ދުނިޔެއަށް ނޭވާލެވޭހާ ހިނދަކު އަބަދުވެސް މަސައްކަތް ކުރާނީ ރައްޔިތުންގެ ފަޅީގައި ރައްޔިތުންގެ ހައްގުގައި ކަމަށް ޖުމްހޫރީ ޕާޓީގެ ލީޑަރު ޤާސިމް އިބްރާހިމް ވިދާޅުވެއްޖެއެވެ.
ގާސިމް މިފަދައިން ވިދާޅުވީ، އިއްޔެ އޮތް ޕާޓީގެ 151 ވަނަ ކައުންސިލް ބައްދަލުވުމުގައި ވާހަކަފުޅު ދައްކަވަމުންނެވެ. މި ބައްދަލުވުމުގައި ޖޭޕީގެ ކައުންސިލް މެމްބަރުން ވަނީ، ކުރިއަށްއޮތް ރިޔާސީ އިންތިޚާބުގައި، ޖުމްހޫރީ ޕާޓީ އިސްވެއޮވެ އުފައްދާ ކޯލިޝަނެއްގެ ތެރެއިން ވާދަކުރުމަށް ހުށަހަޅާފައިިވާ ގަރާރު ފާސްކޮށް، އެމަގުން ކުރިއަށްދިއުމަށް ނިންމާފައެވެ.
މި ނިންމުން ނިންމާފައިވަނީ ކައުންސިލް ބައްދަލުވުމުގައި ބައިވެރިވި 48 މެމްބަރުންގެ ތެރެއިން 46 މެމްބަރުންގެ ތާއީދާއެކުއެވެ. މި ގަރާރު ފާސްކުރުމަށް ވޯޓުނުދެއްވަނީ، ރައީސް އޮފީހުގެ މިނިސްޓަރުގެ މަގާމުގައި ހުންނެވި އަހުމަދު ސަމީރާއި މިނިސްޓްރީ އޮފް ފިޝަރީސް އެންޑް އެގްރިކަލްޗަރގެ ސްޓޭޓް މިނިސްޓަރ މަނިކު އެކަންޏެވެ.
ކައުންސިލް މެމްބަރުންގެ ނިންމުމާއި ގުޅިގެން މެމްބަރުންނާއި ވާހަކަ ދައްކަވަމުން ޤާސިމް ވިދާޅުވީ ރާއްޖޭގެ އެކި ކަންކޮޅުތަކުގައި ޖުމްހޫރީ ޕާޓީއަކީ ނަމޫނާއެއްކަމަށް ދެކޭ މީހުން މަދެއް ނޫންކަމަށެވެ. މިހާތަނަވެސް އެމަނިކުފާނު މަސައްކަތް ކުރެއްވީ ރައްޔިތުންގެ ހައްގުގައި ކަމަށާއި، އަދި ކުރިއަށް އޮތް ތަނުގައިވެސް މަސައްކަތް ކުރައްވާނީ ދިވެހި ރައްޔިތުންގެ ހައްގުގައިކަމަށް ޤާސިމް ވިދާޅުވިއެވެ.
ދިވެހިރާއްޖޭގެ އެކި ދާއިރާތަކުގައި މަސައްކަތްކުރާ މީހުންނަށް ނަމޫނާއަކަށް ޖުމްހޫރީ ޕާޓީވާކަން އަޅުގަނޑަށް ކަށަވަރު. އަޅުގަނޑުމެން އަބަދުވެސް މަސައްކަތްކުރަނީ ރައްޔިތުންގެ ސައިޑުގައި. އަބަދުވެސް. އޯލްވޭޒް. އަޅުގަނޑު މި މަގާމުގައި އިންހާ ހިނދަކު، އަޅުގަނޑަށް މި ދުނިޔެއަށް ނޭވާލެވޭހާ ހިނދަކު އަޅުގަނޑުމެން އަބަދުވެސް މަސައްކަތްކުރާނީ ރައްޔިތުންގެ ސައިޑުގަ.
– ޤާސިމް ވިދާޅުވިއެވެ.
ޤާސިމް ރިޔާސީ އިންތިޚާބުގައި ވާދަކުރަން ނިންމާފައިވާއިރު، ރިޔާސީ އިންތިޚާބުގައި ޤާސިމްގެ ތާއީދު ހޯއްދެވުމަށް ރައީސް އިބްރާހިމް މުހައްމަދު ޞާލިހު ވަނީ ވަރަށް ބޮޑަށް މަސައްކަތް ކުރައްވާފައެވެ. އެގޮތުން ރައީސްގެ ފަރާތްޕުޅުން އެކި ބޭފުޅުން ޤާސިމާއި ބައްދަލުކޮށްފައިވެއެވެ. އަދި ސީދާ ރައީސް އޮފީހުގައިވެސް ރައީސް ޞާލިހު ވަނީ ޤާސިމާއި ބައްދަލު ކުރައްވާފައެވެ.
މީގެ އިތުރުން ޤާސިމްގެ ތާއީދު ހޯއްދެވުމަށާއި، ޤާސިމްގެ ރުހުން ހޯއްދެވުމަށް އެކި ޕާޓީތަކުންވެސް ވަނީ މަސައްކަތް ކޮށްފައެވެ. ނަމަވެސް ޤާސިމް ނިންމާފައިވަނީ ކައުންސިލުގެ ތާއީދާއިއެކު ރިޔާސީ އިންތިޚާބުގައި ވާދަކުރެއްވުމަށެވެ.
2018ގެ ރިޔާސީ އިންތިޚާބު ފިޔަވާ، 2008ގެ ފަހުން މިހާތަނަށް ބޭއްވި ކޮންމެ ރިޔާސީ އިންތިޚާބެއްގައިވެސް ޤާސިމް ވަނީ ވާދަކުރައްވާފައެވެ. ނަމަވެސް މިހާތަނަށް ގާއިމަށް އެއްވެސް ރިޔާސީ އިންތިޚާބެއްގައި ކާމިޔާބާއިހަމަށް ދަތުރު ކުރެއްވިފައެއް ނުވެއެވެ. އެހެން ނަމަވެސް ސިޔާސީ މަސްރަހު އޮތް ގޮތުން މިއީ ޤާސިމަށް އިންތިޚާބު ކާމިޔާބު ކުރަން އެންމެ ފަސޭހަ ފަހަރަށް ވެގެންދާނެކަމަށް ގިނަ ބަޔަކު ދެކެއެވެ.
