ކުރިއަށް އޮތް ރިޔާސީ އިންތިޚާބުގައި ދީނީ އިލްމުވެރިން ހިމެނޭ ޖަމިއިއްޔާ ކަމަށްވާ ސަލަފް ޖަމިއްޔާގެ ނިންމުމަކީ މުހިންމު ނިންމުމަކަށް ވާނެކަމަށާއި، އެޕާޓީގެ ގިނަ އިލްމުވެރިންނަކީ ރައްޔިތުންގެ އިތުބާރުކުރާ ގިނަ އިލްމުވެރިންތަކެއް ހިމެނޭ ޖަމްއިއްޔާއެއްކަމަށް ރައްޔިތުންގެ މަޖިލީހުގެ މަހިބަދޫ ދާއިރާގެ މެމްބަރު އަހުމަދު ތޯރިގު ވިދާޅުވެއްޖެއެވެ.
އޭނާ މިހެން ވިދާޅުވީ ކުރިއަށް އޮތް ރިޔާސީ އިންތިޚާބާއި ގުޅޭގޮތުން ސިޔާސީ ޕާޓީތަކާއި ސަލަފް ޖަމްއިއްޔާއިން ބައްދަލު ކުރަމުންދާތީ އަދާލަތު ޕާޓީގެ ތަރުޖަމާން އަލީ ނަޒީރު ކުރެއްވި ޓުވީޓަކަށް ރައްދު ދެއްވަމުންނެވެ. އަލީ ނަޒީރު ވިދާޅުވީ ޤާނޫނުގެ ހުދޫދުން ބޭރުވާ މަދަނީ ޖަމްއިއްޔާތަކަށް ޖަމްއިއްޔާތަކުގެ ރަޖިސްޓްރަރ ނަސޭހަތްތެރިވެ އެކަން ހުއްޓުވަން ޖެހޭ ކަމަށެވެ. އަދި އެދެނީ ސިޔާސީ ޕާޓީތަކުގެ ދަފްތަރުގައި ސަލަފް ރަޖިސްޓްރީ ވުމަށް ނުވަތަ ރަގަޅު މަދަނީ މަސައްކަތެއްގެ ގޮތުގައި ދީނުގެ ދައުވަތު ކުރިއެރުވުމަށް ކަމަށް އޭނާ ވިދާޅުވިއެވެ.
ނަޒީރުގެ ވާހަކަތަކާއި ގުޅިގެން ތޯރިގު ވިދާޅުވީ ސިޔާސީ ޕާޓީތަކާއި އިންތިޚާބުތަކުގައި ވާދަކުރާ ފަރާތްތަކުން ލޮބީ ގްރޫޕްތައް ނުވަތަ އެކިކަންކަމުގައި އެކިބޭނުމަށް އުފައްދާފައި ހުންނަ ޖަމިއްޔާތަކުގެ އެންޑޯސްމަންޓް ހޯދުމަކީ ކުރިއަރާފައިވާ ޤައުމުތަކުގައިވެސް އޮންނަކަމެއް ކަމަށެވެ.
އަދި ސަލަފްޖަމިއްޔާގެ އެންޑޯސްމަންޓް އިންތިޚާބެއްގައި މުހިއްމުވެ، ގިނަ ރައްޔިތުންތަކެއް އެ ޖަމިއްޔާގެ އިލްމުވެރިންނަށް އިތުބާރުކޮށް، އެ ދީނީ އިލްމްވެރިން ނިންމާ ނިންމުމަކަށް ބަލައި ގަންނަ ކަމަށެވެ. އަދާލަތުޕާޓީ މައިދާނުން ބާކީވެ، ރައްޔިތުންގެ އިތުބާރު ގެއްލުނު ސަބަބުތައް ހޯދޭތޯ އުޅުއްވުން މާރަނގަޅުކަމަށް ޓޮމް ވިދާޅުވިއެވެ.
ޤާނޫނުއަސާސީގެ އަސާސީހައްޤުތަކުގެ ތެރެއިން ހައްޤެއް ހަނިކުރެވޭނީ ކުރިއަރާފައިވާ މިނިވަން ދިމިޤްރާތީ ޤައުމުތަކުގައި އެކަން ހަނިކޮށްފައިވާ މިންވަރަކަށް. ހިތައްއެރީމައި، މަޖިލީހުގެ ބާރުއޮތީމައި، ހަދާ ޤާނޫނަކުން ނުވަތަ ޤަވާއިދަކުން އަސާސީ ހައްޤެއް ހަންޏެއް ނުކުރެވޭނެ.
– ޓޮމް ވިދާޅުވިއެވެ.
ޓޮމް ވިދާޅުވީ ޑްރަގް އެތެރެކުރާ މީހާ ކުށްވެރިނުވެ، ޑްރަގްހުރި ފޮށި ކުށްވެރިވާ ޤަވާއިދުވެސް ހަދާފައިވާކަމަށާއި، އެކަމުގައި އަދާލަތު ޕާޓީ ސަރުކާރުގައި އޮވެމެ އެއްޗެއް ވިދާޅުނުވާތީ ހިތާމަ ކުރާތީ ކަމަށެވެ.
