ކުރިޔަށް އޮތް ރިޔާސީ އިންތިޚާބަށް އެކުގައި މަސައްކަތް ކުރުމުގެ މަޝްވަރާތަކަށް ގާސިމްގެ އެޑްވައިޒަރުކަމަށް ދާދިފަހުން އައްޔަން ކުރެއްވި އިލްހާމް އަހުމަދު އަނެއްކާވެސް ރައްޔިތުންގެ މަޖިލިހުގެ ރައީސް އަދި އެމްޑީޕީގެ ރައީސް މުހައްމަދު ނަޝީދާއި ބައްދަލު ކުރައްވައިފިއެވެ.
މައުލޫމާތު ލިބިފައިވާ ގޮތުގައި، ރިޔާސީ އިންތިޚާބުގެ މަޝްވަރާތަކަށް މިއީ ގާސިމްގެ އެޑްވައިޒަރު އިލްހާމް އަހުމަދު ނަޝީދުއާއި ބައްދަލުކުރައްވާ 3 ވަނަ ފަހަރެވެ.
އިލްހާމާއި ނަޝީދު ވަނީ މީގެ ކުރިންވެސް ބައްދަލު ކުރައްވާފައެވެ. އެބައްދަލުވުން ބޭއްވިފައިވަނީ ފާއިތުވި ފެބްރުއަރީމަހުގެ 28ވަނަ ދުވަހުއެވެ. އެފަހަރުގެ ބައްދަލުވުމުގައިވެސް މަޝްވަރާ ކުރެވިފައިވަނީ، އެމްޑިޕީގެ އެތެރޭގައި "ފިކުރެއްގެ ދިރުން"ގެ ނަމުގައި ހިގަމުންދާ ސިޔާސީ ހަރަކާތާއި ގާސިމް އިބުރާހިމް ގުޅިގެން ރިޔާސީ އިންތިޚާބުގައި ވާދަކުވެނޭގެ ގޮތްތަކާއި ގުޅޭގޮތުންނެވެ.
ގާސިމްގެ އެޑްވައިޒަރު އަނެއްކާވެސް ނަޝީދުއާއި ބައްދަލު ކުރައްވާފައިވާއި، ކުރިޔަށް އޮތް ރިޔާސީ އިންތިޚާބަށް ކޯލިޝަން ހެދުމުގެ މަޝްވަރާތަކަށް ގާސިމް އިބުރާހިމްވެސް ވަނީ ރައީސް ސާލިހާއި ބައްދަލު ކުރައްވާފައެވެ. ރައީސް ސާލިހާއި ބައްދަލު ކުރެއްވުމަށްފަހު ކުރެވުނު މަޝްވަރާތަކުގެ ތަފްސީލެއް ގާސިމް މީޑިއާތަކާއި ހިއްސާ ކުރައްވާފައެއް ނުވެއެވެ.
ކުރިޔަށް އޮތް ރިޔާސީ އިންތިޚާބުގައި ގާސިމްގެ ތާއީދު ރައީސް ސާލިހަށް ހޯއްދެވުމުގެ ގޮތުން އަދާލަތު ޕާޓީގެ ރައީސް ޝެއިޚް އިމްރާންވެސްވަނީ ގާސިމްއާއި ބައްދަލު ކުރައްވާފައެވެ.
ކުރިޔަށް އޮތް ރިޔާސީ އިންތިޚާބުގައި ވާދަކުރައްވާނީ ކޯލިޝަންއަކާއެކީ ކަމަށް ރައީސް ސާލިހު ވިދާޅުވެފައި ވާއިރު، އަދި މިހާތަނަށް ރައީސް ސާލިހާއެކީ ކޯލިޝަން ހަދާނެކަން އިއުލާން ކުރައްވާފައިވަނީ އަދާލަތު ޕާޓީގެ އިތުރުން ސަންޓްރަވަލް ސިޔާމު އިސްވެ ހިންގަވާ އެމްޑީއޭއިންނެވެ.
ޖުމުހޫރީ ޕާޓީގެ ކައުންސިލުން މިހާރުވަނީ ކޯލިޝަން ހެދުމުގެ ހުރިހާ ބާރެއް ޕާޓީގެ ލީޑަރު ގާސިމް އިބުރާހިމްއާއި ހަވާލު ކޮށްފައެވެ.
One Response
ސާބަހޭ ރަންކޮޅާ ، ގާސިމު ނަހުލާއާއި ކޯލިސަން ހަދަން ބައްދަލު ކުރިއްޔޭ ލިޔުނީމަ މާ ކިޔާހިތް ވާނެ ގިނަ މީހުން.