ޖުމްހޫރީ ޕާޓީން ރިޔާސީ އިންތިޚާބުގައި ވާދަކުރަން ނިންމި ނިންމުމާއިއެކު އެޕާޓީގެ ސްލޮޓްގައި ރައީސް އޮފީހުގެ މިނިސްޓަރު ކަމުގެ މަޤާމު ފުރުއްވަމުންދާ އަހުމަދު ސަމީރު ޖޭޕީން އިސްތިއުފާ ދިނުމުން އެއްވެސް ހިތްބުރަކަމެއް ނެތްކަމަށާއި، އެދެނީ ސަމީރަށް ކާމިޔާބީ ކަމުގައި ޖުމްހޫރީ ޕާޓީގެ ލީޑަރު ޤާސިމް އިބްރާހިމް ވިދާޅުވެއްޖެއެވެ.
ޖޭޕީން އިއްޔެ ބޭއްވި ކައުންސިލް ބައްދަލުވުމުގައި، ރިޔާސީ އިންތިހާބުގައި އެ ޕާޓީން ކަން ކުރާނެ ގޮތަކާ މެދު ވޯޓަށް އެހިއިރު ރައީސް އިބްރާހިމް މުހައްމަދު ސޯލިހްގެ ސަރުކާރާ އެކު ކޯލިޝަން ހަދައިގެން ކުރިއަށްދާން ފެންނަ ކަމަށް ވޯޓު ދެއްވީ ސަމީރު އެކަންޏެވެ. ސަމީރު ވަނީ ރިޔާސީ އިންތިޚާބުގައި ޖުމްހޫރީ ޕާޓީން ވާދަކުރަން ނިންމުމުން އޭނާގެ ވިސްނުން ހާމަކުރައްވާފައެވެ.
ސަމީރު ވިދާޅުވީ، ޖުމްހޫރީ ޕާޓީއަކީ ވެސް އަދި ޕާޓީގެ ލީޑަރު ގާސިމް އިބްރާޙީމަކީ އޭނާއަށް ނުހަނު ގިނަ ކަންތައްތަކެއް ކޮށްދެއްވާފައިވާ ބޭފުޅެއްކަމަށެވެ. އެހެންނަމަވެސް، އެހެން ޕާޓީއެއްގެ ކެންޑިޑޭޓަކަށް ރިޔާސީ އިންތިޚާބުގައި ތާއީދުކުރުމަށް ނިންމާފައިވާތީ، ޖޭޕީން ރިޔާސީ އިންތިޚާބުގައި ވާދަކުރުމަށް ނިންމި ނިންމުމާއެކު، މިކަމުގައި ފުށުއެރުންތަކެއް ހުންނާނެތީއާއި، ޕާޓީގައި ހުރުންއެއީ އެންމެ ރަނގަޅުގޮތްކަމަށް ނުފެންނާތީ، ޕާޓީގެ ކައުންސިލް މެމްބަރުކަމުންނާއި ޕާޓީން އިސްތިއުފާދެއްވަން ނިންމަވާފައިވާ ކަމަށެވެ.
ސަމީރު އިސްތިއުފާދެއްވުމާ ގުޅިގެން ގާސިމް ވިދާޅުވީ، ޖުމްހޫރީ ޕާޓީއަށް ސަމީރުގެ ފަރާތްޕުޅުން ގިނަ ހިދުމަތްތަކެއް ލިބުނުކަމަށާއި، ސަމީރުގެ ކުރިއެރުމަށް ޕާޓީގެ ފަރާތުން ވެސް ގިނަ ކަންތައްތަކެއް ކޮށްފައިވާކަމަށެވެ. އަދި ސަމީރުގެ ނިންމެވުމާ ގުޅިގެން އެމަނިކުފާނުގެ ވެސް އަދި ޕާޓީގެ ވެސް އެއްވެސް ހިތްބުރަކަމެއް ނެތްކަން ގާސިމް ފާހަގަކުރެއްވިއެވެ.
ސަމީރު ވަނީ ކުރިއަށް އޮތް ރިޔާސީ އިންތިޚާބުގައި ރައީސް ޞާލިހު އިންތިޚާބު ކޮށްދެއްވުމަށް ކުރެވެން އޮތް ހުރިހާ ކަމެއް ކުރައްވާނެކަމަށް ވިދާޅުވެފައެވެ.
