އިންތިޚާބުތަކުގައި ވެރިކަމުގައި ތިބޭ މީހުން ދައުލަތުގެ މުދަލާއި، ދައުލަތުގެ މީޑިއާ ބޭނުންކުރުން ހުއްޓުވަންޖެހޭ ކަމުގައި ރައްޔިތުންގެ މަޖިލީހުގެ ރައީސް މުހައްމަދު ނަޝީދު ވިދާޅުވެއްޖެއެވެ.

ރައީސް ނަޝީދު މިހެން ވިދާޅުވީ އިންތިހާބުތަކުގައި ވާދަކުރާ ކެންޑިޑޭޓުން ކެމްޕެއިން ކުރާއިރު، ރިޝްވަތަށް މަގުފަހިވާގޮތަށް ހިންގާ ކަންކަމާއި، އެ ކެންޑިޑޭޓަކު ވެވަޑައިގަންނަވާ ވައުދުތައް ވަކިވާނެ ގޮތަކަށް އިންތިހާބުތަކާބެހޭ އާއްމު ގާނޫނަށް ހުށަހެޅި އިސްލާހުގެ ބަހުސްގެ މަރުހަލާގައި މެމްބަރުން ފާޅުކުރެއްވި ޝުއޫރުތަކާއި ގުޅިގެން ދެއްކެވި ވާހަފުޅުގައެވެ.

ރައީސް ނަޝީދު ވިދާޅުވީ ދައުލަތުގެ މުދަލާއި، ދައުލަތުގެ މީޑިއާގެ ބޭނުން ނަހަމަ ގޮތުގައި އިންތިޚާބުތަކުގައި ސަރުކާރުގައި ތިބޭ މީހުން ކުރާކަމީ ކަންބޮޑުވާންޖެހޭ ކަމެއްކަމަށެވެ. ޤާނޫނަށް އިސްލާހު ހުށަހަޅާފައިވާއިރު މިކަމަށް އިސްލާހެއް ނެތްކަން ނަޝީދު ވަނީ ކަންބޮޑުވުމާއިއެކު ފާޅުކޮށްފައެވެ.

ރައްޔިތުންގެ މަޖިލީހަށް މިދިޔަ ހަފުތާގައި ޒިޔާރަތްކުރެއްވި ޔޫރަޕިއަން ޔޫނިއަން އިލެކްޝަން އޮބްޒަވޭޝަން ޓީމަކާއި ބައްދަލުކުރެއްވި ކަމަށާއި އިންތިހާބުތަކާ ގުޅޭ ގޮތުން އެ ޓީމުން ކަންބޮޑުވުންތަކެއް ފާޅުކުރެއްވި ކަމަށް ރައީސް ނަޝީދު ވިދާޅުވިއެވެ. ސަރުކާރުގެ ފަރާތުން އިންތިހާބުތަކާބެހޭ އާންމު ގާނޫނަށް ހުށަހަޅާފައިވާ އިސްލާހުތަކުގެ ތެރޭގައި އެކަންކަން ނެތްކަން ރައީސް ނަޝީދު ފާހަގަކުރެއްވިއެވެ.

ހާއްސަކޮށް ދައުލަތުގެ މުދާ އިލެކްޝަނަށް ބޭނުންކުރުމާއި އަދި މީޑިއާ، ދައުލަތުގެ މީޑިއާ ހަމައެކަނި ވެރިކަމުގެ ފަރާތުން ބޭނުންކުރަމުން ގެންދިއުން މި ދެ ކަންތައް އެ ބޭފުޅުންގެ ކަންބޮޑުވުމުގެ ގޮތުގައި ފާހަގަކުރެއްވި.

– ރައީސް ނަޝީދު ވިދާޅުވިއެވެ.

ޤާނޫނަށް ހުށަހަޅާފައިވާ އިސްލާހުތަކުގެ ތެރޭގައި އިންތިޚާބުތަކުގައި ވާދަކުރާ ކެނޑިޑޭޓުންގެ މާލީ ބަޔާން ހުށަހަޅާ މުއްދަތަށް ވަނީ ލުއިތަކެއް ދީފައެވެ. ޤާނޫނުގައި މިހާރު ބުނާގޮތުން ކެނޑިޑޭޓެއްގެ މާލީ ބަޔާން ހުށަހަޅަން ޖެހެނީ އިންތިޚާބު ބާއްވާ ތާރީހުން ފެށިގެން 21 ދުވަހުގެ ތެރޭގައެވެ. ނަމަވެސް މިމުއްދަތު އެއްމަސް ދުވަހަށް އިތުރު ކުރުމަށް ޤާނޫނަށް ވަނީ އިސްލާހު ހުށަހަޅާފައެވެ.

މީގެ އިތުރުން ރަސްމީ އިންތިޚާބީ އެޖެންޓު މަރުވުން، އިސްތިއުފާ ދިނުން ނުވަތަ ވަކިކުރުމުން އެކަން އިލެކްޝަނަށް އަންގަންޖެހޭ މުއްދަތަށްވެސް ވަނީ ބަދަލުގެނައުމަށް ނިންމާފައެވެ. ޤާނޫނަށް ހުށަހަޅާފައި އިސްލާހުގައި ވަނީ މިފަދަ ހާލަތެއްގައި ގިނަވެގެން 48 ގަޑިއިރުގެ ތެރޭގައި އެކަން އިލެކްޝަނަށް އެންގުމަށް އިސްލާހު ހުށަހަޅާފައެވެ.

ޤާނޫނަށް ހުށަހަޅާފައިވާ އިސްލާހުތަކުގެ ތެރޭގައި ވޯޓުލާ މަރުކަޒަކަށް ރަޖިސްޓްރީވެފައިވާ މީހުންގެ އަދަދު އެއް ޕަސެންޓަށްވުރެ އިތުރުނުވާ އަދަދެއްގެ ވޯޓުކަރުދާސް ފޮނުވަން ވާނެކަމަށް ގާނޫނުގައި މިހާރު ކަނޑައަޅާފައިވާ އޮތްއޮތުން ބަދަލުކުރަންވެސް އިސްލާހު ހުށަހަޅާފައިވެއެވެ. އެގޮތުން މަރުކަޒަކަށް ވޯޓު ލުމަށް ރަޖިސްޓްރީ ވެފައިވާ މީހުންގެ އަދަދު 100 މީހުންނަށްވުރެ މަދުނަމަ ގިނަވެގެން އިތުރު އެއްވޯޓު ކަރުދާސް ފޮނުވުމަށް ޤާނޫނަށް ވަނީ އިސްލާހު ހުށަހަޅާފައެވެ.

އިލެކްޝަނުން ވަނީ އިލެކްޝަނުން ބާއްވާ އިންތިޚާބުތަކުގައި ވޯޓު ގުނާ ސަރަހައްދާއި ވޯޓުލާ މަރުކަޒުތަކުގައި މޮނިޓާކުރުމަށް ހަރަކާތްތެރިވެވޭނީ އިލެކްޝަނުން ހުއްދަދޭ އަދި ރަޖިސްޓްރީކޮށްފައިވާ ނޫސްވެރިންނަށް ހެދުމަށްވެސް އިސްލާހު ހުށަހަޅާފައެވެ.