ސިޔާސީ ކަންކަމަށް ނުވަދެ ޤައުމީ މަސްއޫލިއްޔަތު އަދާކުމަށް ޑިފެންސް މިިނިސްޓަރ މާރިޔާ ދީދީ ސިފައިންނަށް ގޮވާލައިފިއެވެ.
މޯލްޑިވްސް ނޭޝަނަލް ޑިފެންސް ފޯސް (އެމްއެންޑީއެފް) ކޯސްޓްގާޑުގެ ސެއިލަރުން ތަމްރީނު ކުރުމަށް ހިންގި ވިހި ވަނަ ކޯސްޓްގާޑް ބޭސިކް ކޯހުގެ ދަސްވެނިވުމުގައި ސިފައިންނާއި މުޚާތަބް ކުރައްވައި ވާހަކަ ދައްކަވަމުން މިނިސްޓަރ މާރިޔާ ވިދާޅުވީ ރާއްޖޭގެ ޖުމްހޫރިއްޔާގެ މިނިވަންކަމާއި، އިސްތިޤްލާލާއި ސިޔާދަތު ހިމާޔަތްކޮށް ދިފާޢުކޮށް ބެލެހެއްޓުމަކީ، ޖުމްލަކޮށް މުޅި އަސްކަރިއްޔާގެ އެންމެ މުހިންމު ޒިންމާ ކަމަށެވެ.
މިނިސްޓަރ ވިދާޅުވީ ސިފައިންގެ ކޮންމެ މީހެއްގެވެސް ޢަޒުމަކަށް ވާންޖެހޭނީ، ކޮންމެ ސަރވިސްއަކަށް ނިޞްބަތްވިޔަސް ތިމާއަކީ ސިފައިންގެ މީހަކަށްވީތީ، ސިފައިންގެ އަސްކަރީ އަޚްލާޤާއި އަސްކަރީ އުޞޫލުގެ މަތީގައި އަބަދުވެސް ދެމިހުރުން ކަމަށެވެ. ދިވެހި އަސްކަރިއްޔާއަކީ ވަރަށް ގިނަ ޒިންމާތަކެއް ޙަވާލުކޮށްފައިވާ ބަޔަކަށް ވާއިރު، އެއިން ކޮންމެ ޒިންމާއެއް އަދާކުރުމުގައިވެސް، އެކަމުގައި އެކުލެވޭ ގޮންޖެހުންތައް ދެނެގަނެ، މަސައްކަތަށް ހުނަރުވެރިވެ، ރޭވުންތެރިކަމާ، ފަރުވާތެރިކަމާއެކު އެ ޒިންމާއެއް އަދާކުރުމަށް ވަރަށް ޚާއްޞަ ސަމާލުކަމެއް ދޭންޖެހޭނެކަމަށް މިނިސްޓަރ ވިދާޅުވިއެވެ.
މިނިސްޓަރ ވިދާޅުވީ ސިޔާސީ ހަލަބޮލިކަމުގެ ތެރޭގައި ސެކިއުރިޓީ އޮޕަރޭޝަންތައް ހިންގާއިރު، ކޮންވެންޝަނަލް ގޮތްތަކުގެ އިތުރުން، އަވަސް އަވަހަށް ބަދަލުވާ ޙާލަތަށް ސިފައިންގެ ޙަރަކާތްތައްވެސް ބަދަލުކުރެވޭގޮތަށް ތައްޔާރުވެ ތިބުމަކީ ކޮމާންޑަރުންގެ ޒިންމާއެއް ކަމަށެވެ.
ހުރިހާ ލޮބުވެތި ސިފައިންނަށްވެސް އަޅުގަނޑު ހަނދާންކޮށްދޭން ބޭނުން. ސިފައިންގެ މަރުކަޒުތަކުގެ ގޭޓުން ނިކުތުމާއެކު، އެވަދެވުނީ ވަރަށް ވަރަށް ސިޔާސީ މާޙައުލަކަށް. އެކިކަހަލަ ވާހަކަތައް އެކި މަޤްޞަދުގައި އަބަދާ އަބަދު ދައްކަމުންދާނެ. ސިފައިންގެ އެއްވެސް މީހަކު އެފަދަ އެއްވެސް ވާހަކައެއްގައި ނުވަތަ ޢަމަލެއްގައި ޝާމިލްނުވެ، ތިމާއާއި ޙަވާލުވެފައިވާ ޤައުމީ މަސްއޫލިއްޔަތު އަދާކުމުގައި ސާބިތުވެ ހުރުމަށް އަޅުގަނޑު ނަޞޭޙަތްތެރިވަން.
– މިނިސްޓަރ ވިދާޅުވިއެވެ.
މާރިޔާ ވިދާޅުވީ ޕްރައިވެޓުން ފެށިގެން ސީނިއަރ ކޮމާންޑަރުންނާ ހަމައަށްވެސް، ސިފައިންގެ ކޮންމެ މީހެއްގެ ފަރާތުންވެސް ނޭދެވޭ ކަމެއް ހިނގިޔަސް، އެކަން ރައްދުވާނީ ހަމަ މުޅި އެމް.އެން.ޑީ.އެފް އަށް ކަމަށެވެ.
