ކެޕިޓަލް މާކެޓް ޑިވެލޮޕްމަންޓް އޮތޯރިޓީ (ސީއެމްޑީއޭ) ގައި ރަޖިސްޓްރީ ނުކޮށް ހިންގާ އިންވެސްޓްމަންޓް އެކިއެކި ސްކީމްތަކުގައި ބައިވެރިވެގެން ގެއްލުން ލިބިފައިވާނަމަ ޝަކުވާ ހުށަހެޅުމަށް ސީއެމްޑިއޭއިން އެދިެއްޖެއެވެ.
ބައެއް އިންވެސްމަންޓް ސްކީމްތަކުގައި އާންމުން ބައިވެރިވެ، ބައެއް ފަރާތްތަކަށް ގެއްލުންވަމުންދާކަމުގެ ޝަކުވާ އިތުރުވެފައި ވަނިކޮށް، ސިއެމްޑީއޭއިން ނެރުނު ބަޔާނެއްގައި ބުނެފައިވަނީ، ސެކިއުރިޓީޒްގެ މުއާމަލާތުގެ ތެރޭގައި ހިމެނޭ އެއްވެސް ކަމެއް އެ މުވައްސަސާގެ ހުއްދައާ ނުލާ ނުހިންގޭނެކަން ކުރިންވެސް ހަނދާން ކޮށްދީފައި ވާކަމުގައެވެ.
ސީއެމްޑިއޭގެ ބަޔާނުގައިވަނީ އެފަދަ އެއްވެސް ސްކީމަކުން ގެއްލުން ވެފައިވާނަމަ މިމަހުގެ 30ގެ ކުރިން އެންގުމަށް އެދިފައެވެ. ސީއެމްޑީއޭގެ ބަޔާނުގައި ވާގޮތުން، ސެކިއިރިޓީސްގެ މާނާގައި ތެރޭގައި ފައިސާއިން ފައިދާ ހޯދުމަށްޓަކައި އިންވެސްޓް ކުރުމާއި އެފަދަ ހުރިހާ މުއާމަލާތްތަކެއް ހިމެނޭނެއެވެ.
ރަޖިސްޓްރީ ނުކޮށް ހިންގާ ސްކީމްތަކުން ގެއްލުންވާ ފަރާތްތައް އެ އޮތޯރިޓީއަށް އެންގުމަށް ސީއެމްޑީއޭއިން އެދިފައިވާއިރު، ފޭދޫ ދާއިރާގެ ކުރީގެ މެމްބަރު އަލްހާން ފަހުމީގެ މަސްލަހަތު އޮންނަ ކުންފުންޏަކުން ގިނަބައެއްގެ އަތުން ފައިސާ ނަގާއިގެން އިންވެސްޓު ކުރުމުގެ ނަމުގައި ހިންގި ސްކީމަކުން ގެއްލުންވެގެން ގިނަބަޔަކު މައްސަލަ ހުށަހަޅުމާއި ގުޅިގެން ފުލުހުން ދަނީ އެމައްސަލަ ތަހުގީވެސް ކުރަމުންނެވެ.
އެހެންނަމަވެސް އޭނާގެ އެ ކުންފުނިން މިހާރުވެސް ދަނީ އާންމުންނަށް ހުޅުވާލައިގެން އެފަދަ އާ ސްކީމްތައް ތައާރަފް ކުރަމުންނެވެ.
