މިއަހަރު ބާއްވާ ރިޔާސީ އިންތިޚާބުގައި ވާދަކުރުމަށް ޖުމްހޫރީ ޕާޓީގެ ކައުންސިލުން ފާސްކުރި ޤަރާރާއިއެކު އެމްޑީޕީގެ ރައީސް މުހައްމަދު ނަޝީދު ޤާސިމާއި، ޖުމްހޫރީ ޕާޓީއަށް މަރުހަބާ ދަންނަވައިފިއެވެ.
ޖޭޕީން ރިޔާސީ އިންތިހާބުގައި ވާދަކުރަން ނިންމީ ރިޔާސީ އިންތިހާބުގައި ޖޭޕީން އަމަަލުކުރާނެ ގޮތެއް ނިންމުމަށް ތިނަދޫ އުތުރު ދާއިރާގެ ކުރީގެ މަޖިލިސް މެންބަރު އަބްޅޯ، މިހާރު ހިނގާމުންދާ ޖޭޕީގެ ކޮންގްރެސްއަށް ހުށަހެޅި ގަރާރަށް މެންބަރުން ފުޅާދާއިރާއެއްގައި ބަހުސްކުރުމަށްފަހުއެެވެ. މި ގަރާރަށް ތާއީދުކުރެއްވީ ކުރީގެ މަޖިލިސް މެންބަރު އަލީ ޝާހްއެވެ. މި ގަރާރް ފާސްވެފައި ވަނީ ބައިވެރިވި ހުރިހާ މެންބަރުންގެ އިއްތިފާގުންނެވެ.
ޤަރާރުު ފާސްވުމާއި ގުޅިގެން ރައީސް ނަޝީދު މަޖިލީހުގެ ވަޓްސް އަޕް ގްރޫޕަށް ފޮނުވި މެސެޖުގައި ވިދާޅުވީ މިނިންމުމަކީ ވަރަށް ސަރަފްފުދޭ ރަނގަޅު ނިންމުމެއް ކަމަށެވެ. މިނިންމުމާއިއެކު ޖުމްހޫރީ ޕާޓީ އޮތީ ރައީސް އިބްރާހިމް މުހައްމަދު ޞާލިހުއާއިއެކު ކަމަށް ދެކިގެން ތިބި މީހުން މިހާރުވެސް އެގޮތުގައި ތިބުމަށް މަލާމާތުގެ ރާގަކަށް ނަޝީދު ވަނީ ވިދާޅުވެފައެވެ.
ގަރާރު އެ ފާސްވީ ވަރަށް ތަނަވަސް އަގުލަބިއްޔަތުން. މަރުހަބާ ގާސިމް. ޖޭޕީ އެ އޮތީ ގަދަކޮށް ރައީސް ސޯލިހާއެކީ ކަމަށް ދެކިގެން ތިއްބަވާ. ޖޭޕީން މި އިންތިހާބަށް ނުނިކުންނާނެކަން ދެކުމަކީ ސިޔާސީގޮތުން އެއްގޮތަކަށްވެސް ތަސައްރަފު ނުފުދޭ ވިސްނުމެއް.
– ނަޝީދުގެ މެސެޖުގައި ވިދާޅުވިއެވެ.
ރިޔާސީ އިންތިޚާބުގައި ވާދަކުރުމަށް ޖުމްހޫރީ ޕާޓީގެ ކޮންގްރެސްއިން ފާސްކުރިނަމަވެސް، މިއީ އެޕާޓީގެ ކައުންސިލަށް ދިން ލަފައެކެވެ. އެކަމުގައި އިތުރަށް ކުރަންޖެހޭ ކަންކަން ކުރިއަށްގެންދާނީ އެޕާޓީގެ ކައުންސިލުންނެވެ.
ޖޭޕީއަކީ މިހާރުގެ ސަރުކާރުގެ ކޯލިޝަން ބައިވެރިއެއްވެސްމެއެވެ. ކުރިއަށް އޮތް ރިޔާސީ އިންތިޚާބުގައި ވާދަކުރައްވާ އެމްޑީޕީގެ ކެނޑިޑޭޓުގެ ހައިސިއްޔަތުން ރައީސުލްޖުމްހޫރިއްޔާ އިބްރާހީމް މުޙައްމަދު ޞާލިޙް ވަނީ، އިންތިޚާބުގައި ވާދަކުރަން ކޯލިޝަން ހެދުމުގެ ދަޢުވަތު ޖުމްހޫރީ ޕާޓީއަށްވެސް ދެއްވާފައެވެ. މީގެ އިތުރުން ޢަދާލަތު ޕާޓީއާއި، އެމްއާރުއެމާއި އެމްޑީއޭއަށްވެސް ރައީސުލްޖުމްހޫރިއްޔާ އެ ދަޢުވަތު ދެއްވިއެވެ. މިހާތަނަށް އެމްޑީޕީއާއެކު ކޯލިޝަން ހަދަން ނިންމާފައިވަނީ ޢަދާލަތު ޕާޓީއާއި، އެމްޑީއޭއިންނެވެ.
