ސަރުކާރުގެ ތެރެއިން ޖުމްހޫރީ ޕާޓީ ބޭރުކުރުމުގެ ކުރިން ބޭރުކުރަން ޖެހޭނީ ރައީސް ޞާލިހާއި ދެކޮޅަށް ފުރަތަމަވެސް ހަނގުރާމަ އިއުލާންކުރި އެމްޑީޕީގެ ރައީސް މުހައްމަދު ނަޝީދުކަމަށް ރައްޔިތުންގެ މަޖިލީހުގެ ނޮޅިވަރަމް ދާއިރާގެ މެމްބަރު މުހައްމަދު ނަޝީދު (މޮސްޓާ) ވިދާޅުވެއްޖެއެވެ.
އޭނާ މިހެން ވިދާޅުވީ ސަރުކާރުގެ މަގާމް ތަކުގެ ތެރެއިން، ޖުމްހޫރީ ޕާޓީ (ޖޭޕީ)ގެ މެންބަރުން ފުރުއްވަމުންދާ މަގާމްތަކުން އެ މެންބަރުން ވަކިކޮށް އެ މަގާމްތައް ހުސްކުރަންޖެހޭ ކަމަށް އިހަވަންދޫ ދާއިރާގެ މެންބަރު މުހައްމަދު ޝިފާއު އިއްޔެގެ މަޖިލީހުގައި ދެއްކެވި ވާހަކަތަކަށް ރައްދު ދެއްވައި ކުރެއްވި ޓުވީޓެއްގައެވެ.
މޮސްޓާ ވިދާޅުވީ ޖުމްހޫރީ ޕާޓީއަކީ ރައީސް އިބްރާހިމް މުހައްމަދު ޞާލިހު ވެރިކަމަށް ގެނައުމަށް އެންމެބޮޑު މަސައްކަތެއް ކުރެއްވި އެއްބޭފުޅާކަމަށެވެ. ޤާސިމާއި، އެމްޑީޕީގެ ރައީސް މުހައްމަދު ނަޝީދުވެސް ރައީސް ޞާލިހު ވެރިކަމަށް ގެންނަން ދެކޮޅު ހައްދަވާއިރު ޤާސިމަށްވުރެ ބޮޑަށް ރައީސް ޞާލިހާއި ދެކޮޅަށް މަސައްކަތް ކުރައްވަނީ ނަޝީދުކަމަށް އޭނާ ވިދާޅުވިއެވެ. ކަންކަން މިހެން އޮތްއިރު ޤާސިމް ސަރުކާރުން ބޭރު ކުރުމުގެ ކުރިން ބޭރު ކުރަން ޖެހޭނީ ނަޝީދު ކަމަށް މޮސްޓާ ވިދާޅުވިއެވެ.
ފުރަތަމަ އިބްރާހިމް މުހައްމަދު ޞާލިހާއި ދެކޮޅަށް ހަނގުރާމަ އިއުލާނުކުރި މުހައްމަދު ނަޝީދު ބޭރުކޮށްބަލަ. އެއަށްފަހު މުހައްމަދު ޝީފާއުމެން ވާހަކަ ދައްކާ. މިވެރިކަން ގެނައީ އަންނި ނޫނަސް ޤާސިމް އިބްރާހިމްގެ ވެސް ހިއްސާ އާއެކު. ދެމީހުން ވެސް އިބޫ އަށް ދެވަނަ ދައުރެއް ދޭން ދެކޮޅު. ދެން ކީއްވެ ވަކި ޖޭޕީ.
– މޮސްޓާ ވިދާޅުވިއެވެ.
ރައީސް ނަޝީދަށް ދިން ބޮމުގެ ހަމަލާއަށްފަހު ރައީސް ޞާލިހާއި ނަޝީދާއި އޮތް ގުޅުން ވަނީ ވަރަށް ބޮޑަށް ހީނަރުވެފައެވެ. މިގުޅުން އިތުރަށް ގޯސްވެގެން ދިޔައީ ނިމިދިޔަ އެމްޑީޕީގެ ރިޔާސީ ޕްރައިމަރީއަށްފަހުގައެވެ. ނަޝީދުވަނީ ރައީސް ޞާލިހާއިއެކު ކުރާނެ ސިޔާސީ މަސައްކަތެއް ނޯންނާނެކަމަށް ތަކުރާރުކޮށް ވިދާޅުވެފައެވެ. އަދި ގެންދަވަނީ ފިކުރެއްގެ ދިރުމުގެ ނަމުގައި ވަކި ހަރަކާތެއް އެމްޑީޕީގެ ތެރޭގައި ހިންގަމުންނެވެ.
ރައީސް ނަޝީދުގެ ސިޔާސީ ނުފޫޒާއިހެދި ރައީސް ޞާލިހާއި އެމްޑީޕީގެ އިސް ބޭފުޅުންނަށް ނަޝީދާއި ދެކޮޅަށް މިހާތަނަށް އެއްވެސް ފިޔަވަޅެއް އަޅަން ކެރިފައި ނުވެއެވެ. ސަރުކާރުގެ ތެރޭގައި ތިބި ޖުމްހޫރީ ޕާޓީގެ މެމްބަރުން ވަކި ކުރުމަށް އެމްޑީޕީގެ ބައެއް މެމްބަރުން ގޮވާލި ނަމަވެސް ނަޝީދު ވިދާޅުވެފައިވަނީ ދައުރު ހަމަނުވަނީ ކޯލިޝަންގެ އެއްވެސް ވަޒީފާއެއްގައި ހުރި މީހަކު ވަކި ނުކުރެވޭނެކަމަށެވެ.
