މާލެ ވިޔަފާރި ބަނދަރަށް ދިމާވެފައިވާ ޖާގައިގެ ދަތިތަކަށް ހައްލެއް ގެނެސް ވިޔަފާރި ބަނދަރު ގުޅީފަޅަށް ބަދަލުކުރުމުގެ ގޮތުން، ގުޅީފަޅުން ބިން ހިއްކަން ފަށަން ތައްޔާރުވެފައިވާކަމަށް މޯލްޑިވްސް ޕޯޓްސް ލިމިޓެޑް، އެމްޕީއެލްގެ ސިއީއޯ ޝާހިދު އަލީ ވިދާޅުވެއްޖެއެވެ.
މިކަން ހައްލުކުރުމުގެ ގޮތުން ސަރުކާރުން ޚާއްސަ އިސްކަމެއްދީގެން މާލެ ވިޔަފާރި ބަނދަރު ގުޅީފަޅަށް ބަދަލުކުރުމުގެ މަސައްކަތް އަންނަނީ ކުރަމުންނެވެ. މިމަސައްކަތުގެ ދަށުން ގުޅީފަޅު ހިއްކުމަށާއި، ރާއްޖޭގެ މައި ސީޕޯޓް ތަރައްޤީކުރުމަށް ބަޖެޓުގައި 959.2 މިލިއަން ރުފިޔާ ވަނީ މިއަހަރުގެ ބަޖެޓްގައި ކަނޑއަޅާފައެވެ.
ގުޅީފަޅުގައި ވިޔަފާރި ބަނދަރު ތަރައްޤީކުރުމުގެ މަސައްކަތްތަކާއި ގުޅޭގޮތުން އެމްޕީއެލްގެ ސީއީއޯ ވިދާޅުވީ މާލޭގެ ވިޔަފާރި ބަނދަރު ގުޅީފަޅަށް ބަދަލުކުރުމުގެ މަސައްކަތް ބާރުދުވެލީގައި ކުރިއަށްދާކަމަށެވެ. އެގޮތުން، މިހާރު ބަނދަރަށް ބޭނުންވާ ބިން ހިއްކަން ތައްޔާރުވެފައިވާކަމަށްވެސް ޝާހިދު ވިދާޅުވިއެވެ. މިމަޝްރޫޢު މިޙާރު އިން ސްޓޭޖަކީ އެބަނދަރަށް ބޭނުންވާ އެއްބައި ވަނީ ހިއްކިފައިކަމަށާއި، އަނެއްބައި ހިއްކުމުގެ މަސައްކަތްތަކުގެ ދަށުން މިހާރު ޑްރެޖަރ އޮތީ އައިފައިކަމަށާއި، ދެން އެބިން ހިއްކާ ނިމެންވާއިރަށް ކޮންޓްރެކްޓަރަަކާއި ހަވާލުކުރެވޭނެކަމަށް އޭނަ ވިދާޅުވިއެވެ. އަދި މިހާރު 4 ކޮންޓްރެކްޓަރުން ޕްރީ ކޮލިފައިކޮށްފައިވާކަމަށްވެސް ޝާހިދު ވިދާޅުވިއެވެ.
ޝާހިދު ވިދާޅުވީ މިހާރު މަސައްކަތްތައް ރޭވިފައިވާގޮތުން ކުރިއަށް އޮތް 2 އަހަރު ދުވަސް ތެރޭގައި މާލެ ވިޔަފާރި ބަނަދަރު ގުޅީފަޅަށް ބަދަލުކުރެވި، ބޭނުންކުރަން ފެށޭނެކަމަށެވެ. އަދި މިއާއިއެކު މާލޭގެ ވިޔަފާރި ބަނދަރަށް ދިމާވެފައިވާ އޮތް ޖާގައިގެ ދަތިކަން ހައްލުވެގެންދާނެކަމަށް ޝާހިދު ފާހަގަކުރެއްވިއެވެ.
މިއީ ވަރަށް މުހިންމު ޕްރޮޖެކްޓެއްކަމަށާއި ރާއްޖޭގެ އިޤްތިޞާދަށްވެސް އަދި ޚާއްސަކޮށް މާލެ ސަރަހައްދުގެ މުޅި ލޮޖިސްޓިކްސް އޮޕަރޭޝަންތަކަށް ވަރަށް ބޮޑު އިންޕެކްޓެއް ބަނދަރު ބަދަލްކުރުމުން އަންނާނެކަމަށް ޝާހިދު ވިދާޅުވިއެވެ. އެގޮތުން ވިޔަފާރި ބަނދަރުގެ ކެޕޭސިޓީ ވަރަށް ބޮޑުތަނުން އިތުރުވެގެންދާނެކަމަށާއި، އެބޭފުޅުން މިހާރު ޚިދުމަތްދޭ ބޯޓުތަކަށް ދޭ ޚިދުމަތްތައްވެސް ވަރަށް ބޮޑަށް ފުޅާވެގެންދާނެކަމަށް ޝާހިދު ވިދާޅުވިއެވެ.
ކޯވިޑަށްފަހު ރާއްޖެއަށް އެތެރެކުރާ މުދާ ދުވަހެއް ދުވަހަކަށް އިތުރުވަމުން އަންނައިރު، އެމްޕީއެލްގެ މަސައްކަތައް ކުރުމަށް މިހާރު ދިމާވެފައިވާ އޮތް އެންމެ ބޮޑު ގޮންޖެހުމަކީ މާލެ ވިޔަފާރި ބަނދަރުގައި އެކަށީގެންވާ ޖާގަ ނެތުމެވެ. އެމްޕީއެލްގެ މަސައްކަތްތައް މިހާރުވެސް ކުރަމުން އަންނަނީ މާލެ ވިޔަފާރި ބަނދަރުގެ ކެޕޭސިޓީއަށްވުރެ 3 ގުނަ އިތުރަށްކަމަށް ޝާހިދު ވަނީ ވިދާޅުވެފައެވެ.
މާލެ ވިޔަފާރި ބަނދަރުގެ ޖާގައިގެ ދަތިކަން ހައްލުކުރުމަށް ސަރުކާރުންނާއި އެމްޕީއެލްއިން ދަނީ ގިނަ މަސައްކަތްތަކެއް ކުރަމުންނެވެ. އެގޮތުން، މިކަން ހައްލުކުރުމަށް ތިލަފުށީގައި ބަލްކް ޓަރމިނަލްއެއް ތަރައްޤީކުރުމުގެ މަސައްކަތް އެމްޕީއެލްއިން އަންނަނީ ކުރަމުންނެވެ.
ބަލްކް ޓާރމިނަލްއަކީ ހިލަ، ހިލަވެލި އަދި ދަނގަޑު ފަދަ ސާމާނު އެތެރެކޮށް، ރާއްކާކުރާ ޓާރމިނަލްއެކެވެ.
