ފިނޭންސް މިނިސްޓްރީގެ ކުރީގެ ފިނޭންސް ކޮންޓްރޯލާ މުހައްމަދު އަހުމަދު، މޯލްޑިވްސް ނެޝަނަލް ޕާޓީ (އެމްއެންޕީ) އަށް ސޮއި ކުރައްވައިފިއެވެ.
މުހައްމަދު އަހުމަދު އެމްއެންޕީއަށް ސޮއި ކުރެއްވުމަށްފަހު އޭނާގެ ފޯމު ހަވާލުކުރައްވާފައިވަނީ އެ ޕާޓީގެ ރައީސް މުހައްމަދު ނާޒިމްއާއެވެ. އަދި އޭނާވަނީ ނާޒިމް ފައިނޭންސް އެޑްވައިޒަރަކަށް ހަމަޖައްސަވާފައެވެ.
މުހައްމަދު އަހުމަދަކީ ވިޔަފާރީގެ ދާއިރާއިން މަތީ ތައުލީމު ހާސިލް ކުރައްވާފައިވާ ބޭފުޅެކެވެ. އެމެރިކަން ޔުނިވަސިޓީ އޮފް ބޭރޫތު (އޭޔޫބީ) ފުރަތަމަ ޑިގްރީ ހާސިލް ކުރައްވާ، އޭނާ މާސްޓާސް ޑިގްރީ ހާސިލް ކުރެއްވީ އިނގިރޭސިވިލާތުންނެވެ.
އޭނާވަނީ ފައިނޭންސް ކޮންޓްރޯލަރގެ އިތުރުން ސަރުކާރުގެ އެކި ކުންފުނިތަކުގެ އިސް މަގާމްތަކެއްވެސް ފުރުއްވާފައެވެ. މިގޮތުން އޭނާ ޑިރެކްޓަރުންގެ ބޯޑުގެ މެމްބަރުކަން ކުރައްވާފައިވާ ކުންފުނިތަކުގެ ތެރޭގައި ބޭންކް އޮފް މޯލްޑިވްސް (ބީއެމްއެލް)، މޯލްޑިވްސް އިސްލާމިކް ބޭންކް (އެމްއައިބީ)، މޯލްޑިވްސް އެއާޕޯޓްސް ކޮމްޕެނީ (އެމްއޭސީއެލް)، މޯލްޑިވްސް ޓްރާންސްޕޯޓް އެންޑް ކޮންޓްރެކްޓިން ކޮމްޕެނީ (އެމްޓީސީސީ)، ސްޓޭޓް ޓްރޭޑިން އޯގަނައިޒޭޝަން، (އެސްޓީއޯ)، މޯލްޑިވްސް އިންޑަސްޓްރިއަލް ފިޝަރީޒް ކޮމްޕެނީ (މިފްކޯ) ހިމެނެއެވެ.
މީގެ އިތުރުން ބައިނަލްއަގުވާމީ ބައެއް މާލީ އިދާރާތަކުގައިވެސް އޭނާވަނީ މަސައްކަތް ކުރައްވާފައެވެ.
