮތް ރަނގަޅަށް ބެލުމަށްފަހު ކަމަށެވެ.
