މާލެ މަގުމަތީގައި ސަލާން ޖަހަން އުޅުނު ޖަޕާނު އަންހެން މިހާ އިމިގްރޭޝަނާއި ހަވާލުކުރިތާ ގިނަ ދުވަސްތަކެއް ނުވަނީސް އެނާ ދޫކޮށްލައިފިއެވެ.
ޖަޕާން މީހަކު މާލެ މަގުމަތީގައި ސަލާން ޖަހާ ކަމަށް ބުނެ މީހަކު މި މަހުގެ 13 ވަނަ ދުވަހު ކުރި ޓްވީޓެއްގައި ބުނެފައި ވަނީ، ފާރިސް ނަމަކަށް ކިޔާ މީހަކާ ކައިވެނިކޮށްގެން 13 އަހަރުވެއްޖެ ކަމަށް އޭނާ ބުނާ ކަަމަށެވެ. އަދި މިހާރު އޭނާއާ 3-2 ދެ ފަހަރު ދިމާވެއްޖެ ކަމަށްވެސް ބުންޏެވެ.
އޭނާ ވަނީ މިއީ ކިހިނެއް ކޮންތާކުން އައިސްގެން އުޅޭ މީހެއްތޯ ބަލާ، އޭނާގެ ގައުމަށް އޭނާ އަނބުރާ ފޮނުވާލަ ދިނުމަށް ގޮވާލާފައެވެ. އޭނާ ބުނާގޮތުން ގިނައިން މި މީހާ ސަލާން ޖަހައިގެން ފައިސާ ހޯދަނީ އެކަނި ދިމާވާ ފިރިހެނުން ކައިރިންނެވެ. އޭނާގެ އެ ޓްވީޓަށް ކޮމެންޓް ކުރި ބައެއް މީހުންވެސް ވަނީ، އެ މީހުންނާއި އެ އަންހެން މީހާއާ ދިމާވެފައިވާ ކަމަށް ބުނެފައެވެ.
ފުލުހުން އެ މީހާ ހޯދައި ފުލުހުންގެ ބެލުމުގެ ދަށަށް ގެންގޮސް އިމިގްރޭޝަނާ ހަވާލުކުރި ނަމަވެސް އިމިގްރޭޝަންގެ މީޑިއާ އޮފިޝަލަކު ވިދާޅުވީ މައްސަލަ ކުރިއަށް ގެންދަނީ އެ މީހާ ހައްޔަރުކޮށްފައި ބަހައްޓައިގެން ނޫން ކަމަށެވެ.
އިމިގްރޭޝަނުން ބުނި ގޮތުގައި މިއީ ދިވެއްސަކާ އިނދެގެން އުޅޭ މީހެކެވެ. އެހެންވެ އޭނާގެ އަތުގައި ރެސިޑެންސް ވިސާ އޮންނަ ކަމަށް އިމިގްރޭޝަނުން ވަނީ ބުނެފައެވެ.
