ރައީސް އިބްރާހިމް މުހައްމަދު ސޯލިހްގެ މޮޓޯކޭޑަށް ހުރަސްއަޅައި ހުއްޓުވި މައްސަލާގައި ރައީސްގެ ސެކިއުރިޓީ ކޮމާންޑިންގެ އިސްވެރިއާގެ މަގާމުގައު ހުންނެވި ކާނަލް އަބްދުﷲ އިބްރާހިމް މިއަދު ސަސްޕެންޑް ކޮށްފި އެވެ.
މައުލޫމާތު ލިބިފައިވާ ގޮތުގައި ކާނަލް އަބުދުﷲ އިބުރާހިމް ސަސްޕެންޑް ކުރުމަށްފަހު ރައީސްގެ ސެކިއުރިޓީއާއި ގުޅޭ އެންމެހާކަމެއް ބެލެއްހެއްޓުމާއި މިހާރު ހަވާލުކޮށްފައިވާ އިސްވެރިޔަކީ ޑެޕިއުޓީ ކޮމާންޑަރު އަހުމަދު ހަލީމެވެ.
ރައީސްގެ ސެކިއުރީޓީ ކޮމާންޑިންގެ އިސްވެރިޔާ ސަސްޕެންޑް ކުރުމާއި ގުޅޭގޮތުން އެމްއެންޑީއެފްއިން އަދި އެއްވެސް އެއްޗެއް ހާމަކޮށްފައެއް ނުވެއެވެ.
ރައީސުލްޖުމްހޫރިއްޔާގެ މޮޓޯކޭޑަށް ހުރަސް އަޅައި ހިންގި ހަމަނުޖެހުމާއި ގުޅިގެން ރޭގެ މުޒާހަރާ ތެރެއިން ހައްޔަރު ކުރި މީހުންގެ ތެރޭގައި ނައިފަރު ދާއިރާގެ މެމްބަރު އަހުމަދު ޝިޔާމް ވެސް ހިމެނެއެވެ. ނަމަވެސް އޭނާ ވަނީ ރޭ ދޫކޮށްލާފައެވެ. މިހަމަނުޖެހުންތަކުގައި ހައްޔަރު ކުރި ގިނަ މީހުން އަދިވެސް ތިބީ ފުލުހުންގެ ބަންދުގައެވެ.
ރައީސް އިބްރާހިމް މުހައްމަދު ސޯލިހުގެ މޮޓޯކޭޑަށް ހުރަސްއަޅަން ފުރުސަތު ދިނުމަކީ އެމަނިކުފާނަށް ދޭ ސެކިޔުރިޓީ ފެއިލްވުން ކަމަށާއި އެކަމުގެ ޒިންމާ ޑިފެންސް މިނިސްޓަރު މާރިޔާ އަހުމަދު ދީދީ ނަންގަވަންޖެހޭ ކަމަށް ބުނެ، އޭނާ މަގާމުން ވަކިކުރަން ގޮވާލައި ޕީޕީއެމް އިން ހުށަހެޅި ކުއްލި މައްސަލަ މިއަދު މަޖިލީހުން ވަނީ ބޭރުކޮށްލާފައެވެ.
ރައީސް އިބްރާހިމް މުހައްމަދު ސޯލިހްގެ މޮޓޯކޭޑަށް ހުރަސްއަޅައި ހުއްޓުވި މައްސަލަ ރައްޔިތުންގެ މަޖިލީހުގެ ގައުމީ ސަލާމަތާ ބެހޭ ކޮމިޓީންވެސް ވަނީ ބަލަން ނިންމާފައެވެ.
ކޮމެންޓު ފޮނުވާ