ފަނޑިޔާރުން ދިގު މުއްދަތުގެ ތަމްރީންތަކަށް ވީއްލާނެ އުޞޫލެއް ހަމަޖައްސައިދިނުމަށް ޖުޑިޝަލް ސާވިސް ކޮމިޝަން (ޖޭއެސްސީ) އިން ނިންމައިފިއެވެ.
އެކޮމިޝަނުން މިގޮތަށް ނިންމާފައިވަނީ ދިގު މުއްދަތުގެ ތަމްރީންތަކަށް ފަނޑިޔާރުން ވީއްލުމުގައި މިހާތަނަށް ޢަމަލުކުރާނެ ވަކި އުޞޫލެއް ނެތުމާއި ފަނޑިޔާރުންގެ ޤާބިލްކަން އިތުރުކުރުމަކީ މުހިންމުކަމެއްކަމުގައި ދެކޭތީއެވެ. ޖޭއެސްސީން ވިދާޅުވީ ފަނޑިޔާރުން އަމިއްލައަށް ހޯދާ ފުރުސަތުތަކުގައާއި ތަމްރީން ޕްރޮގްރާމްތަކާއި، ކޯސްތަކަށް ފަނޑިޔާރުން ވީއްލުމަށާއި، މިފަދައިން ވީއްލާއިރު މުސާރައާއި ޢިނާޔަތްތައް ހަމަޖެހިގެންދާނެ އުޞޫލެއް ތައްޔާރުކުރުމުގެ މަސައްކަތް ފެށުމަށް ކޮމިޝަނުން ނިންމާފައިވާކަމަށެވެ.
ޖޭއެސްސީން މިގޮތަށް ނިންމީ ފަނޑިޔާރުކަމަށް އައްޔަނުވުމަށްފަހު ދިގުމުއްދަތުގެ ތަމްރީން ފުރުސަތުގައި ފަނޑިޔާރުން ބައިވެރިވުމަށް ހުރަސްތަކެއް ހުރުމުން، އެކަމަށް ރިއާޔަތްކޮށެވެ. އަދި ފަނޑިޔާރުންނަށް އިތުރަށް ތައުލީމު އުނގެނުމަށް ހިތްވަރު ދިނުމުގެ ގޮތުންނާއި، ދާއިރާގެ ހުނަރާއި، ޤާބިލްކަން އިތުރު ކުރުމަށް ހިތްވަރުދީ ބާރުއެޅުމުގެ ގޮތުންނެވެ.
މިއުސޫލު އެކުލަވާލަން ނިންމާފައިވަނީ، މިފަދަ ފުރުސަތުތަކުގައި ބައިވެރިވެ ވަޑައިގަތުމައްޓަކައި ފަނޑިޔާރުން، ފަނޑިޔާރުކަމުން ދުރުވެ ވަޑައިގަންނަން ނުޖެހޭނެފަދަ ގޮތަކަށް ވީއްލުމުގެ ކަންތައްތައް އިންތިޒާމް ކުރުމަށް ކަމަށް ޖޭއެސްސީން ވިދާޅުވެއެވެ.
