ޓިކެޓް ވިއްކައިގެން ބާއްވާ ފުރަތަމަ މިއުޒިކް ޝޯ މި މަހު އޮލިމްޕަހުގައި ބާއްވަން ނިންމައިފިއެވެ.
މި މަހުގެ 17 އާއި 18 ވަނަ ދުވަހުގެ ރޭ "ނޮއިސް" ގެ ނަމުގައި ބާއްވާ މި ޝޯ އިންތިޒާމުކުރަނީ އެއް ކާފުގެ ފަރާތުންނެވެ. އެގޮތުން 17 ވަނަ ދުވަހުގެ ރޭގެ ޝޯގައި ޕަފޯމްކުރާނީ އެޗޭސިއާ، ރެވިއޯ، ކޮރެލިއަމް އަދި ފަޔާ އެވެ. ދެވަނަ ޝޯ ބޮޑުބެރަށް ހާއްސަކޮށްގެން ބާއްވާ އިރު އޭގައި ޕަފޯމްކުރަން ހަމަޖެހިފައި ވަނީ ފަތްމިނި، ހަބޭސް، އެކަތި، ތުއްތު ޕާކް އަދި ހިޔަލަ އެވެ.
"ނޮއިސް" ގެ ޓިކެޓްގެ އަގަކީ 150ރ. އެވެ. ޝޯގެ ޓިކެޓް މިއަދު މެންދުރު ފަހު 2:00 އިން ފެށިގެން ވިއްކަން ފަށާނެ އެވެ.
އޮލިމްޕަހަކީ މީގެ ކުރިން ވެސް މިއުޒިކް ޝޯތައް ވަރަށް ފޯރީގައި ބާއްވާފައިވާ ތަނެކެވެ.
ކޮވިޑާ ވިދިގެން 2020 ގެ މާޗް މަހުގައި އެތަން ބަންދުކޮށް، މިދިޔަ މަހުގެ 4 ވަނަ ދުވަހުގެ ރޭ އަލުން ހުޅުވީ ވެސް ފަންނާނުންތަކެއް ހުށަހެޅުންތަކާ އެކީ ވަރަށް ކުލަގަދަކޮށެވެ. އަދި ބަދަލުތަކާ އެކީ އޮލިމްޕަހަށް ގެނައި ފުރަތަމަ ދިވެހި ފިލްމަކީ ޑާކް ރެއިން އެންޓަޓައިންމަންޓުން މިދިޔަ މަހުގެ 6 އިން މި މަހުގެ 4 އަށް ދެއްކި "ބީވީމާ" އެވެ.
އޮލިމްޕަހުގައި މިހާރު އަންނަނީ ބޭރުގެ ފިލްމުތައް ވެސް އަޅުވަމުންނެވެ. އެގޮތުން މި ފަހަރު ފުރަތަމަ ދެއްކި ފިލްމަކީ މިދިޔަ މަހުގެ 10 ގައި ރިލީޒްކުރި ބޮލީވުޑްގެ ފިލްމު "ޝެހެޒާދާ" އެވެ.
