ޖުމްހޫރީ ޕާޓީން ކުރިއަަށް އޮތް ރިޔާސީ އިންތިޚާބަށް ކެނޑިޑޭޓަކު ނެރެނީ ބައެއް ޕާޓީތަކުގެ އިސްވެރިންނާއި، އެތައް ރައްޔިތުންނެއްގެ އިލްތިމާސާއި އެކުގައިކަމަށް ޖުމްހޫރީ ޕާޓީގެ ނައިބް ލީޑަރު އަމީން އިބްރާހިމް ވިދާޅުވެއްޖެއެވެ.
ޖުމްހޫރީ ޕާޓީން އިއްޔެ ބޭއްވި ކައުންސިލް ބައްދަލުވުމުގައި ވަނީ ރިޔާސީ އިންތިޚާބުގައި އެޕާޓީން ކެނޑިޑޭޓަކު ނެރުމަށް ނިންމާފައި އެޕާޓީ އިސްވެ އޮވެ އުފައްދާ ކޯލިޝަން ވެރިކަމެއް ގާއިމް ކުރުމަށް ނިންމާފައެވެ. މިނިންމުމާއިއެމު މިހާރު ވެރިކަން ކުރާ ކޯލިޝަންގައި އޮތް ޖުމްހޫރީ ޕާޓީއަށް ބޮޑު ޕްރެޝަރަކާއި ވަނީ ކުރިމަތިވެފައެވެ.
އެންމެބޮޑު ޕްރެޝަރަކީ މިހާރު ސަރުކާރުގެ އެކި މަޤާމުތަކުގައި ތިބި ޖޭޕީގެ ބޭފުޅުން މަޤާމުތަކުން ވަކިކުރުމަށް ކުރަމުންދާ ޕްރެޝަރެވެ. ނަމަވެސް ޤާސިމް ވިދާޅުވީ މިސަރުކާރާއިއެކު އެއްބަސްވީ ފަސް އަހަރުދުވަހުގެ މުއްދަތަކަށް ކަމަށާއި، ދައުރު ހަމަވަންދެން އެއްވެސް މަޤާމެއްގައި ހުރި ޖޭޕީގެ ބޭފުޅަކު އިސްތިއުފާ ދީގެން ނުވާނެކަމަށެވެ. އަދި އެއްބަސްވުމުގައި ޖުމްހޫރީ ޕާޓީއަށް ރިޔާސީ ކެނޑިޑޭޓެއް ނުނެރެވޭނެކަމަށް ނޯންނާނެކަމަށް ޤާސިމް ވަނީ ވިދާޅުވެފައެވެ.
ޖޭޕީން ކެނޑިޑޭޓަކު ނެރުމަށް ނިންމި ނިންމުމާއި ގުޅޭގޮތުން ޤާސިމް އިބްރާހިމްގެވެސް އަރިސް އަދި އެޕާޓީގެ ނައިބް ލީޑަރު އަމީން އިބްރާހިމް ވިދާޅުވީ ޖޭޕީން އިންތިޚާބަށް ނިކުންނަން ނިންމެވީ ބައެއް ޕާޓީތަކުގެ އިސްވެރިންނާއި، ދިވެހި ރައްޔިިތުންގެ ތެރެއިން އެތައް ބަޔަކާއި، ޖުމްހޫރީ ޕާޓީގެ އާންމު މެމްބަރުންގެ އެދުމަށް ކަމަށެވެ.
ޖޭޕީން ކެންޑިޑޭޓަކު ނެރެން ނިންމީ ބައެއް ޕާޓީތަކުގެ އިސްވެރިންނާ ޖޭޕީގެ ގިނަ މެންބަރުންނާ އެތައް ރައްޔިތެއް ކެނޑިނޭޅި ލީޑަރ ޤާސިމް އިބްރާހިމް އަށާއި ޕާޓީގެ އެކި ބޭފުޅުންނަށް ކުރެއްވި އިލްތިމާސާ އެކު. އިރާދަކުރެއްވިއްޔާ މި ނިންމުމުން ރައްޔިތުންނަށް ހަމަޖެހުމާއި ފާގަތިކަން ލިބޭނެ.
– އަމީން އިބްރާހިމް ވިދާޅުވިއެވެ.
އަމީން މިހެން ވިދާޅުވިއިރު، ޤާސިމް ރިޔާސީ އިންތިޚާބުގައި ވާދަކުރެއްވުމަށް އެންމެ ބޮޑަށް ބާރުއަޅުއްވާ އެއް ބޭފުލަކީ އެމްޑީޕީގެ ރައީސް މުހައްމަދު ނަޝީދުކަމަށް ބައެއް ފަރާތްތަކުން ދަނީ ބުނަމުންނެވެ. ރައީސް ނަޝީދު އުފައްދާފައިވާ ފިކުރެއްގެ ދިރުމުން ދަނީ ޖޭޕީއާއިއެކީ މަސައްކަތް ކުރުމަށް ޝައުގުވެރިކަންވެސް ފާޅުކޮށްފައެވެ.
ޖޭޕީން ވާދަކުރަން ނިންމާފައިވަނީ ރައީސް ޞާލިހާއި، އަދާލަތު ޕާޓީންވެސް ޤާސިމާއި މަޝްވަރާކޮށްފައިވާ ދަނޑިވަޅެއްގައެވެ. ނަމަވެސް ޤާސިމް ނިންމެވީ ސަރުކާރާއިއެކު ކޯލިޝަނެއްގެ ތެރެއިން އިންތިޚާބުގައި ކުރިއަށް ނުގޮސް ވަކިން ވާދަ ކުރެއްވުމަށެވެ. ަ
