މީގެ ކުރީގައި މަސްބައިއަޅާ ބަހާ އުސޫލުން ސިޔާސީ ބޮޑުންގެ މެދުގައި ވޯޓު ބަހި ކަމުގައި ވީނަމަވެސް މިހާރަކު އެގޮތަކަށް ވޯޓު ބަހައި ނުލެވޭނެކަމަށް ހޯމް މިނިސްޓްރީގެ ސްޓޭޓް މިނިސްޓަރ އަދި އަދާލަތު ޕާޓީގެ އިލްމުވެރިންގެ މަޖިލީހުގެ މެމްބަރު އަލީ ނަޒީރު ވިދާޅުވެއްޖެއެވެ.
އޭނާ މިހެން ވިދާޅުވީ ރައީސް އިބްހިރާމް މުހައްމަދު ޞަލިހުގެ ސަރުކާރުން ވެފައިވާ ވައުދުތަކުގެ ތެރެއިން ފުއްދިފައިވާ ބައެއްކަންކަމުގެ މިސާލާއިއެކުގައެވެ. ސިޔާސީ ގޮތުން ރައީސް ޞާލިހާއިއެކު ކުރިއަށް އޮތް ރިޔާސީ އިންތިޚާބުގައި ކުރިއަށްދާން ނިންމާފައިވާ އަދާލަތު ޕާޓީން ދަނީ ރިޔާސީ ކެމްޕެއިންގެ މަސައްކަތްވެސް ކުރަމުންނެވެ.
ރިޔާސީ އިންތިޚާބު ބޮޑު ކޯލިޝަނަކާއިއެކު ކާމިޔާބު ކުރުމަށް ރައީސް ޞާލިހު ކުރަމުންދިޔަ އުންމީދަށް ފަނޑުކަން އައީ ޖުމްހޫރީ ޕާޓީން ވަކިން އިންތިޚާބުގައި ވާދަކުރަން ނިންމި ހިސާބުންނެވެ. ޖޭޕީން ކެނޑިޑޭޓަކު ނެރެން ނިންމުމަކީ ރައީސް ޞާލިހަށް އޮތް ގޮންޖެހުމެއް ނޫންކަމަށް ރައީސް އޮފީހުގެ ތަރުޖަމާނުވެސް ވަނީ ވިދާޅުވެފައެވެ.
އަލީ ނަޒީރު ވިދާޅުވި މާޒީގައި މަސްބައި އަޅާ ބަހާ އުސޫލުން ސިޔާސީ ބޮޑުންގެ މެދުގައި ވޯޓުތައް ބެހި ކަމުގައި ވީނަމަވެސް މިހާރަކު އެކަން ނުވާނެކަމަށެވެ. އޭނާ ވަނީ މިހާރު ސިޔާސީ ގޮތުން ވޯޓު ހޯދާނަމަ ކުރަންޖެހޭ ކަންކަމުގެ ލިސްޓެއް ހިއްސާ ކުރައްވާފައެވެ.
މިހާރަކު މަސްބައި އަޅާ ބަހާ އުސޫލުން ސިޔާސީ ބޮޑުންގެ މެދުގައި ވޯޓު ބަހައެއްނުލެވޭ! މިހާރު ހުންނަނީ؛ އަޑުގަދަ ގެދަބުޅި އިންޖީނުގެ އާވެ ރީތިވީމާ ދޭ ވޯޓު، ނަޖިސްފެނުން ސާފުފެނަށް ބަދަލުވީމާ ދޭ ވޯޓު، ޗަކަމަގު ތާރުމަގަށް ބަދަލުވީމާ ދޭ ވޯޓު، ބޯހިޔާވަހިކަމަށް ދޭ ވޯޓު، ބަނދަރަށް ދޭ ވޯޓު، އެއަރޕޯޓަށް ދޭ ވޯޓު.
– އަލީ ނަޒީރު ވިދާޅުވިއެވެ.
ރައީސް އޮފީހުގައި މިދިޔަ ހަފްތާގައި ބޭއްވި ނޫސްވެރިންގެ ބައްދަލުވުމުގައި މިއުވާން ވިދާޅުވީ، މިހާރުގެ ކޯލިޝަންގެ ތެރޭގައި، ދެ ރިޔާސީ ކެންޑިޓޭޓަކު ތިބެގެން، ސަރުކާރު ހިންގަން ދަތިވާނެ ކަމަށް ގަބޫލު ކުރެވޭ ކަމަށެވެ. މިއުވާން ވިދާޅުވީ، ރައީސަށް މުހިންމީ ރައްޔިތުންނަށް ހިދުމަތް ކުރުމާއި، ސަރުކާރު ހިންގުން ކަމަށާއި، އެކަމަށް އެއްބާރުލުންދެއްވާ ބޭފުޅުންނާއެކު ރައީސް ކުރިއަށް ވަޑައިގަންނަވާނެ ކަމަށެވެ.
