ސަރުކާރު ކޯލިޝަންގައި ހިމެނޭ ޖުމްހޫރީ ޕާޓީ ކޯލިޝަނުން ވަކިކުރުމާއި މެދު ގޮތެއް ނިންމާނީ އެޕާޓީން ރަސްމީކޮށް އިންތިޚާބުގައި ވާދަކުރާނެ ކެނޑިޑޭޓަކު ނެރުމުން ކަމުގައި ރައީސުލްޖުމްހޫރިއްޔާގެ އޮފީހުގެ ތަރުޖަމާން މިއުމާން މުހައްމަދު ވިދާޅުވެއްޖެއެވެ.
ޖޭޕީން ވަކިން ވާދަކުރަން ނިންމާފައިވާއިރު އެ ޕާޓީގެ ރިޔާސީ ކެންޑިޑޭޓަކީ ޕާޓީގެ ލީޑަރު ގާސިމް އިބްރާހިމެވެ. މި ގޮތަށް ނިންމާފައިވަނީ ރޭ ބޭއްވި އެ ޕާޓީގެ ކައުންސިލް ބައްދަލުވުމުގެ އިއްތިފާގުންނެވެ.
އެ ނިންމުމާ ގުޅިގެން ރައީސް އޮފީހުގެ ތަރުޖަމާނު މިއުވާން މުހައްމަދު ވިދާޅުވީ، ސެޕްޓެމްބަރު 9 ގައި އޮންނަ ރިޔާސީ އިންތިހާބަށް ކޯލިޝަން އެކުލަވާލަން މިހާރުގެ ސަރުކާރުގެ ކޯލިޝަން ޕާޓްނަރުންނަށް ދައުވަތު ފޮނުއްވާފައިވާއިރު، އެއަށް ޖުމްހޫރީ ޕާޓީއިން އަދި ޖަވާބެއް ދީފައި ނުވާ ކަމަށެވެ.
ނަމަވެސް ޖުމްހޫރީ ޕާޓީން ކެނޑިޑޭޓަކު ނެރުމަށް އަދި މިހާތަނަށް ނިންމާފައި ނުވާއިރު ކޯލިޝަނުން ވަކިކުރުމާއިމެދު ރައީސް އަދި ވަކިގޮތެއް ނުނިންމަވާކަމަށެވެ. މިއުވާން ވިދާޅުވީ ކޯލިޝަނުން ރިޔާސީ އިންތިޚާބުގައި ދެކެނޑިޑޭޓަކު ވާދަކުރުމަކީ އެކީގައި ކުރިއަށްދާން އޮތް ހުރަހެއްކަމަށެވެ. އެހެންކަމުން ޖޭޕީން އިންތިޚާބުގައި ވާދަކުރާނެ ކެނޑިޑޭޓަކު ސާފުވާ ހިސާބުން ރައީސް ޞާލިހު ޖޭޕީއާއި މަޝްވަރާކޮށް ގޮތްތަކެއް ނިންމަވާނެކަމަށެވެ.
ސަރުކާރު ހިންގާ ކޯލިޝަނުގައި ޖުމްހޫރީ ޕާޓީ ހިމެނޭއިރު، ވަޒީރުންގެ މަޖިލީހުގެ އިތުރުން ދައުލަތުގެ އެކި އިދާރާތަކުގައި ޖޭޕީއަށް ނިސްބަތްވާ ބޭފުޅުން އެބަތިއްބެވިއެވެ. އިންތިހާބުގައި ވަކިން ވާދަކުރަން ނިންމުމުން، ކޯލިޝަނުން ޖޭޕީ ބޭރުކޮށް، ސަރުކާރުގެ މަގާމުތަކުގައި ތިއްބެވި އެ ޕާޓީގެ ބޭފުޅުން މަގާމުން ވަކި ކުރުމަށް އެމްޑީޕީގެ ތެރެއިން ވަނީ ގޮވާލަން ފަށައިފައެވެ.
މިހާތަނަށް ރައީސްއާ އެކު ކޯލިޝަން ހަދަން އެއްބަސްވެފައިވަނީ އަދާލަތު ޕާޓީގެ އިތުރުން ވިޔަފާރިވެރިޔާ އަހްމަދު ސިޔާމްގެ މޯލްޑިވްސް ޑެވެލޮޕްމަންޓު އެލަޔަންސް (އެމްޑީއޭ) އާއެވެ.
