ނިސްޓަރ އޮފް ޓްރާންސްޕޯޓް އެންޑް ސިވިލް އޭވިއޭޝަން އަދި ޖުމްހޫރީ ޕާޓީގެ ޑެޕިއުޓީ ލީޑަރު އާއިޝަތު ނަހުލާ، ކުރީގެ ރައީސް، ރައީސް ޔާމީންގެ އަނބިކަނބަލުން މެޑަމް ފާތިމަތު އިބްރާހީމާ ބައްދަލުކުރިކަމަށް ބުނެ ދެކެވެމުންދާ ވާހަކަތައް ދޮގުކޮށްފިއެވެ.
ޖުމްހޫރީ ޕާޓީގެ ޑެޕިއުޓީ ލީޑަރުކަން ވެސް ކުރައްވާ މިނިސްޓަރ ނަހުލާ، މެޑަމް ފާތުން އާއި ބައްދަލުކޮށްފި ކަމަށްބުނެ ބައެއް މީޑިއާތަކުގައި ވަނީ ޚަބަރު ގެނެސްދީފައެވެ. ނަމަވެސް އެ ޚަބަރު ދޮގުކޮށް ރޭ ޖުމްހޫރީ ޕާޓީގެ ތަރުޖަމާން އަލީ ސޯލިހް ވިދާޅުވީ މިނިސްޓަރ ނަހުލާ މިއަދު ހަވީރު ވަޑައިގެންނެވީ ޗީބޯ ރެސްޓޯރެންޓަށް ކަމަށެވެ.
ހުޅުމާލޭގައި ހުންނަ މިނިސްޓްރީގެ އޮފީހުން މިނިސްޓަރ ނަހުލާ މާލެ ވަޑައިގަތް މަގުމަތީގައި ޗީޕޯ ރެސްޓޯރެންޓަށް ވަނީ އާއިލާ ބޭފުޅުންކޮޅެއް އެ ރެސްޓޯރެންޓްގައި އެވަގުތު ތިއްބެވުމުން ކަމަށް އަލީ ސޯލިހް ވިދާޅުވިއެވެ.
އާއިލާ ބޭފުޅުންކޮޅެއް ޗީބޯގައި ތިއްބެވީމަ އެތަނަށް ވަޑައިގެން މަންޒަރު ތަސްވީރުކޮށް އެއިން ދޮގު ފެތުރުމަކީ ވަރަށް ނާތަހުޒީބު ކަމެއް.
– އަލީ ސޯލިހް ވިދާޅުވިއެވެ.
ޗީބޯ ރެސްޓޯރެންޓަކީ ބުރެވިމަގާއި ބޮޑުތަކުރުފާނުމަގު ގުޅޭ ކަންމަތިން ބުރެވިމަގުގެ އުތުރުފަރާތުގައި ހުންނަ ރެސްޓޯރެންޓެކެވެ. ރައީސް ޔާމީންގެ ގެކޮޅުކަމަށްވާ ދޫވެހި ހުންނަނީ ބުރެވިމަގާއި ބޮޑުތަކުރުފާނުމަގު ގުޅޭ ދެކުނު ފަރާތު ކަންމަތީގައެވެ.
ޖޭޕީއާއި ޖޭޕީގެ ލީޑަރު އަދި އެ ޕާޓީގެ ލީޑާޝިޕުގައި ތިއްބެވި ފަރާތްތަކާ ގުޅުވައިގެން، އެއްވެސް ހަގީގަތެއް ނެތް ވާހަކަތަކެއް ފަތުރަމުންދާދިޔުން، އަލީ ވަނީ ވަރަށް ހަރުކަށި އިބާރާތުން ކުށްވެރިކޮށް، މިއީ ވަރަށް ނާތަހުޒީބު، ފިނޑި އަމަލެއްގެ ގޮތުގައި ސިފަކުރައްވާފައެވެ. ޕީޕީއެމް އިން ކުރިއަށް އޮތް ރިޔާސީ އިންތިހާބުގައި ވާދަކުރާނީ ރައީސް ޔާމީން ކަމަށް އެޕާޓީން ބުނި ނަމަވެސް އެމަނިކުފާނު ޖަލު ހުކުމެއްގައި ހުންނެވުމުން އިންތިހާބުގައި ވާދަކުރުމުގެ ފުރުސަތު މިވަގުތައް ވަނީ ބަންދުވެފައެވެ.
