ރައީސް މުހައްމަދު ނަޝީދު "ކިއްލާ މާލޭ" ފޮތް އަންނަ ހޯމަ ދުވަހު ނެރުމަށް ނިންމައިފިއެވެ.
އޯޝަން ޕަބްލިޝާސްގެ ވެބްސައިޓްގައި ވާގޮތުން އަންނަ ހޯމަ ދުވަހުގެ ރޭ 8:15 ގައި ގައުމީ ޔުނިވަސިޓީގައި ބޭއްވޭ ހާއްސަ ހަފުލާއެއްގައި މި ފޮތް ނެރުމަށް ވަނީ ހަމަޖެހިފައެވެ.
"ކިއްލާ މާލޭ" ނެރުމުގެ ހަފުލާ އަށް ދައުވަތު ދެއްވައި ރައީސް ނަޝީދު ކުރައްވާފައިވާ ޓްވީޓްގައި ވިދާޅުވީ، މި ފޮތަކީ ފުރަމާލޭގައި ޒަމާނުއްސުރެ ދިރިއުޅެމުން އައި އާއިލާތަކާއި އެ އާއިލާތަކުގެ މަތިކޮޅާ ގުޅޭ ގޮތުން އެ މަނިކުފާނު ކުރެއްވި އާ ދިރާސާއެއްގެ މައްޗަށް ލިޔެ ނެރުއްވާ ފޮތެއްކަމަށެވެ. އެހެންކަމުން މި ފޮތުގައި ކުރީގެ ހާލަތު ދައްކުވައިދޭ ކުރެހުންތަކެއް ވެސް ހިމަނާފައިވާނެކަމަށް އެމަނިކުފާނު ވިދާޅުވެފައިވެއެވެ.
މަޖިލީހުގެ ރައީސް ނަޝީދު ކުރިން ވެސް ފޮތްތަކެއް ނެރުއްވާފައިވެ އެވެ. އެގޮތުން އެންމެ ފަހުން ނެރުއްވީ 2020 ވަނަ އަހަރުގައި "ދެ ރަދުން" ފޮތެވެ. މީގެ އިތުރުން 2018 ގައި "އެއްބަސްވެވޭ އިންގިލާބު" އަދި 1996 ގެ "ދަގަނޑު ދަހަނާ" ގެ ނަމުގައި ވެސް ފޮތެއް ނެރުއްވިއެވެ. އަދި 1953 ވަނަ އަހަރު ކުރީގެ ރައީސް މުހައްމަދު އަމީނުގެ ވެރިކަން އިންގިލާބުކޮށްލި ހާދިސާ އަށް "ވެރިއެއްގެ ނިމުން" ނަމުގައި ދިރާސާއެއް ކުރައްވައި ޝާއިއުކުރެއްވިއެވެ.
