އިތުރު 2500 ހައްޖު ކޯޓާ ހޯދުމަށް ރާއްޖެއިން އެދިއްޖެ

އިތުރު 2500 ހައްޖު ކޯޓާ ހޯދުމަށް ރާއްޖެއިން އެދިއްޖެ

ގުޅުންހުރި

މި އަަހަރު ރާއްޖެ އަށް 2,500 ހައްޖު ކޯޓާ ލިބޭތޯ މަސައްކަތް ކުރަމުންދާ ކަމަށާއި އެކަމުގެ އުއްމީދު ބޮޑު ކަމަށް އިސްލާމިކް މިނިސްޓަރު ޑރ. އަހުމަދު ޒާހިރު ވިދާޅުވެއްޖެއެވެ.

ދައުލަތުގެ މީޑިއާގައި ވާހަކަ ދައްކަވަމުން އިސްލާމިކް މިނިސްޓަރު ޑރ އަހުމަދު ޒާހިރު އަލީ ވިދާޅުވީ މިއަހަރު ރާއްޖެއިން މީހުން ހައްޖަށް ގެންދިއުމަށް އިތުރު 2500 ކޯޓާ ހޯދުމަށް ސައުދީ ސަރުކާރަށް ހުށަހަޅުއްވާފައިވާ ކަމަށެވެ. އަދި މި ކޯޓާ ލިބޭނެ ކަމުގެ އުއްމީދު ބޮޑުކަމަށް އިސްލާމިކް މިނިސްޓަރު ވިދާޅުވިއެވެ.

ރާއްޖެއިން މިއަހަރު މީހުން ހައްޖަށް ގެންދިއުމަށް މިހާރު ސައުދީ ސަރުކާރުން ދީފައިވަނީ 1000 ޖާގައެވެ. އެހެންކަމުން މީހުން ހައްޖަށް ގެންދިއުމަށް ބޭފުންވާ ކުންފުނިތަކުން ޕްރަޕޯސަލް ހުށަހެޅުމަށް އިސްލާމިކް މިނިސްޓްރީން މިހާރު ވަނީ ހުޅުވާލާފައެވެ.

މިނިސްޓަރު ވިދާޅުވީ ފުރަތަމަ ލިބޭ ރަސްމީ ކޯޓާ ޕޯޓަލްއަށް އަޅާ ނިމުނީމަ ދެން އިތުރު ކޯޓާ ލިބުމުގެ ފުރުސަތު ބޮޑުވާ ކަމަށެވެ. ރާއްޖެއަށް ލިބޭ ކޯޓާތަކުގެ ތެރެއިން ދެ ބައިކުޅަ އެއްބައި ދޭނީ ހައްޖު ކޯޕަރޭޝަނަށް ކަމަށާއި އަދި ބާކީ ކޯޓާތައް ދޭނީ ތިން ހައްޖު ގްރޫޕަކަށް ކަމަށް ވެސް މިނިސްޓަރު ވިދާޅުވިއެވެ.

ކޯވިޑަށް ފަހު ހާއްސަ ހާލަތުގައި، އެހެން ގައުމުތަކުން ހައްޖަށް ސައުދީއަށް މީހުން އެތެރެވުމަށް ހުއްދަދިން ނަމަވެސް، ހައްޖުކުރުމަށް ހުރިހާ ގައުމުތަކަކަށް ދިން ކޯޓާގެ އަދަދުވެސް މިދިޔަ އަހަރު މަދެވެ. އެހެންކަމުން ރާއްޖެއަށްވެސް މިދިޔަ އަހަރު ދީފައިވަނީ 453 ކޯޓާއެވެ. ނަމަވެސް ކޮވިޑްގެ ހާލަތަށްފަހު މިއަހަރު އާއްމު ހާލަތުގައި ހައްޖުގެ އަޅުކަން އަދާކުރުމަށް ފުރުސަތު ދިނުމާއި ކުރިން ސައުދީން ކަނޑައެޅި ރައްކާތެރިކަމުގެ ފިޔަވަޅުތައް އުވާލުމަށް ސައުދީ ސަރުކާރުން މިހާރުވަނީ ނިންމާފައެވެ.

ކޯވިޑްގެ ކުރިން 2019 ވަނަ އަހަރު 2.6 މިލިއަން މީހުން ވަނީ ހައްޖުގެ އަޅުކަން އަދާކޮށްފައެވެ. ނަމަވެސް ކޯވިޑާއި ގުޅިގެން 2020 އަދި 2021 ގައި ހައްޖުގެ އަޅުކަން ކުރިއަށް ގެންގޮސްފައިވަނީ ރައްކާތެރިކަމުގެ ފިޔަވަޅުތަކާއިއެކު މަދު އަދަދެއްގެ ބަޔަކާއިއެކުގައެވެ. އަދި އެ ދެ އަހަރު ހައްޖުގެ އަޅުކަމަށް ސައުދީން ބޭރުން އެއްވެސް މީހަކު ހައްޖަށް ދިއުމަށް ކޯޓާއެއް ނުދެއެވެ.

ކޮވިޑަށް ފަހު 2022 ވަނަ އަހަރު އެއް މިލިއަން މީހުންނަށް ހައްޖުގެ އަޅުކަން އަދާކުރުމުގެ ފުރުސަތު ދިން ނަމަވެސް ގައުމުތަކަށް އޭގެ ކުރިން ދިން ކޯޓާއާއި އެއްވަރުގެ އަދަދެއް ދީފައެއް ނުވެއެވެ. އަދި އުމުރުން 65 އަހަރުން މަތީގެ މީހުނަން މިދިޔަ އަހަރު ހައްޖުގެ އަޅުކަމުގެ ފުރުސަތު ދީފައެއް ނުވެއެވެ.

ހިޔާލުފާޅު ކުރައްވާ!

Leave a Reply

Your email address will not be published. Required fields are marked *

ފަހުގެ