ރައީސް އިބްރާހިމް މުހައްމަދު ސޯލިހާއި ފަސްޓްލޭޑީ ފަޒްނާ އަހުމަދު ރަސްމީ ކާރުކޮޅުގައި ވަޑައިގެންނަވަނިކޮށް އެމަނިކުފާނުގެ މޮޓޯކޭޑަށް ހުރަސްއެޅި މައްސަލާގައި ހައްޔަރުކުރި 4 މީހުން ބަންދުގައި ބައިތިއްބަން ކުރިމިނަލް ކޯޓުން އަމުރު ކޮށްފިއެވެ.
ފުލުހުން މީޑިއާތަކާއި ހިއްސާ ކޮށްފައިވާގޮތުން މި ހަތަރު މީހުންގެ ތެރެއިން 2 މީހެއްގެ ބަންދަށް 5 ދުވަސް ޖަހާދީފާއިވާއިރު އެއީ އަންހެނަކާއި ފިރިހެނަކާއި ކަމަށް ބުނެފައި ވެއެވެ.
އަދި ފުލުހުން ހައްޔަރު ކޮށްފައިވާ 4 މީހުންގެ ތެރެއިން ބާކީ ތިބި ދެމީހުންގެ ބަންދަށް ކުރިމިނަލް ކޯޓުން 15 ދުވަސް ޖަހައިދީފައި ވާކަމަށްވެސް ފުލުހުން ބުނެފައި ވެއެވެ.
ރައީސްގެ ޓޯކޭޑަށް ހުރަސްއެޅި މައްސަލާގައި ހައްޔަރު ކުރީ 4 ފިރިހެނުންކަމަށް މިއަދު ހެނދުނު ފުލުހުން ބުނެފައިވި ނަމަވެސް، މެންދުރުފަހު ފުލުހުން ހިއްސާކުރި މައުލޫމާތުގައި ބުނެފައިވަނީ އެއީ އޮޅުމެއް ކަމުގައެވެ.
ހަތިޔާރު އެޅި ސިފައިންނާއެކު އޮތް ރައީސް އިބްރާހީމް މުޙައްމަދު ޞާލިޙުގެ މޮޓޯކޭޑު ކުރިއަށް ދިޔަނުދީ އިދިކޮޅު އެކްޓިވިސްޓުން އެއަށް ހުރަސް އަޅައި ހުއްޓުވާފައިވަނީ ރޭގެ ވަގުތެއްގައި މޮޓޯކޭޑް ބޮޑުތަކުރުފާނު މަގުން ދަތުރު ކުރަމުން ދަނިކޮށެވެ. ޕީޕިއެމް އޮފީސް ކައިރީ މުޒާހިރާ ކުރިޔަށް ދަނިކޮށް، ރައީސްގެ މޮޓޯކޭޑް އެސަރަހައްދު ދަތުރު ކުރީ ރޭ ހުޅުމާލޭގައި އޮތް އަންހެނުންގެ ދުވަހުގެ ރަސްމީ ޖަލްސާއަށްފަހު އެބުރިވަޑައިގަތް މަގުމަތީގައެވެ.
ރައީސްގެ މޮޓޯކޭޑް ދަތުރުކުރަމުން ދިޔައީ މުލީއާގެއަށް ދިއުމަށެވެ. ރައީސް ޔާމީންގެ ގެކޮޅާއި ޕީޕީއެމް އޮފީސް ހުންނަ ސަރަޙައްދަށް މޮޓޯކެޑް އައުމާއެކު އިދިކޮޅު އެކްޓިވިސްޓުންވަނީ މުޒާހަރާކޮށް ރައީސް ޔާމީން މިނިވަންކުރަން ގޮވާލައި އަޑުގަދަކޮށްފައެވެ. އަދި ރައީސް ޞާލިޙުގެ އިސްތިއުފާއަށް ގޮވާ މޮޓޯކޭޑު ހުއްޓުވާފައިވެއެވެ.
ރޭގެ މުޒާހަރާގައިވެސް ނިސްބަތުން ތިބީ މަދު ބައެކެވެ. އެހެންނަމަވެސް އެމީހުން ކޮންޓްރޯލްކޮށް އެމަގުން ރައީސްގެ މޮޓޯކޭޑަށް ދެވޭގޮތެއް ނުވިއެވެ. މޮޓޯކޭޑާއެކު ދަތުރުކުރާ ހަތިޔަރު އެޅި ސިފައިންވެސް ތިއްބެވެ. އެހެންނަމަވެސް ރައީސްގެ މޮޓޯކޭޑުވަނީ އައިކޮޅަށް އަނބުރާލާފައެވެ.
ރައީސް ޔާމީން މިނިވަންކުރަން ގޮވާލާ ރޭ ކުރިމުޒާހަރާ އިން 20 މީހަކު ހައްޔަރު ކުރިކަމަށް ޕިޕީއެމްއިން ބުނެއެވެ.
