ކ. ތިލަފުއްޓާއި ކ. ގުޅިފަޅުގެ ފަޅުތެރޭގެ ސަރަހައްދުގައި ގަވާއިދާ ޚިލާފަށް ބަހައްޓާފައި ހުންނަ ކަނޑު ދުއްވާ އުޅަނދުފަހަރު އެ ސަރަހައްދު ނެގުމަށް އެޗްޑީސީން ނިންމައިފިއެވެ.
އެޗްޑީސީން ބުނެފައިވަނީ، އެ ކޯޕަރޭޝަންގެ ބެލުމުގެ ދަށުގައިވާ ކ. ތިލަފުއްޓާއި ކ. ގުޅިފަޅުގެ ފަޅުތެރޭގެ ސަރަހައްދުގައި އެޗްޑީސީގެ ހުއްދަނެތި ބަހައްޓާފައިވާ ކަނޑު އުޅަދުތަކާއި އެހެނިހެން ތަކެތީގެ ސަބަބުން އެ ސަރަހައްދުގައި ހިންގުމަށް ރޭވިފައިވާ އެކި މަޝްރޫއުތަކަށް ދަތިވަމުންދާތީވެ، އެކަމަށް ހައްލެއް ހޯދުމުގެ ގޮތުން، "ކ. ތިލަފުށްޓާއި ކ. ގުޅީފަޅުގެ ފަޅުތެރެއަށް ދޫކޮށްލާފައިވާ އުޅަނދުފަހަރާއި ތަކެއްޗާމެދު އަމަލުކުރާނެ ގޮތުގެ އުސޫލު" އެކުލަވާލާ އެ އުސޫލު 9 މާރިޗު 2023 ގައި ދިވެހި ސަރުކާރުގެ ގެޒެޓްގައި ޝާއިއު ކޮށްފައިވާ ކަމަށެވެ.
މިގޮތުން، ކ. ތިލަފުއްޓާއި ކ. ގުޅިފަޅުގެ ފަޅުތެރޭގައި ހުރި އުޅަދުތައް އެ ސަރަހައްދުން ނެގުމަށް އެކި މުއްދަތު ދީ، އެތައް އިއުލާނެއް ކުރެވިފައިވި ނަމަވެސް، އެގޮތަށް ހުރި އުޅަދުތައް މިއަދާއި ހަމައަށްވެސް ނަގާފައި ނުވާތީ، މިއުޅަނދުތައް އެ ސަރަހައްދުގައި ހުރުމުން އެ ކޯޕަރޭޝަނުންނާއި އަދި ސަރުކާރުން އެ ސަރަހައްދުގައި ހިންގަން ރާވާފައިވާ އެތައް ޕްރޮޖެކްޓަކަށް ހުރަސްއެޅި، އެ ސަރަހައްދު ބޭނުންކުރާ ފަރާތްތަކަށް ދަތިވެ އަދި އެ ސަރަހައްދުގެ ތިމާވެއްޓަށްވެސް މިކަމުގެ ސަބަބުން ވަރަށް ބޮޑަށް ގެއްލުންވަމުން ދާ ކަމުގައިވެސް އެޗްޑީސީން ބުނެފައި ވެއެވެ.
އެހެންކަމުން ހަލާވާ ދެވިފައިވާ އުސޫލުގައިވާ ގޮތުގެމަތިން ފަޅުތެރެއަށް ދޫކޮށްލާފައިވާ އުޅަނދުތަކަކީ ކޮބައިކަން ކަނޑައަޅާ، އެ އުޅަނދުތައް ނެގުމަށް ކުރަންޖެހޭ މަސައްކަތް އެ ކޯޕަރޭޝަނުން ކުރަމުން ގެންދާނެކަން އެޗްޑީސީން ހާމަކޮށްފައި ވެއެވެ.
އެހެންކަމުން، އެއްވެސް ފަރާތެއްގެ އުޅަނދެއް ނުވަތަ މުދަލެއް ކ. ތިލަފުއްޓާއި ކ. ގުޅިފަޅުގެ ފަޅުގެ ސަރަހައްދަށް ދޫކޮށްލާފައި ވާނަމަ، އެޗްޑީސީގެ ލޯކަލް ސެންޓަރ ހޮޓްލައިން 1516 އަށް ގުޅައިގެން މައުލޫމާތު ސާފުކުރުމަަށްފަހު އެތަކެއްތި ނެގުމަށް އެޗްޑީސީން ވަނީ އިލްތިމާސް ކޮށްފައެވެ.
