އިންތިޚާބުތަކާއި ކުރިމަތިލާއިރު އެއްވެސް ސިޔާސަތެއް އެކުލަވާލުމެއްނެތި ވޯޓު ގަތުމަކީ އިންތިޚާބުތަކުން ބަލިވުމުގެ އެންމެ ބޮޑު އަސްލު ކަމުގައި އެމްޕީގެ ރައީސް މުހައްމަދު ނަޝީދު ވިދާޅުވެއްޖެއެވެ.
މިއަހަރުގެ ރިޔާސީ އިންތިޚާބުގައި ޖުމްހޫރީ ޕާޓީއާއިއެކު ކުރިއަށް ދިއުމަށްޓަކައި ރައީސް ނަޝީދަށް ތާއީދު ކުރައްވާ ބޭފުޅުންނައި ޖުމްހޫރީ ޕާޓީން މެނިފެސްޓޯ އެކުލަވާލުމަށް ސިޔާސަތުތައް އެކުލަވާލުމުގެ މަސައްކަތް ފަށައި ރޭ ވަނީ މަޝްވަރާ ބައްދަލުވުންތައް ފަށާފައެވެ. ރޭގެ ބައްދަލުވުމުގައި ރައީސް ނަޝީދުގެ ފަރާތްޕުޅުން ބައިވެރިވީ، ހަސަން ލަތީފާއި، އަމްރުއެވެ.
ރައީސް ނަޝީދުގެ ފިކުރެއްގެ ދިރުމުން ޖޭޕީއާއި އެކު މެނިފެސްޓޯގެ މަސައްކަތް ފަށާފައިވާއިރު، މިއަދު ރައީސް ނަޝީދު ވިދާޅުވީ އިންތިޚާބަކާއި ކުރިމަތިލާއިރު އެންމެ މުހިންމު ކަމަކީ ރަނގަޅު ސިޔާސަތުތަކެއް އެކުލަވާލުންކަމަށެވެ. އެހެން ނޫނީ ޖެހޭނީ ބޮޑު އަގުގައި ރައްޔިތުންގެ ވޯޓުތައް ވިޔަފާރީގެ އުސޫލުން ގަތުމަށް ކަމަށް ރައީސް ނަޝީދު ވިދާޅުވިއެވެ.
ސިޔާސީ ޕާޓީތަކުން ރިޔާސީ އިންތިޚާބަށް ކުރާ ދަތުރުގައި ތަންފީޒު ކުރުމަށް ވައުދުވާ ސިޔާސަތު އެކުލަވާލުމަކީ އެންމެ މުހިންމު ކަންތައް. ޓްރާސެޝަނަލް އުސޫލުން ވޯޓު ހޯދަން އުޅުމަކީ ވޯޓު ގަންނަން އުޅުން. އަޅުގަނޑު ދެކޭ ގޮތުގައި އެއީ ނާކާމިޔާބުގެ އަސްލު.
– ރައީސް ނަޝީދު ވިދާޅުވިއެވެ.
ރިޔާސީ އިންތިޚާބު މިނިވަންކަމާއި ހަމަހަމަ ކަމާއިއެކު ކުރިއަށް ގެންދެވޭނެ އުސޫލެއް ހަމަޖެއްސުމަށް މަޖިލީހުގެ އެކި ޖަލްސާތަކުގައިި ރައީސް ނަޝީދަށް ތާއީދުކުރާ މެމްބަރުން ދަނީ ގޮވާލަމުންނެވެ. ޚާއްސަކޮށް ސަރުކާރުގެ ނުފޫޒާއި، ބާރުވެރިކަން އިންތިހާބުގެ ތެރެއަށް ވައްދައި، ދައުލަތުގެ މުދާތައް ނަހަމަ ގޮތުގައި ބޭނުން ކުރުމުގެ ފުރުސަތު އެއްވެސް ކެނޑިޑޭޓަކަށް ލިބިގެން ނުވާނެކަމަށް އެމެމްބަރުން ދަނީ ގޮވާލަމުންނެވެ.
ރިޔާސީ އިންތިޚާބުގައި ރައީސް ޞާލިހު އެމްޑީޕީގެ ޓިކެޓްގައި ވާދަކުރައްވާއިރު ރައީސް ނަޝީދު ގެންދަވަނީ ޖުމްހޫރީ ޕާޓީއާއިއެކު މަސައްކަތް ކުރުމަށް ތައްޔާރުވެ ކޯލިޝަން ހެދުމަށް ތައްޔާރުވަމުންނެވެ.
