އެމެރިކާގެ ރިޔާސީ އިންތިޚާބު ކާމިޔާބު ކޮށްފައިވާ، އިންތިޚާބީ ރައީސް ޖޯ ބައިޑްއަށް ވައިޓް ހައުސްއަށް ވަދެވޭނީ އިންތިޚާބުގައި އޭނާ ހޯދިކަމަށް ބުނާ 80 މިލިއަން ވޯޓުގެ ސައްޙަކަން ކަށަވަރު ކުރެވުނު ދުވަހަކުން ކަމުގައި އެމެރިކާގެ ރައީސް ޓްރަމްޕް ވިދާޅުވެއްޖެއެވެ.
ޓްރަމްޕް މިހެން ވިދާޅުވެފައިވަނީ، އެމެރިކާގެ އެތަކެއް ސްޓޭޓެއްގައި ބޮޑެތި އޮޅުވާލުންތަކެއް ހުރި ކަމަށް ވިދާޅުވެ ދާދި ދެންމެއަކު ކުރެއްވި ޓުވީޓެއްގައެވެ. ޓްރަމްޕް ވިދާޅުވެފައިވަނީ، މިޙާރުގެ ނަތީޖާއިން ބައިޑްންއަށް ލިބުނު ކަމަށް ދައްކާ 80 މިލިއަން ވޯޓަކީ އޮޅުވާލައިގެން ނުވަތަ، ވަގަށް ހޯދި ވޯޓުތަކެއް ނޫންކަން ބައިޑްން ކަށްވަރު ކޮށްދެއްވަން ޖެހޭނަ ކަމުގައެވެ.
މި ޓުވީޓުގައި ޓަރަމްޕް އިތުރަށް ވިދާޅުވެފައިވަނީ، އެމެރިކާގެ ސްޓޭޓްތައް ކަމުގައިވާ ޑެޓްރޮއިޓް އާއި، އެޓްލާންޓާއާއި، ފިލަޑެލްފިއާ އާއި އަދި މިލްވޮކީގައި ކަންހިގާފައިވާ ގޮތް ބެލުމުން ނޮވެމްބަރު 3 ގައި ބޭއްވުނު ރިޔާސީ އިންތިޚާބުގައި ބޮޑެތި އޮޅުވާލުންތަކެއް ހިންގާފައިވާ ސާބިތުވާނެ ކަމަށެވެ. އަދި، މިއީ ބައިޑްން ހައްލުކުރަން ޖެހޭނެ މައްސަލަތަކެއް ކަމުގައިވެސް ޓްރަމްޕްގެ މިޓުވީޓުގައި ވަނީ ވިދާޅުވެފައެވެ.
Biden can only enter the White House as President if he can prove that his ridiculous “80,000,000 votes” were not fraudulently or illegally obtained. When you see what happened in Detroit, Atlanta, Philadelphia & Milwaukee, massive voter fraud, he’s got a big unsolvable problem!
— Donald J. Trump (@realDonaldTrump) November 27, 2020
ބައިޑްންއަށް ވައިޓް ހައުސްއަށް ނުވަދެވޭނެ ކަމަށް ވިދާޅުވެ ޓްރަމްޕް އިންޒާރު ދިންކަމުގައި ވިނަމަވެސް، ބައިޑްން ގެންދަވަނީ އިންތިޚާބީ ރައީސްގެ ހައިސިއްޔަތުން ހަމަޖައްސަވަންޖެހޭ އިންތިގާލީ އިންތިޒާމްތައް ހަަމަޖައްސަވަމުންނެވެ. މިގޮތުން ވޭތުވެދިޔަ ހަފްތާގައި ބައިޑްންވަނީ އޭނާގެ ކެބިނެޓް އިއުލާން ކުރައްވާފައެވެ.
ބައިޑްން ކެބިނެޓް އިއުލާން ކުރައްވާ، އަދި ސަރުކާރުގެ އިސް މަގާމްތަކަށް ބޭފުޅުން ހަމަޖައްވަމުން ގެންދަވަނީ، އެމެރިކާ ރިޔާސީ އިންތިޚާބަށްފަހު، އިންތިގާލީ މަރުހަލާގެ ކަންކަން ހަމަޖެއްސުމާބެހޭ ހުރިހާ ޒިންމާއެއް ހަވާލުވެފައި އޮންނަ އޭޖެންސީ، ޖެނެރަލް ސާވިސް އެޑްމިނިސްޓްރޭޝަން (ޖީއެސްއޭ) އިން ވެރިކަން ބަދަލު ކުރުމުގެ އިންތިޒާމުތައް ފެށުމަށް ބައިޑްއަށް ރަސްމީކޮށް އެންގުމާއި ގުޅިގެންނެވެ.
ޖީއެސްއޭއިން ބައިޑްންއަށް ރަސްމީކޮށް އިންތިގާލީ މަރުހަލާ ފެށުމަށް އަންގާފއިވަނީ ޖީއެސްއޭގެ ވެރިޔާ އެމިލީ މާފީ ޖޯ ބައިޑްއަށް މިދިޔަ ހަފްތާގައި ފޮނުވި ސިޓީއެއްގައެވެ. މިސިޓީއަކީ މިއީ، މިމަހުގެ 3 ވަނަ ދުވަހު ބޭއްވުނު އެމެރިކާގެ ރިޔާސީ އިންތިޚާބުގައި މިހާރުގެ ރައީސް ޑޮނަލްޑް ޓްރަމްޕް ބަލިވެފައިވާކަން ގަބޫލުކޮށް އެމެރިކާގެ ސަރުކާރުން މިހާތަނަށް އެޅި ފުރަތަމަ ފިޔަވަޅެވެ.
އެމެރިކާ ތަފާތު ސްޓޭޓުތަކުގެ އެންމެފަހުގެ ނަތީޖާތައް އަންނަމުން ދިޔަވަރަކަށް އެމެރިކާގެ ރައީސްކަމަށް އިންތިޚާބު ވާނެކަން ޔަގީންވެފައިވާ އިންތިޚާބީ ރައީސް ޖޯ ބައިޑްއާއި، މިހާރުގެ ރައީސް ޓްރަމްޕްއާއި ދެމެދު އޮތް ފަރަގު މިހާތަނަށް ވަނީ ބޮޑުވަމުން ގޮސްފައެވެ.
މިގޮތުން އެންމެ ފަހުގެ ނަތީޖާ ދައްކާގޮތުން، ގިނަ ސްޓޭޓުތަކުގެ ދާއިމީ ނަތީޖާ އިއުލާން ކުރެވިފައިވާއިރު، ބައިޑްން އުޅެނީ ޓްރަމްޕަށްވުރެ 6 މިލިއަން ވޯޓު ކުރީގައެވެ.
