މީހެއްގެ އިންޓަނެޓް ބޭންކިން މައުލޫމާތު ހޯދައިގެން އިންޓަނެޓް ބޭންކިން އެޕްލިކޭޝަންއިން ކިއުއާރު ކޯޑް ސްކޭން މެދުވެރިކޮށް 2 ލައްކައަށްވުރެ ގިނަ ރުފިޔާގެ މުދާ ގަނެފައިވާ މައްސަލައެއްގައި ހައްޔަރު ކޮށްފައިވާ ދެމީހުންގެ ބަންދުގެ މުއްދަތު ކުރިމިނަލް ކޯޓުން އިތުރު ކޮށްފިއެވެ.
ފާއިތުވި ފެބްރުއަރީ މަހުގެ 18 ވަނަ ދުވަހު ހައްޔަރު ކުރި މި ދެމީހުންގެ ބަންދަށް ކުރިމިނަލް ކޯޓުން އެންމެ ފުރަތަމަ ޖަހައިދިނީ 15 ދުވަހެވެ. އެމުއްދަތު ހަމަވެފައިވަނީ މި ހަފްތާގެ ހޯމަ ދުވަހުއެވެ. އަދި އެދުވަހު ދެމީހުން ކޯޓަށް ހާޒިރު ކުރުމުން ކުރިމިނަލް ކޯޓުންވަނީ ދެމީހުންގެ ބަންދަށް އިތުރު 15 ދުވަސް ޖަހައިދީފައެވެ.
ފުލުހުން އެންމެ ފުރަތަމަ ބުނެފައިވަނީ މި މައްސަލާގައި މިދިޔަ ފެބްރުއަރީމަހުގެ 18 ވަނަ ދުވަހު ދިވެހި ދެ ފިރިހެނަކު ހައްޔަރުކޮށްފައިވާ ކަމަށާއި އެއީ 25 އަހަރުގެ މީހަކާއި 27 އަހަރުގެ މީިހެއް ކަމަށެވެ. މައުލޫމާތު ލިބިފައިވާ ގޮތުގައި އެ ދެމީހުންނަކީ ގއ. ކޮލަމާފުށީ ޕޫލްވާދީ އިސްމާއިލް ހޫދު (25) އާއި އެރަށު ނަސީމީގޭ މުހައްމަދު އާރުފް (27) އެވެ.
މި ދެމީހުންގެ މައްޗަށްވެސް ކުރަނީ މަކަރާއި ހީލަތް އަދި ވައްކަމުގެ ތުހުމަތެވެ.
މި ދެމީހުން ބަންދު ކުރުމަށް ކޯޓުން ނެރެފައިވާ އަމުރުން އިގޭ ގޮތުގައި ދެމީހުންގެ މައްޗަށްވެސް ކުށް ސާބިތު ކުރެވޭވަރުގެ ހެއްކާއި ގަރީނާ ފުލުހުންވަނީ ކޯޓަށް ހުށަހަޅާފައެވެ. އަދި އެ ދެމީހުން ފިހާރައިން ވިޔަފާރިކުރާ މަންޒަރު، ފުލުހުން ހުށަހަޅާފައިވާ ސީސީޓީވީ ފޫޓޭޖުން ފެންނަ ކަމަށްވެސް ކޯޓު އަމުރުގައި ބުނެފައި ވެއެވެ.
މި ދެމީހުންނަކީވެސް ކުށުގެ ރެކޯޑު އޮތް ދެމީހުންނެވެ.
ރާއްޖޭގައި މިގޮތަށް އޮޅުވާލައިގެންނާއި، މީހުންގެ އިންޓަނެޓް ބޭންކް ހެކްކޮށްގެން ގިނަ އަދަދެއްގެ ފައިސާތައް ދަނީ އަތުލަމުންނެވެ. އޮޅުވާލައިގެން މަކަރާއި ޙީލަތުން ފައިސާ ހޯދުމަށް ގިނައިން ފޯނުކުރާ ސަރަހައްދަކީ މާފުށި ސަރަހައްދު ނުވަތަ މާފުށީ ޖަލުކަމަށް ފުލުހުން ކުރިން ވިދާޅުވެފައިވެއެވެ. އަދި މާފުށީ ޖަލުން ފޯން ނުކުރެވޭނެގޮތް ހެދުމަށް ފުލުހުން އިސްނަގައިގެން، ޖަލުގައި ޖޭމަރު ހަރުކުރުމަށް ޕޮލިސީ ލެވެލްގައި މަޝްވަރާތައް ކުރެވި އެކަމަށް ހައްލެއް ގެނައުމުގެ މަސައްކަތް ކުރަމުން އަންނަކަމަށް ފުލުހުން ވިދާޅުވެއެވެ.
ފުލުހުން ހާމަކޮށްފައިވާ ގޮތުގައި މިދިޔަ އަހަރު އެކަނި 23 މިލިއަން ރުފިޔާ އެތައް ބައެއްގެ އަތުން މިގޮތަށް ގެއްލިފައިވެއެވެ.
