ރ.އިނގުރައިދޫ އެމްޑީޕީގެ އެންމެ އިސްކޮށް ހަރަކާތްތެރިވި އެއްބޭފުޅާ އިދިކޮޅު ޕީޕީއެމްއާއި ގުޅިއްޖެއެވެ.
ޕީޕީއެމްއަށް ސޮއިކުރުމަށްފަހު އޭނާގެ ފޯމް ހަވާލު ކުރެއްވީ ޕީއެންސީގެ ނައިބް ރައީސް އާދަމް ޝަރީފާއެވެ. އޭނާ ސޮއި ކުރުމާއި ގުޅިގެން އާދަމް ޝަރީފް ވިދާޅުވީ އަބްދުލް ފައްތާހު ސައީދަކީ ރ.އިނގުރައިދޫ އެމްޑީޕީގައި އެންމެ އިސްކޮށް ހަރަކާތްތެރިވާ ބޭފުޅާކަމަށެވެ. އަދި އޭނާއަކީ އެމްޑީޕީ އުފެދުނީއްސުރެ އިނގުރައިދޫގައި އެމްޑީޕީ ނެގެހެއްޓުމަށް އެންމެ ގިނަ މަސައްކަތްތަކެއްވެސް ކުރެއްވި އެއް ބޭފުޅާކަމަށެވެ.
އެމްޑީޕީ އުފެދުނީއްސުރެ ރ.އިނގުރައިދޫގައި އެންމެ އިސްކޮށް ހަރަކާތްތެރިވި އަބްދުލް ފައްތާހު ސައީދު މިއަދު ޕީޕީއެމްއާއި ގުޅިވަޑައިގަތުމަކީ ރައީސް ޔާމީނާއި ޕީޕީއެމް، ޕީއެންސީއަށް ލިބުނު ވަރަށް ބޮޑުު ހިތްވަރެއް. އަދި ބޮޑު ކުރިއެރުމެއް! ފައްތާހުއަށް ހޫނު މަރުހަބާއެއް ދަންނަވަން.
– އާދަމް ޝަރީފް ވިދާޅުވިއެވެ.
MDP ufedhuneessure Raa Inguraidhoo gai emme iskoh harakaaiytherivi Abdul Faththah Saeed miadhu Progressive Party of Maldives (PPM) ah gulhivadaigathumakee Raees Yameen aai PPMPNC ah libunu varah bodu hiiyvareh, adhi bodu kurierumeh! Faththah ah hoonu maruhabaa eh dhannavan. pic.twitter.com/C0i1Ifyj2l
— Adam Shareef Umar (@Adamshareefz) February 25, 2023
އެމްޑީޕީގެ ރިޔާސީ ޕްރައިިމަރީއަށްފަހު އެޕާޓީ ވަނީ ވަރަށް ބޮޑަށް ބައިބައި ވެފައެވެ. ރައީސް ނަޝީދާއި، ރައީސް ޞާލިހަށް ތާއީދު މެމްބަރުންގެ މެދުގައި ބަހުގެ ހޫނު ހަމަލާތަކެއް ބަދަލު ކުރަމުންދާއިރު، ރައީސް ނަޝީދަށް ތާއީދު ކުރާ ބައެއް މެމްބަރުން ގެންދަނީ އެމްޑީޕީން ވަކިވަމުންނެވެ.
ރައީސް ނަޝީދު ވަނީ ކުރިއަށް އޮތް ރިޔާސީ އިންތިޚާބުގައި ރައީސް ޞާލިހަށް ތާއީދު ނުކުރައްވާނެކަން ތަކުރާތުކޮށް ވިދާޅުވެފައެވެ. އަދި ރައީސް ނަޝީދު ގެންދަވަނީ ފިކުރެއްގެ ދިރުމުގެ ނަމުގައި ހަރަކާތެއް ފަށާއި، ފޯމުތަކުގައި ސޮއި ކުރަމުންނެވެ. މިހާތަނަށް 50،000 އަށް ވުރެ ގިނަ މީހުން ފިކުރެއްގެ ދިރުމާއި ގުޅިފައިވާކަމަށް މިހަރަކާތުގައިި އިސްކޮށް ހަރަކާތްތެރިވާ ބޭފުޅުން ވަނީ ވިދާޅުވެފައެވެ.
