ބީރުމަކާއި މަންކަމަށް އަދި އެނޫނަސް އެބާވަތުގެ، އުފެދުމުގައި ހުންނަ އުނިކަމަށް، ފުމެލުމާއި، ގައިގެ ތަންތަނުގައި އަތްލައިގެން، އަދި ގުރުއާނުގެ ޒަރީއާއިން ފަރުވާ ހޯދާދޭކަމަށް ބުނެ، މިމަހުގެ ކުރީކޮޅު ރާއްޖޭގައި ފަރުވާދިން، އިރާގަށް ނިސްބަތްވާ ޑރ. މާލާ އަލީ މަހުމޫދު ރާއްޖެ ނާދެވޭ ގޮތަށް ބްލެކް ލިސްޓް ކޮށްފިއެވެ.

އިމިގްރޭޝަނުން އޭނާ ބްލެކް ލިސްޓު ކޮށްފައިވަނީ، ފާއިތުވި ޖަނަވަރީ 29 ގައި ޓޫރިސްޓް ވިސާގައި ރާއްޖެއައސްި، އުފެދުމުގައި އުނިކަން ހުރި ބައެއް ދިވެހިންނަށް އޭނާ ފަރުވާދިން ވީޑިއޯތަކެއް ސޯޝަލް މީޑިއާގައި ދައުރެވެ، ސަރުކާރުގެ މުވައްސަސާތަކުން ހުއްދަ ނުހޯދާ ރާއްޖޭގައި އޭނާ ފަރުވާ ދީފައިވާ މައްސަލަ ބަލަމުންދާކަމަށް މީގެ ކުރިން ހެލްތު މިނިސްޓްރީން ބުނެފައި ވަނިކޮށެވެ.

ހެލްތު މިނިސްޓްރީން ބުނެފައިވަނީ މާލާ އަލީ ރާއްޖޭގައި ފަރުވާ ދީފައިވަނީ ސަރުކާރުގެ އެއްވެސް އިދާރާއަކުން ހުއްދަ ހޯދުމަކާ ނުލާކަމުގައެވެ.

ޓޫރިސްޓު ވިސާގައި ރާއްޖެއަށް ޒިޔާރަތް ކުރާ ފަރާތްތަކަށް ރާއްޖޭގައި މަސައްކަތް ކުރުމުގެ ހުއްދައެއް ނޯވެއެވެ. ރާއްޖޭގައި އެއްވެސް ބާވަތެއްގެ މަސައްކަތެއް ކުރާނަމަށް ރާއްޖެއަށް އެތެރެވާން ޖެހެނީ ވާރކް ވިސާ ހޯދުމަށްފަހު އެވެ.

މައުލޫމާތު ލިބިފައިވާ ގޮތުގައި އިމިގްރޭޝަނުން މާލާ އަލީ މިއަދު ބްލެކް ލިސްޓު ކޮށްފައިވަނީ ހެލްތު މިނިސްޓްރީން އެދިގެންނެވެ. އެހެންކަމުން މާލާ އަލީއަށް، ޓޫރިސްޓު ވިސާގައިވެސް ދެން ރާއްޖެއަކަށް ނާދެވޭނެއެވެ.

މާލާ އަލީ ރާއްޖެއައިސް، ބައެއް ގޭގެއަށް ޒިޔާރަތްކޮށް، އުފުދުމުގައި އުނިކަން ހުންނަ ބައެއް ކުދިންނަށް ޝިފާ ހޯދާ ދިނުމުގެ ނަމުގައި، އޭނާގެ "ފަރުވާ" ދީފައި ވެއެވެ. މިގޮތުން ގުރުއާންގެ އާޔަތްތައް ކިޔަވަމުން، ފަރުވާއަށް ބޭނުންވާ މީހުންގެ ގައިގެ ބައެއް ތަންތަނުގައި އަތްލާ، ހިފާ، އަދި ބައެއް މީހުންގެ އަގައިތެރެއަށް އޭނާގެ އަތްބާނާ ހަދާ މަންޒަރުވެސް އާންމުވެފައިވާ ވީޑިއޯތަކުން ފެންނާން ހުރެއެވެ.

އެހެންނަމަވެސް ރާއްޖެއައިސް އޭނާގެ މިދިން "ފަރުވާ"އިން އެއްވެސް މީހަކަށް ޝިފާއެއް ލިބިފައި ނުވާކަމަށް ވެއެވެ.

ލާލާ އަލީ ރާއްޖެއައިސް ފަރުވާ ދިނުމުގެ ނަމުގައި ހިންގި ޕްރޮގްރާމަށް ރާއްޖޭގެ ދީނީ ގިނަ އިލްމުވެރިންގެ ފާޑުކިއުންވެސް އަމާޒުވެފައި ވެއެވެ.