ޗައިނާއިން މެދުވެރިއެއްގެ ދައުރު އަދާކޮށްގެން، މެދުއިރުމަތީގައި އޮތް އެންމެ ހަތުރުވެރިކަން ބޮޑު އަރަބި ދެގައުމު ކަމުގައިވާ ސައުދީ އަރަބިއާއާއި އިރާން ސިޔާސީ ގުޅުން ގާއިމް ކުރުމަށް އެއްބަސް ވެއްޖެއެވެ.
މި ހަފްތާގެ ހުކުރުދުވަހު ޗައިނާގެ ވެރިރަށް ބޭޖިންގައި ބޭއްވުނު ވާހަކަތަކަށްފަހު ސައުދީ އަރަބިއާއާއި އިރާނުންވަނީ ދެގައުމުގެ މެދުގައި ސިޔާސީ ގުޅުން ގާއިމް ކުރުމުގެ އިތުރުން ކުރިޔަށް އޮތް ދެމަސްދުވަހުގެ ތެރޭގައި ދެގައުމުގައި އެމްބަސީތައްވެސް ހުޅުވުމަށް އެއްބަސް ވެފައެވެ.
ސިޔާސީ ގުޅުން ގާއިމް ކުރުމަށް ސައުދީ އަރަބިއާއާއި އިރާނުން ވީ އެއްބަސްވުމުގައި ވަނީ، "އެއް ގައުމު އަނެއްގައުމުގެ މިނިވަންކަމަށް އިހުތިރާމްކޮށް، އެއްގައުމުން އަނެއް ގައުމުގެ ދާޚިލީ މައްސަލަތަކުގެ ތެރެއަށް ނުވަނުމަށްވެސް" އެއްބަސް ވެވައެފެ.
Joint Trilateral Statement by the Kingdom of #Saudi Arabia, the Islamic Republic of #Iran, and the People’s Republic of #China. pic.twitter.com/MyMkcGK2s0
— Foreign Ministry 🇸🇦 (@KSAmofaEN) March 10, 2023
އިރާނުގެ ދައުލަތުގެ މީޑިއާއިންވަނީ، އެގައުމުގެ ސުޕްރިމް ނޭޝަނަލް ސެކިއުރިޓީ ކައުންސިލްގެ ސެކެޓްރީ އަލީ ޝަމްޚާނީ ސައުދީ އަރަބިއާގެ ނޭޝަނަލް ސެކިއުރިޓީ އެޑްވައިޒަރ މުސާދު ބިން މުހައްމަދު އަލް އައިބަން އާއި ސަލާމް ކުރައްވާ ވީޑިއޯ ދައްކާފައެވެ. މި ދެބޭފުޅުން ސަލާމް ކުރެއްވިއިރު، ޗައިނާގެ ފޮރިިންގ މިނިސްޓަރ ވަންގ ޔީ ދެބޭފުޅުންގެ މެދުގައި ހުންނަވާ މަންޒަރު މި ވީޑިއޯގައި ފެނެއެވެ.
އަރަބި ބައްރުގައި އޮތް އެންމެ އަދާވާތްތެރިކަން ބޮޑު ދެގައުމު ސުލްހަ ކުރުމުގައި ޗައިނާއިން އަދާކުރަމުން އައިސްފައިވާ ދައުރު، މި ބައްދަލުވުމުގެ ކުރިން ހާމަ ކޮށްފައެއް ނުވެއެވެ.
މީޑިއާތަކުން، ޗައިނާގެ ފޮރިންގ މިނިސްޓަރ ވަންގ ޔީއާއި ހަވާލާދީ ރިޕޯޓު ކޮށްފައިވާ ގޮތުގައި، ދުނިޔޭގެ ބޮޑެތި މައްސަލަތައް ހައްލުކޮށް، އަދި ޒިންމާދާރު ގައުމެއްގެ ގޮތުގައި ޗައިނާ ދެމިއޮންނާނޭކަމަށް ވަންގ ޔީ ވަނީ ވިދާޅުވެފައެވެ. އަދި، ސައުދީ އަރަބިއާއި އިރާނާއެކީ ކުރިޔަށްދިޔަ މަޝްވަރާތަކުގައި، "އިޚްލާސްތެރި" އަދި "އިތުބާރު ކުރެވޭ" މެދުވެރިއެއްގެ ދައުރު ޗައިނާއިން އަދާކޮށްފައިވާ ކަމުގައި ވަންގ ޔީ ވިދާޅުވެފައިވާކަމަށްވެސް މީޑިއާތަކުން ރިޕޯޓު ކޮށްފައި ވެއެވެ.
ޗައިނާ މެދުވެރިވެގެން، ސައުދީ އަރަބިއާއާއި އިރާން ސުލްހަކުރެވުން، މަސްރަހު ދިރާސާ ކުރާ ފަރާތްތަކުން ސިފަ ކުރަމުންދަނީ، "ދުނިޔޭގެ ބާރުގެ ތިލަފަތަށް އަންނަމުންދާ ބޮޑު ބަދަލެއްގެ" ގޮތުގައެވެ.
